Qindra miliona turistë grumbullohen çdo vit në Itali, duke shijuar Alpet ose vijën bregdetare të vendit.
Sidoqoftë, ndërsa vera afrohet mes kufizimeve të Covid-19, duket se nuk ka të ngjarë që ata të mund ta shijojnë “Bel Paese” ashtu si zakonisht.
Italia tashmë ka hequr disa masa bllokimi dhe do të vazhdojë ta bëjë këtë më tej pas 4 maj.
Se si do të ndikojnë rregullat e distancës sociale në këtë sezon veror, megjithatë mbetet e paqartë.
Pandemia e Covid-19 e ka goditur shumë rëndë sektorin e turizmit.
Vende si Kroacia, ekonomia e së cilës varet jashtëzakonisht shumë nga turizmi, kohët e fundit kanë dalë me ide të zgjuara për të mbajtur gjallë rrjedhjet e turizmit verën e ardhshme, siç janë “korridoret turistike”.
Pronarët e plazheve private në Itali po përgatiten gjithashtu dhe kanë filluar të marrin masa “antikoronavirusi” duke aplikuar masa për distancimin social në vendpushimet e tyre.
Porto Cesareo, një qytet i vogël bregdetar me nofkën “Karaibe” të rajonit juglindor të Puglia të Italisë, një plazh privat po vendos ombrellat dhe karriget me një distancë sigurie prej 1.5 metrash, si dhe instalon litarë për të shënuar hapësirën midis pushuesve.
Por rregullat e distancimit shoqëror nuk janë çështje vetëm e hapësirës. Ato përfshijnë gjithashtu shërbimin ndaj klientit.
Muajin e kaluar, ministri i Turizmit dhe Kulturës në Itali Dario Franceschini njoftoi masa “të rëndësishme” për të mbështetur sektorin e turizmit në mes të pandemisë Covid-19, thotë “Euronews”.
Masat përfshijnë mbështetje financiare për punonjësit sezonalë të turizmit dhe lehtësimin e taksave për disa aktivitete biznesi, si dhe kuponë “rimbursimi” për hotele që patën anulime të rezervimit.
Për më tepër, ministria e turizmit po planifikon të “rindërtojë” imazhin e Italisë në botë me një fushatë të re marketingu.
