Të shtëna në aktivitetin e Trumpit, nuk ka të lënduar
Të shtëna u dëgjuan të shtunën mbrëma në darkën e Shoqatës së Korrespondentëve të Shtëpisë së Bardhë, duke bërë që agjentët e Shërbimit Sekret ta evakuonin Presidentin Trump nga salla e Washington Hilton — dhe duke shtuar kështu edhe një rast tjetër në listën e rreziqeve të afërta me të cilat nuk është përballur asnjë president modern.
Pamja e përgjithshme: Kërcënimi i së shtunës është më i fundit në një model të dokumentuar që daton që nga fushata e parë presidenciale e Trumpit. Dosja përfshin sulmues të vetmuar me armë në tubimet e tij, komplote vrasjeje me pagesë të mbështetura nga shteti iranian dhe shkelje të përsëritura të sigurisë.
Më e fundit: Pak hollësi kanë dalë deri tani për të shtënat e së shtunës mbrëma, përfshirë edhe nëse presidenti ishte apo jo shënjestra e synuar.
Të shtënat ndodhën rreth orës 20:30 sipas kohës lindore amerikane, në Washington Hilton, ku po mbahej darka. Trump ishte planifikuar të mbante fjalim në këtë ngjarje, ndërsa të pranishëm ishin edhe zëvendëspresidenti Vance, disa anëtarë të kabinetit të Trumpit dhe ligjvënës të Kongresit.
“Kjo nuk është hera e parë në dy vitet e fundit që republika jonë është sulmuar nga një atentator i mundshëm,” u tha Trump gazetarëve pas të shtënave.
Përmbledhje e shpejtë: Trump u ka mbijetuar dy atentateve të mëparshme, të dyja gjatë fushatës së tij të vitit 2024. Të dyja rastet zbuluan dështime të Shërbimit Sekret, të cilat nxitën hetime dhe spastrime në udhëheqjen e agjencisë.
Butler, Pensilvani: Thomas Matthew Crooks, 20 vjeç, qëlloi në një tubim të Trumpit me atë që FBI e quajti “pushkë e stilit AR, kalibër 5.56”. Ai e plagosi lehtë Trumpin në veshin e djathtë, vrau një pjesëmarrës dhe më pas u vra nga një snajper i Shërbimit Sekret. Një raport i mëvonshëm i Senatit fajësoi planifikimin, komunikimin dhe udhëheqjen e Shërbimit Sekret.
West Palm Beach, Florida: Ryan Wesley Routh u pa me një pushkë në Trump International Golf Club, ndërsa Trump po luante golf në fushë. Një agjent i Shërbimit Sekret qëlloi ndaj Routhit, i cili u largua, por më pas u arrestua. Ai tani po vuan dënimin me burgim të përjetshëm.
Më në hollësi: Përtej këtyre atentateve, Trump është përballur edhe me një sërë komplotesh, kërcënimesh dhe dështimesh të sigurisë.
Qershor 2016: Një shtetas britanik 20-vjeçar tentoi t’i merrte armën një polici në një tubim të Trumpit në Las Vegas, duke u thënë më pas agjentëve se kishte synuar ta vriste Trumpin.
Shtator 2017: Një burrë vodhi një pirun-ngritës në Dakotën e Veriut dhe e drejtoi atë kah kortezhi presidencial, me planin për ta përmbysur limuzinën.
Shtator 2020: Një shtetas me dy nënshtetësi, franceze dhe kanadeze, i dërgoi Trumpit me postë një letër që përmbante ricinë vdekjeprurëse.
Korrik 2024: Një shtetas pakistanez u arrestua dhe më vonë u dënua për organizimin e një komploti vrasjeje me pagesë në emër të Korpusit të Gardës Revolucionare Islamike të Iranit, me qëllim vrasjen e Trumpit. Disa muaj më vonë, një iranian i akuzuar për tentativë vrasjeje ndaj një shtetasi tjetër amerikan tha se ishte udhëzuar gjithashtu të vriste Trumpin.
Shkurt 2026: Shërbimi Sekret vrau një 21-vjeçar që kishte sjellë një pushkë gjahu dhe një bombol gazi në Mar-a-Lago, ndërsa Trump ishte kthyer në Uashington.
Përfundimi: Trump e pranoi listën në rritje të kërcënimeve, por u tha gazetarëve se nuk ka ndërmend t’i kufizojë paraqitjet publike.
“Nuk do të lejojmë askënd të marrë kontrollin e shoqërisë sonë,” tha presidenti. “Nuk do t’i anulojmë gjërat, sepse nuk mund ta bëjmë këtë.”
