Në Maqedoni është regjistruar edhe një parti e re politike shqiptare. Bëhet fjalë për subjektit politik “Lëvizja për Shtet dhe Drejtësi”, i cili me vendim gjyqësor të datës 02.05.2018 është regjistruar me të drejtë veprimi ne skenën politike të RM-së.

Nga kjo parti thonë për Gazetën Lajm se kryetari i saj do të jetë Adnan Abdullahu-Voka nga Tetova. Mirëpo mbi kryetarin do të jetë “Këshilli i Pleqve” që do të sjellë vendimet më të rëndësishme dhe i cili do të përbëhet nga anëtarë jashtë dhe brenda Maqedonisë.

“Njoftojmë opinionin publik, mjetet e informimit, të gjithë qytetarët e Republikë së Maqedonisë, se në bazë të kërkesës së një grupi të qytetarëve, shtetas të RM-ës, deponuar në Gjykatë, me date 13.04.2018 për regjistrimin e subjektit politik “Lëvizja për Shtet dhe Drejtësi” me vendim gjygjsorë të datës 02.05.2018 i njëjti subjekt është regjistruar me të drejtë veprimi ne skenën politike të RM-ës.

I njëjti vendim, nga ana e gjykatës, me datë 17.05.2018 i është dorëzuar personit të autorizuar të subjektit politik, LSHD. Me këtë rast, kryesia e LSHD-ës ka bërë edhe përgatitjet e fundit për promovimin publik te subjektit, ndërkohë pritet caktimi i datës dhe vendit të promovimit nga ana e “Këshillit të Pleqve” që është i përbërë nga anëtarë brenda dhe jashtë shtetit, si organ më i lartë partiak që qëndron mbi kryesinë e subjektit dhe vetë kryetarin e sajë.

Në ndërkohë njoftojmë se subjekti politik “Lëvizja për Shtet dhe Drejtësi” do të jetë me seli në Tetovë, ndërsa subjektit, është caktuar që ti prijë Z. Adnan Abdullahu-Voka nga Tetova”, thuhet në kumtesën e këtij subjekti.

Abedin Zymberi

FALEMINDERIM
Kto jemi ne shqiptarë, jemi popull me tradit, popull human, popull liridashës, popull që dhimbset për vëllaun vëllanë, këtë e dhëshmoi sot me pjesmarrjen masovike në varrimin e t’birit ton Bardhil Zymberi.

Familja ZYMBERI ju asht mirënjohëse pa fund për pjsemarrjen tuaj në varrimin e Bardhilit. Jemi krenar që i takojmë familjes së sakrificës për atdhe, kjo e sodit e dëshmoj edhe njiher se ja ka vlejt të sakrifikohemi për kët popull kaq human.

I faleminderojm gjith vëllezërit që erdhën nga larg: Kosova, nga Ghitha qytetet e Ilirides, Preshevës. Faleminderim gjith banorëve të fshatit Sllupçan miqve dhe gjith të tjerve që sot naj shëndrruat dhimbjen në krenari.
Zoti ju shpërbleft me gjitha të mirat e kësaj Bote.

Ndonëse pretendon se mbron liritë dhe të drejtat e qytetarëve dhe është Avokat i Popullit, Ixhet Memeti nuk respekton të drejtën e tij Kushtetuese, për të folur dhe shprehur në gjuhën amtare, ndërsa arsyetohet se këtë e bën në shenjë respekti ndaj shoqërisë.

Ai është respekt ndaj asaj që do të thotë shoqëri, bashkim dhe nevojë e shoqërisë sonë – tha Ixhet Memeti, Avokat i Popullit.

Në funksion aq sa ekziston edhe vet institucioni. Memeti nuk sheh asgjë të keqe këtu, megjithatë nuk do të donte mandat të përhershëm. Ndërkohë që shprehet se gjatë zgjedhjes së tij në këtë post gjithmonë ka pasur edhe mbështetjen e partive maqedonase.

Në zgjedhjen time të dytë, për fat të keq pasi LSDM-ja nuk ndodhej në Kuvend, kisha mbështetjen vetëm të VMRO-së. Kjo dëshmon se mandatet e mia kanë gëzuar mbështetjen të partive politike maqedonase edhe të së majtës edhe të së djathtës – tha ai.

Duke i përkujtuar 24 dhjetorin e 2012 dhe mos ndërmarrjen e masave si Avokat i Popullit për largimin e dhunshëm të deputetëve nga Kuvendi dhe dhjetëra raste të tjera për të cilat institucioni në krye me të i kishin mbyllur sytë, Memeti arsyetohet me faktin se Avokati i Popullit vetëm adreson vërejtjet dhe nuk ka asnjë mekanizëm tjetër në duart e tij. Njëri ndër rastet kur Ixhet Memeti ishte i zëshëm ishte edhe arrestimi i Mitko Çavkov dhe deputetëve të VMRO-DPMNE-së.

Në vigjilje të 20 vjetorit të institucionit Avokati i Popullit, Memeti shprehu gatishmëri për të vazhduar luftën kundër padrejtësive, korrupsionit dhe diskriminimit. Për këtë kërkoi mbështetjen e Qeverisë dhe Kuvendit. I pari i Kuvendit, Talat Xhaferi tha se rekomandimet e Avokatit Popullit duhet bërë doracak studimi, ndërsa kryeministri Zoran Zaev theksoi gatishmërinë e Qeverisë për bashkëpunim./am/

Policia dje në autostradën Kumanovë-Tabanovcë ka zbuluar një furgon me targa të Shkupit në të cilin ishin bartur 43 migrantë, ndërsa drejtuesit nga Radovishi, të automjetit i është caktuar masa 30 ditë paraburgim.

Furgoni ka filluar që ta ngadalësojë shpejtësinë me qëllim që të ndalojë, mirëpo më pas ka filluar që ta ngasë me shpejtësi më të madhe që të i ikë zyrtarëve policorë. Më pas në fshatin Pukovski kanë hyrë në një rrugë qorre, gjegjësisht në oborrin e një shtëpie.Më pas drejtuesi i automjetit ka ikur, mirëpo për një kohë të shkurtër është zënë, dhe është vërtetuar se bëhet fjalë për E.A(30) nga fshati Koxhalija në Radovish, njoftojnë nga MPB-ja.

Ndërsa, 14 prej migrantëve kanë qenë nga Pakistani, 16 nga Iraki dhe 13 migrantë nga Avganistani.

Kryeministri Zoran Zaev sot deklaroi se pret rezultat gjatë negociatave me homologun e tij grek, Aleksis Cipras në takimin që duhet të mbahet deri në fund të javës.

Lidhur me pikat e publikuara për zgjidhjen e çështjes së emrit, Zaev konfirmoi se këto kanë qenë pjesë e bisedimeve në takimin e liderëve.

Ndërsa shtoi se bisedimet me Greqinë për emrin janë në fazën finale, dhe ishte decidë lidhur me atë se a do të ketë referendum apo jo, ku tha se qytetarët do ta thonë fjalën përfundimtare, dhe si periudhë kur do të mbahej referendumi theksoi muajin shtator ose tetor.

Kurse para se të mbahej referendumi, marrëveshja eventuale që do të arrihet, duhet që të ratifikohet në Parlament, sepse Zaev deklaroi se është e rëndësishme që qytetarët ta dijnë qëndrimin e politikanëve para se të sqarohen në referendum, ku mes tjerash Zaev tha se pret mbështetjen edhe të opozitës për ratifikimin e marrëveshjes./tv21/

Qeveria e Maqedonisë sot e ka publikuar raportin për punën një vjeçare të tyre, megjithatë vetëm në gjuhën maqedonase, edhe pse në realizimet e tyre theksohet se e kanë miratuar ligjin e gjuhëve, njofton Portalb.mk.

Zëdhënësi i Qeverisë, Muhamed Hoxha, thotë se është duke u bërë gati dhe së shpejti do ta publikojmë edhe versionin në gjuhën shqipe.

“Është duke u bërë gati dhe së shpejti do ta publikojmë të përkthyer në gjuhën shqipe”, tha shkurt për Portalb.mk Hoxha.

Departamenti amerikan i Shtetit mbrëmë publikoi raportin vjetor për liritë fetare për vitin 2017, në të cilin në pjesën për Maqedoninë ceket se komunitetet fetare vazhdojnë të figurojnë në procese penale dhe qytetare gjyqësore. Më pas, Departamenti i Shtetit noton procesin e përsëritur kundër peshkopit Jovan Vranishkovski.

“Gjykata themelore Shkup vitin e kaluar dënoi Vrnaishkovskin, argjipeshkvi i Argjipeshkvisë së Ohrit, për pastrim parash. Peshkopi u dënua me shtatë muaj burg. Gjykata gjithashtu urdhëroi konfiskim të tokës të AO në vlerë prej 140 mijë eurove, që më vonë edhe u krye”, ceket në raport. Janë notuar edhe ankimet nga Bashkësia fetare islame në Maqedoni. për atë se në fshatin Lazhec dhe në Kriva Pallankë po bëhen bllokime për ndërtimin e xhamive nën presion nga banorët lokalë, të cilët e kundërshtojnë ndërtimin.

BFI, gjithashtu, është ankuar se autoritetet vazhdojnë ta bllokojnë rikonstruktimin e xhamisë në Prilep, e djegur gjatë konfliktit të vitit 2001.

Në raportin për vitin 2017 ceket edhe se Kisha ortodokse e Maqedonisë është ankuar se komuna e Strugës ende nuk ka sjellë vendim për ndërtimin e kishës ortodokse në fshatin Belicë dhe se komuna e Tetovës ka refuzuar të ndërtojë rrugën te kisha e qytetit. Në raportin e Departamentit të Shtetit më tutje ceket se ambasadori amerikan dhe përfaqësues të tjerë të ambasadës patën takime me përfaqësues qeveritarë dhe parlamentarë, bashkësi fetare dhe organizata nga shoqëria qytetare, me të cilët diskutuan për çështje lidhur me lirinë fetare.

Departamenti i Shtetit dje festoi 20-vjetorin e miratimit të Ligjit për liri ndërkombëtare fetare. Prej atëherë çdo vit parashtrojnë raporte në Kongresin amerikan për mbështetje të lirive dhe të drejtave fetare të qytetarëve nëpër botë, për të cilat SHBA-ja është mbrojtëse e madhe. Me rastin e përvjetorit, sekretari amerikan i Shtetit, Majk Pompeo këtë verë do të jetë nikoqir i këshillit ministror për mbështetje të lirive fetare ku do të tubohen liderët fetarë. aktivistë për të drejta të njeriut dhe shoqëria civile nga e mbarë bota.

Krahas përkthyesve, në këtë Gjykatë përfaqësimi i duhur i shqiptarëve mungon pothuajse në të gjitha sektorët dhe nivelet. Burime brenda GJPSH-së për gazetën KOHA thonë se nga numri i përgjithshëm i administratës gjyqësore – 100, në këtë gjykatë nuk punojnë më tepër 13 shqiptarë

Omer XHAFERI

Aktgjykimi kundër 35 shqiptarëve të akuzuar për ngjarët e Kumanovës të vitit 2015, në Gjykatën Penale të Shkupit (GJPSH) ende nuk është përkthyer. Pavarësisht faktit se kanë kaluar mbi 7 muaj që kur janë shqiptuar dënimet kapitale dhe ato me burg të përjetshëm, shqiptarët e dënuar për “Lagjen e “Trimave”, kryesisht shtetas të Kosovës akoma nuk e kanë pranuar vendimin e gjykatës.

Për zvarritjen e dorëzimit të këtij vendimi të rëndësishëm për ecurinë e mëtutjeshme të procesit gjyqësor për “Grupin e Kumanovës”, burime të gazetës KOHA, flasin se janë të vetëdijshëm edhe drejtuesit e Gjykatës. Në këtë drejtim siç mëson gazeta KOHA, disa prej të akuzuarve pasi e kanë kuptuar se përkthimi mund të zgjatet ende, kanë kërkuar që aktgjykimi t’ju dorëzohet në gjuhën maqedonase.

“Më të vërtet bëhet fjalë për një material voluminoz dhe përkthyesit tanë janë duke punuar në përkthimin e vendimit nga maqedonishtja në shqip. Ne ballafaqohemi me mungesë të përkthyesve shqiptarë dhe për këtë arsye kemi kërkuar përkthyes nga Gjykata e Apelit. Ndërkohë, dy prej të dënuarve kanë parashtruar kërkesë që aktgjykimi t’ju dorëzohet në gjuhën maqedonase dhe në këtë e kemi bërë”, thonë nga GJPSH-ja, pa precizuar se kur pritet që ky vendim në shqip t’ju dorëzohet të dënuarve për “Lagjen e Trimave”.

Përkundër asaj se aktgjykimin për “Lagjen e Trimave” GJPSH u ka dorëzuar avokatëve, lënda nuk mundet të ankimohet para Gjykatës së Apelit derisa e njëjta nuk ju dorëzohet edhe të dënuarve.

Mungesën e kuadrit të përshtatshëm në GJPSH më së mirë e shpjegon fakti se përfaqësimi i drejtë dhe adekuat i etnisë jo maqedonase, në këtë rast të shqiptarëve, nuk është i respektuar konform 25 përqindëshit të kërkuar me ligj. Krahas përkthyesve, në këtë Gjykatë përfaqësimi i duhur i shqiptarëve mungon pothuajse në të gjitha sektorët dhe nivelet.

Burime brenda GJPSH-së për gazetën KOHA thonë se nga numri i përgjithshëm i administratës gjyqësore, në këtë dikaster nuk punojnë më tepër 13 shqiptarë. Nga daktiliografët e deri te nëpunësit gjyqësor nëpër sportele, shqiptarë rrallë pak mund të vërehen në GJPSH, ndërsa numri i administratës gjyqësor i kalon 100 nëpunës gjyqësor të angazhuar në kohë të pacaktuar dhe të caktuar.

Një shkallë e ulët e përfaqësimit kur jemi të GJPSH-ja, po ashtu është konstatuar dhe te numri i gjykatësve që janë të angazhuar në procedimin dhe shqyrtimin e lëndëve nga rastet për kundërvajtje e deri te ato për krim të organizuar. Megjithatë, qëndrimi i kësaj gjykatës është se caktimi dhe zgjedhja e gjykatësve është kompetencë e Këshillit Gjyqësor.

Sistematizimi i duhur i shqiptarëve nëpër organet shtetërore dhe ato gjyqësore, shkruan KOHA, edhe pse duhej të përmbushej vite me parë, fatkeqësisht kjo zbrazëtirë e vazhdon të mbizotëroj edhe sot.

Ndryshe, siç njoftojnë nga Gjykata Penale e Shkupit, kuorumi i plotë i gjykatësve që duhet t’i procedojnë lëndët dhe shqyrtojnë rastet nuk është i përmbushur sipas normave ligjore. Trendi i zvogëlimit të numrit të gjykatësve ndër vite, fenomen ky i cili u përmend në Raportin e fundit të Këshillit Gjyqësor, më së miri shpjegohet se në GJPSH mungojnë rreth 20 gjykatës, gjegjësisht nga 70 gjykatës sa duhet të punojnë, në gjykatën më të madhe të Maqedonisë e cila e heton krimin e organizuar dhe së fundmi lëndët e Prokurorisë Speciale Publike, punojnë vetëm 51 gjykatës. (koha.mk)

Ndërtimin e shkollës në Reçicë të Vogël e premtoi edhe kryeministri Zoran Zaev gjatë vizitës në këtë fshat në kohën e fushatës për zgjedhjet lokale, duke nënvizuar se kjo shkollë do të jetë prioritet për Qeverinë

Urim HASIPI

Tetovë, 29 maj – Fshati Sellcë dhe lagjja Reçicë e Vogël ende janë në pritje se kur do të fillojnë punimet dhe kur këto dy projekte do të fillojnë të realizohen në praktikë. As në Reçicë as në Sellcë, nuk është nisur as nga pika zero. Për shkollën në Reçicë të Vogël vazhdojnë të jepen premtime të pafundme, kurse në terren ende asgjë konkrete nuk ka, shkruan gazeta KOHA. Në këtë lagje banorët që moti kanë kërkuar ndërtimin e një objekti shkollor, por gjithnjë institucionet kanë gjetur mënyra për t’ju shmangur këtij investimi. Ministri i Arsimit, Arbër Ademi, theksoi se kjo shkollë është prioritet i ministrisë dhe Qeverisë, por pa precizuar se kur një gjë e tillë do të ndodh.

“Të dy shkollat, si në Reçicë ashtu edhe në Sellcë, janë në prioritetet e Ministrisë së Arsimit dhe Shkencës, por edhe të Qeverisë. Për këto dy projekte, në mënyrë më të detajuar do të informoheni nga zëvendëskryeministri Hazbi Lika dhe nga kolegët tjerë qeveritar dhe punojmë në mënyrë të vazhdueshme që të përmirësojmë infrastrukturën shkollore”, deklaroi Ademi.

Më herët, edhe kryetarja e Komunës së Tetovës, Teuta Arifi, theksoi se shkolla në Reçicë të Vogël është prioritet i mandatit katërvjeçar. Sipas kryetares Arifi, janë duke u bërë të gjitha përpjekjet që ky projekt të financohet nga buxheti i shtetit dhe presin që Qeveria të miratojë në programin e vitit vijues.

“Mendoj se me këtë mandat do përfundoj ajo shkollë. Siç e dini historinë e shkollës, katërvjeçarin e fundit ishte në programin për tu realizuar me grand kinez, dhe ne kërkuam nga qeveria që të tërheq nga realizimi i atij grandin, por të vendos në buxhetin e saj. Jemi duke përfunduar edhe një revizion të dytë të lejes meqenëse projekti ka leje, është i plotë dhe presim që Ministria e Arsimit ashtu siç ka thënë edhe Qeveria, që ky projekt të realizohet”, ka deklaruar Arifi. Ndërtimin e kësaj shkolle e premtoi edhe kryeministri Zoran Zaev gjatë vizitës në këtë fshat në kohën e fushatës për zgjedhjet lokale, duke nënvizuar se kjo shkollë do të jetë prioritet për Qeverinë. Edhe pse kishte një paralajmërim për një donacion të huaj se do të ndërtohet shkollë në këtë lagje të Tetovës, megjithatë deri më tash nuk është punuar asgjë në terren.

Madje, kishte deklarata të llojit se nëse nuk e financojnë kinezët, do ta ndërtojë Qeveria apo komuna, por sërish asgjë. Në ndërkohë, rreth 700 nxënës të kësaj paralagje tetovare mësimin e ndjekin në këtë shkollën fillore e cila ka më shumë se 1700 nxënës. Shkolla është ndërtuar në vitin 1969 me një kapacitet prej 700 deri në 800 nxënës, ndërsa tani numri i nxënësve është 1700, kurse gjysma e këtyre janë të lagjes Reçicë e Vogël. Prindërit e kësaj lagje që moti kërkojnë një shkollë, por assesi ky projekt të realizohet.

Nga ana tjetër, në fshatin Sellcë ku edhe atje është kërkuar shkollë e re për shkak se shkolla ekzistuese nuk i plotëson kushtet, sipas informacioneve zyrtare, për momentin janë duke u bërë analiza për qëndrueshmërinë e tokës në disa lokacione për shkak se në objektin që nisi të ndërtohet më herët, nuk mund të vazhdohet me punë sepse dheu është i rrëshqitshëm.

Objekti ekzistues ku mësojnë nxënësit e fshatit Sellcë është ndërtuar në vitin 1952 dhe prej atëherë disa herë janë bërë renovime të vogla. Ndryshe, kjo shkollë ka edhe dy shkolla periferike – një në Llacë dhe një në Vicë, ku mësojnë 576 nxënës dhe ka një kuadër prej 54 personave. Në shkollën qendrore të këtij fshati mësojnë 365 nxënës. Për objektet e reja shkollore në Reçicë dhe në Sellcë gjithnjë janë dhënë premtime se do të fillojnë të ndërtohen, por konkretisht nuk është bërë asgjë. (koha.mk)

Hotelierët nga Ohri do të ngrenë padi kundër institucioneve kompetente shtetërore nëse nuk merren urgjentisht masa për rregullimin e nivelit të Liqenit të Ohrit, i cili aktualisht arrin 18 centimetra mbi maksimumin. Ata thonë se në prag të sezonit turistik, po përballen me probleme dhe rrezikun e përmbytjeve të objekteve që ndodhen në bregun e liqenit.

Jo vetëm të ngremë padi penale. Këtë që po e themi është e njohur për ata që janë përgjegjës me ligj për të menaxhuar Liqenin e Ohrit. Por, ne nuk mund t’i durojmë pasojat e ndonjë mendimi të pamatur dhe fitimprurës të ndonjë kompanie, qoftë shtetërore ose private -tha Dimitar Zarçev, hotelier.

I gjithë bregu ka pësuar një ndryshim të plotë. Kanë ndryshuar shumë plazhet që ishin ndërtime të forta – u shpreh Mihail Mishev, kryetarë i Shoqatës së hotelerisë në Ohër.

Nga ELEM thonë për Alsat M se së shpejti niveli do të fillojë të kthehet në normalitet.

Jemi të vetëdijshëm për situatën me nivelin e liqenit të Ohrit. Ne po ndërmarrim të gjitha masat për të ulur nivelin – njoftojnë nga ELEM.

Nga ELEM vlerësojnë se për një muaj, respektivisht përpara fillimit të sezonit turistik, liqeni do të jetë në nivelin e lejuar. Përndryshe, vlerësimet fillestare të dëmeve nga të dy stuhitë në mars dhe prill janë rreth gjysmë milioni euro.