Transkripti i plotë i intervistës së deputetit Adnan Azizi për Ora24.tv

Mefo Ismaili: Të dashur miq të Ora 24.tv, përshëndetje! Jemi sërish në një podium ku besoj se sot do të kemi një nga intervistat më dinamike dhe më interesante, për shkak të zhvillimeve të fundit politike në vend. Kam nderin që të kemi mysafir përsëri Adnan Azizin, deputet të VLEN – mund ta quajmë edhe ish-shef i shtabit zgjedhor të Koalicionit VLEN. Përshëndetje!

Adnan Azizi: Përshëndetje të gjithëve! Si të doni, na quani. Unë jam këtu për të prezantuar VLEN-in dhe politikat e tij.

Mefo Ismaili: Ju tani jeni deputet, por konsideroheni si një nga figurat kyçe të VLEN-it. Prandaj, do t’ju pyes drejtpërdrejt: Çfarë po ndodh me VLEN-in? A po qeveris VLEN-i ashtu siç u premtoi qytetarëve?

Adnan Azizi: VLEN-i po shndërrohet në një projekt shumë të suksesshëm dhe në një subjekt të konsoliduar të shqiptarëve. Po shkojmë drejt finalizimit të procesit. Ne si Lëvizja BESA, që nga fillimi, kemi qenë të vendosur që të bëhet diçka tamam si duhet – me të gjitha mekanizmat dhe duke përfshirë të gjithë komponentët për të qenë një subjekt i suksesshëm, që i mbron kërkesat e shqiptarëve në mënyrë dinjitoze. Grupet e punës po punojnë vazhdimisht për statutin, programin dhe formën e organizimit. VLEN-i në të ardhmen, në menaxhimin e pushtetit lokal, është shembull – në të gjitha komunat që kemi menaxhuar. Edhe në pushtetin qendror po bëjmë hapa konkretë për zgjidhjen e çështjeve që BDI i kishte lënë pezull, të hapura ose fare nuk i kishtë prekur – përveçse me agitprop dhe propagandë politike gjatë periudhës së tyre 20-vjeçare.

Mefo Ismaili: Po të ndalemi pak te akuzat e opozitës dhe te bindja tek qytetarët se VLEN-i është i pafuqishëm dhe nuk ka fuqi të marrë vendime. Çfarë thoni?

Adnan Azizi: Kjo është propagandë e pastër. Gjatë gjithë periudhës që BDI ishte në pushtet, arriti vetëm të krijojë pasuri nëpërmjet bizneseve dhe tenderimeve të paligjshme, si dhe pazareve me partnerët e koalicionit, për të krijuar një rrjet propagande dhe për të mbuluar dështimet e veta. E kundërta është e vërteta: VLEN-i nuk ka toleruar asnjë skandal korruptiv, procese të montuara, aq më tepër të vriten apo të përçmohen shqiptarët. BDI, me gjithë atë bagazh të luftës së 2001-shit dhe votat që kishte, mund ta kushtëzonte partnerin e koalicionit. Por tani, pas ardhjes sonë në pushtet, po zbulohet se asnjë çështje të rëndësishme nuk e kanë përmbyllur gjatë asaj periudhe dydekadëshe. Fokusi i tyre ishte si të pasurohen, të rregullojnë familjarët e vet, të krijojnë perandori biznesi dhe të ndërtojnë kastën e oligarkëve për të mbijetuar sa më gjatë në politikë. Erdhi VLEN-i dhe i prishi këto matematika.

Mefo Ismaili: Si e komentoni qasjen e ministrit të Drejtësisë (nga radhët e VMRO-së) lidhur me zbatimin e ligjit për gjuhët dhe sidomos të ligjit për provimin e jurisprudencës? A jep ai të drejtë qytetarëve të mendojnë se VLEN-i ka pak pushtet në qeveri?

Adnan Azizi: Unë po flas me plot kompetencë dhe garanci: Çdo e drejtë e shqiptarëve do të realizohet në mandatin tonë. Nuk ka të drejtë që mund ta cenojë dikush, qoftë ai ministër Fillkov ose kushdo tjetër. Ne jemi në kërkim të zgjidhjes mbi baza ligjore, duke i rrumbullakuar çështjet me ligj dhe kushtetutë – jo si në të kaluarën, me vendime teknike apo politike. Sa herë që ndonjë ministër, për motive të ndryshme, konteston ose interpreton një ligj, ne po i mbyllim çështjet më të rëndësishme që të mos ketë hapësirë për interpretime të tjera. Drejtësia në Maqedoni çalon; ligjet janë konfuze – një nen të lejon një të drejtë, tjetri ta mohon. BDI-ja, kur ishte në pushtet, nuk i zgjidhi këto çështje dhe i interpretonte sipas dëshirës. Tani që është në opozitë, i konteston ato që i ka lënë vetë të kontestueshme. Ne po themi: Ashtu siç kemi demonstruar, buxheti për financimin e komunave u nda për herë të parë në mënyrë të barabartë për kokë banori – 83 milionë euro shkuan në komuna. Po ashtu, 40 milionë euro për kampusin “Nënë Tereza”, 70 milionë euro për spitalin e Tetovës, u ndanë mjete për kanalizimin në Zajaz – diçka që lideri historik i BDI-së nuk e bëri për 20 vjet. U rritën pagat në arsim, u rritën pensionet. Po realizojmë projektin strategjik për shqiptarët – Korridori 8, i cili për 12 vite kishte vetëm 2 kilometra të ndërtuara. Do të realizohet edhe rruga Shkup – Bllacë.

Mefo Ismaili: Po përçarjet brenda VLEN-it? Për dy vite në qeveri pati shpërbërje aleancash, largime të figurave, por edhe prurje të tjera. Çfarë e mban të bashkuar VLEN-in?

Adnan Azizi: Kjo kauzë e përbashkët – mbrojtja e interesave të shqiptarëve – na mban bashkë. Mund të ketë mendime të ndryshme, përplasje, por interesi i përgjithshëm gjithmonë do të dominojë brenda VLEN-it për të tejkaluar çështjet teknike apo të vogla. Jemi të fokusuar të ndërtojmë një subjekt që do të eliminojë edhe hatërmbetjet apo zënkat. Po shkojmë drejt finalizimit të këtij procesi për të bërë një subjekt funksional, të organizuar, më efikas në qeverisje, që do të mbrojë dhe luftojë për realizimin e të drejtave të shqiptarëve.

Mefo Ismaili: Një nga arsyet e mospëlqimit të VLEN-it nga qytetarët është se nuk kanë kujt t’i drejtohen – shkojnë te njëri, ai i drejton te tjetri. A do ta zgjidhë këtë problem Kongresi i 9 Majit?

Adnan Azizi: Po, është caktuar data 9 Maj, ku do të mbahet Kongresi i parë themelues. Ky do të jetë fundi i polemikave dhe fillimi i asaj si duhet. Tani janë hekurosur të gjitha dilemat. Ka një marrëveshje për udhëheqjen e VLEN-it: do të jetë me bashkëkryetarë, me nënshkrime dhe kompetenca të barabarta; do të ketë një sekretar gjeneral dhe dy nënkryetarë, si dhe sekretariati që do të përmbushin strukturën organizative. Pas Kongresit do të niset themelimi i degëve të VLEN-it. Nuk na shpejtohet, jemi në proces të mbarë.

Mefo Ismaili: Si e komentoni paraqitjen e Fatmir Limanit së bashku me kreun e BDI-së, Ali Ahmetin?

Adnan Azizi: Unë kam pasur vetëm një kusht: asnjë takim, asnjë bashkëpunim me Ali Ahmetin. Në momentin që kuptoj se dikush nga krerët e Lëvizjes BESA ka kontakt me Ali Ahmetin, unë do të dal kundër dhe do të largohem nga Lëvizja BESA. Ky ndryshim prej 180 shkallësh nuk e di përse ka ndodhur. Unë nuk komunikoj më me Fatmirin. Këto lëvizje dhe komunikime me persona që kanë qenë oponentët tanë dhe kanë luftuar për ta dobësuar VLEN-in, do të çojnë drejt një vendimi konkret: Fatmir Limani nuk do të jetë pjesë e VLEN-it. Vendimin përfundimtar do ta japin organet kompetente. Nëse ato vlerësojnë se duhet të vijë frymë e re, një gjeneratë e re, më e shkolluar, më energjike dhe më e pakonsumuar, unë vetë jam i gatshëm t’ia lë vendin dikujt tjetër. Kjo nuk është tragjike. Meritat i tregojnë numrat në terren dhe proceset zgjedhore.

Mefo Ismaili: Çfarë po ndodh me Ansamblin Muzikor të Tetovës? A po shkohet drejt mbylljes?

Adnan Azizi: Kjo është në katalogun e BDI-së për shpifje, mashtrim dhe propagandë të rrejshme. Nëse dikush e ka lënë përgjysmë Ansamblin e Tetovës, kjo është pikërisht BDI-ja, e cila kishte 23 pëlqime për punësim dhe i la ato persona pa punësim, përveç dy personave të lidhur ngushtë me BDI-në. Ansambli nuk mbyllet, përkundrazi – do të punësohen. Aplikimet nga Ministria e Kulturës janë bërë dhe presim pëlqimin e Ministrisë së Financave. 100% nuk ka kush e mbyll ansamblin. Ministri ka treguar gjendjen faktike jo vetëm për ansamblin, por edhe për 10 institucione të tjera që nuk funksionojnë si duhet, sepse fokusi ka qenë te punësimet partiake e jo ato profesionale. Ideja e ministrit është që aty ku nuk ka administratë, të bashkohen administratat për të krijuar hapësirë për punësime profesionale dhe për politika kulturore emancipuese.

Mefo Ismaili: Si e komentoni punësimin e ish-kandidatit për kryetar komune, Haqim Ramadani, nga VLEN-i në Komunën e Çairit?

Adnan Azizi: Kjo është e dhimbshme – ky kontaminim që po bën BDI-ja. Aqim Ramadani është profesionist i furnizimeve publike me stazh të gjatë. Një person i tillë kompetent, ne e kemi lutur të vijë si kuadër profesionist edhe në Komunën e Tetovës, por ai zgjodhi Çairin. Tani, ndërsa BDI-ja i ka punësuar të gjithë familjarët e vet – bashkëshortet, nipat, motrat, tezet – nëpër institucione me rroga 1000–2000 euro dhe ka ndërtuar perandori të resorteve dhe qendrave tregtare, na qenka problem një njeri që ka mbaruar shkollë dhe merr një rrogë 1000 euro? Kjo është çoroditje.

Mefo Ismaili: Por ai ka kontrata edhe me komuna të tjera. Nuk është problem konflikti i interesit?

Adnan Azizi: Patjetër që krijon shërbime. Çështja e furnizimeve është problem në të gjitha institucionet; ka shumë pak kuadër të licencuar dhe profesional. Ne e kemi nevojë që të vijnë në komunat tona. Është normale që kryetari i LD-së udhëheq edhe me komunën, dhe një kuadër i tillë profesional ka kërkuar të japë shërbim. Nuk ka asgjë të keqe. Kjo lloj kampanje negative dhe propagandë e errët është sendi më i keq që po e imponon BDI-ja në shoqërinë shqiptare.

Mefo Ismaili: A është kjo një pikë e dobët e VLEN-it – mungesa e organizimit?

Adnan Azizi: Nëse ka diçka ku VLEN-i ia jep dorën BDI-së, është çështja e propagandës. Ata e kanë trashëgim nga xhaxha Enveri – atë propagandë të kuqe, ku çdo gjë e kundërshtarit është e keqe, ndërsa tradhtia dhe mashtrimi i tyre është diçka super e mirë. Kjo nuk është çështje momentale; buron nga formimi i tyre ideologjik.

Mefo Ismaili: Si qëndroni me punësimet dhe avancimet që ua premtuat qytetarëve? BDI-ja ka bërë 2500 punësime gjatë kohës sa ishte në pushtet.

Adnan Azizi: Ne kemi bërë punësime kryesisht në spitale – qindra specializantë, mjekë, motra medicinale – sepse shëndetësia është arsyeja kryesore pse qytetarët largohen nga Maqedonia. Kemi punësuar edhe në arsim dhe në sektorët prioritarë.

Mefo Ismaili: Ju dje kishit një postim për përdorimin e gjuhës shqipe në institucionet qendrore, me statistikë 0%. Pse?

Adnan Azizi: Postimi im ishte në drejtim të paraqitjeve në Parlament. Unë tregova me fakte, duke iu referuar gazetës zyrtare, se 100% po zbatohet gjuha shqipe në Parlament – për të demantuar gënjeshtrat në opinion. Ka momente kur përkthimi nuk është gati në komisione, por deputetët kanë ndërhyrë dhe materialet janë plotësuar. Kush ka manipuluar dhe ka shitur gjuhën shqipe më shumë se BDI-ja? Unë kam një material me zë – një deklaratë të Ali Ahmetit nga viti 2012, ku ai thotë se prioritet në atë mandat ka qenë amnestia, jo gjuha shqipe.

(Mefo Ismaili lëshon videon me Ali Ahmetin: “Prioritet në këtë mandat ka qenë çështja e amnestisë, sepse amnestia ka qenë një nga problemet që më ka preokupuar mua personalisht…”)

Adnan Azizi: Kjo është e korrikut 2012. BDI-ja ishte në mandatin e tretë, pas 10–11 vitesh pushtet. Ai e nis mandatin duke thënë se gjuha shqipe do të shtyhet, sepse ata kanë hallin e amnestisë dhe frikën nga Haga. Për të shpëtuar veten, sakrifikuan gjuhën shqipe. Unë jam marrë me zhvillimet që nga themelimi i BDI-së. E di që të gjitha bisedat e Aliut me tajfën e vet ishin: “Kemi problem me Hagën, dikush mund të shkojë atje”. Lufta e UÇK-së u reduktua në luftë për të drejtat e shqiptarëve, e cila duhej të përmbyllej deri në 2004. Por ja ku jemi në 2026, 22 vjet më vonë, dhe çështja e gjuhës, e përfaqësimit, e të gjitha gjërave, ende nuk janë zgjidhur.

Mefo Ismaili: Pas Kongresit të 9 Majit, sa kohë do të duhet që gjuha shqipe të mos jetë më çështje e kontestuar, sidomos në ligjin e jurisprudencës?

Adnan Azizi: Ligji për provimin e jurisprudencës – dhe këtu përgjigjem edhe qytetarëve: Kur BDI-ja thotë se gjuha shqipe po cenohet, ne themi: “22 vjet nuk pati ligj, e sollët ligjin në 2019, por patët 4 vjet kohë për ta implementuar. Pse nuk e bëtë?” Tani që janë në opozitë, u shfaq nevoja. Ne jemi takuar me studentët dhe u kemi premtuar se këtë çështje do ta zgjidhim me ligj. Studentët e kanë falënderuar VLEN-in. Komisionet e punës po punojnë dhe çështja do të rrumbullakësohet shumë shpejt. Nuk dua të jap afate konkrete, por punohet intensivisht. Po ashtu, ligji për përfaqësim të drejtë dhe adekuat ka kaluar në Qeveri, po shkon në Komisionin e Venecias dhe pastaj në Kuvend. Këtë po e bëjmë me ligj, jo me vendime teknike. Ashtu si e zgjidhëm çështjen e medresesë, ashtu do të zgjidhet edhe çështja e provimit të jurisprudencës.

Mefo Ismaili: Studentët kanë paralajmëruar protesta të reja. A do të mund t’i bindni të mos dalin?

Adnan Azizi: Unë vetë kam marrë pjesë në protesta për ajrin, për Jugokromin, për Smillkovcin, për montimet politike, për Alfën, për Almirin e vogël – për të gjitha padrejtësitë që u janë bërë shqiptarëve. Por atëherë nuk kishim studentë që të prinim protesta. Jam i lumtur që studentët po organizohen, pavarësisht se ka dorë politika. Ne kemi qenë të qartë: këtë çështje do ta zgjidhim. Nëse ata kanë agjendë tjetër politike, edhe pas zgjidhjes do të gjejnë një alibi tjetër për të protestuar. Është e drejta e tyre. Një nga të mirat e VLEN-it është se më në fund, pas 22 vitesh, studentët protestojnë. Por kur, para 10 vitesh, një kandidat jo i BDI-së për union studentësh u mbyll në bodrum dhe u rrah, nuk pati asnjë protestë studentore. Tani universitetet tona janë në fund të listës së Shangait, nuk figurojnë fare. Ne po bëjmë përpjekje për të vënë në plan të parë interesin e studentëve dhe zhvillimin cilësor të arsimit. Dje dolën rektorët dhe e mbështetën ligjin. Kush është ai lider që thotë se ligji diskriminon shqiptarët, kur të gjithë rektorët e kanë mbështetur?

Mefo Ismaili: Tek ligji për përfaqësim të drejtë – u hoq balancuesi. Si do t’i komentoni akuzat e opozitës se shqiptarët nuk do të jenë të përfaqësuar denjësisht?

Adnan Azizi: Ligji për përfaqësim të drejtë dhe adekuat është një ndër arritjet më të mëdha të VLEN-it. Ai instalon një të drejtë për të mos keqpërdorur përfaqësimin e shqiptarëve në punësime dhe avancime. Ky ligj është kategori kushtetuese, jo mekanizëm teknik. Parashikon zbatueshmërinë nën udhëheqjen e zëvendëskryeministrit të parë. Në të kaluarën, balancuesi u shfuqizua për shkak të manipulimeve – pjesëtarë të nacionaliteteve të tjera ndërronin përkatësinë identitare për të marrë të drejtën në emër të një komuniteti tjetër. Tani kjo nuk do të mundet: identiteti do të shihet nga regjistrimi, përkatësia etnike, gjuha dhe alfabeti (latin për shqiptarët, cirilik për maqedonasit). Një i komunitetit tjetër nuk mund të deklarohet si shqiptar për të zënë vendin e shqiptarëve.

Mefo Ismaili: A duhet të kemi një ligj për cilësinë në punësim, për të shmangur punësimet partiake dhe joadekuate?

Adnan Azizi: Ligji për përfaqësim të drejtë nuk e eliminon meritokracinë dhe kualifikimin. Ato duhet të shkojnë paralelisht. Në rast se nuk shkojnë paralelisht, atëherë nuk ia kemi arritur qëllimit – do të kemi vetëm përfaqësim kuantitativ dhe nuk do të ngremë nivelin e administratës dhe institucioneve. Janë kompatibile, nuk janë në disproporcion njëri me tjetrin.

Mefo Ismaili: Çfarë po ndodh me Korridorin 8? A është i realizueshëm, duke pasur parasysh problemet me UNESCO-n dhe Qafë Thanën?

Adnan Azizi: Korridori 8 po punohet intensivisht. Për dy vjet ne kemi bërë 10 herë më shumë se sa BDI-ja për 12 vjet. Mbi 70 kilometra janë inauguruar. Korridori 8 do të lidhë Strugën, Maqedoninë me Shqipërinë nëpërmjet Qafë Thanës. Mund të ketë devijime të vogla të trasës, por propaganda e BDI-së se nuk do të bëhet është e pavërtetë. Doli kryeministri, doli qeveria dhe e konfirmuan. Ka një çështje teknike me UNESCO-n, por do të merret mendimi dhe do të gjendet zgjidhja. Të vetmit që nuk e duan këtë korridor janë Vuçiç dhe aleatët e tij në Maqedoni – që është BDI-ja.

Mefo Ismaili: Për rrugën Shkup – Bllacë kanë mbetur 2 kilometrat e fundit. Keni informacion se kur do të përfundojë?

Adnan Azizi: Edhe rruga Shkup – Bllacë do të bëhet, edhe Korridori 8 do të realizohet.

Mefo Ismaili: Z. Bajrami nga BDI-ja ju akuzoi se nuk keni njohuri dhe se komuna nuk mund ta financojë një projekt të tillë si rruga Tetovë – Prizren, por duhet pushteti qendror.

Adnan Azizi: Personit në fjalë nuk duhet t’i përgjigjem, sepse ai për 22 vjet në krye të BDI-së nuk arriti të asfaltojë rrugën e fshatit të tij. Erdhi VLEN-i, erdhi Bilalli dhe ia bëri rrugën dhe shkollën. Rruga Tetovë – Prizren ka dy komponentë: tuneli (projekt i qeverive) dhe trasa deri te tuneli (për të cilën komuna po përgatitet dhe do të nisë punimet këto ditë). Tuneli është projekt milionësh dhe është pjesë e negociatave. Unë kam qenë aty dhe vazhdimisht e kam potencuar këtë rrugë si projekt strategjik.

Mefo Ismaili: Dy figura opozitare, Arben Taravari dhe Bajram Rexhepi, kanë dhënë akuza të ashpra ndaj jush. Të dëgjojmë njërën prej tyre: “Adnan Azizi është duke bërë lojën e Izet Mexhitit. Ai është i paskrupullt, lojtari më i fuqishëm i VLEN-it, por nuk ka lidhje me Korridorin 8 – asnjë minutë të jetës së tij nuk e ka humbur për ta ndihmuar atë punë. Propagandë pa lidhje, gënjeshtra.”

Adnan Azizi: Unë e kuptoj frustrimin e Bajram Rexhepit pas humbjes katastrofale në Tetovë, me 5500 vota diferencë. Unë kam qenë kryetar i shtabit zgjedhor të VLEN-it. Taravari pretendonte se do të fitonin 2 me 1, 3 me 1, por ne e mundëm BDI-në dhe i lamë me dy komuna nëpër fshatra. Sa i përket fjalorit ofendues, ata janë të dëshpëruar sepse e kanë humbur pushtetin dhe komoditetin e tenderave dhe pasurisë. Arben Taravari është pastër një pazarxhi, një tezgaxhi. Unë do të zbuloj një ekskluzivitet: Në momentin kur u dakordua koalicioni i VLEN-it me Aleancën për Shqiptarë, Taravari ishte në takim me Ali Ahmetin. Përfaqësuesit e AS-së na thanë: “Arbeni është duke takuar Ali Ahmetin. Nëse nuk na jepni 5 deputetë të sigurt, ai shkon me BDI-në.” Ata erdhën me shantazh! Unë isha kundër, por Bilalli dhe Izeti thanë se interesi më i madh ishte shpartallimi i BDI-së, dhe për këtë pranuam të jepnim 5 vende. Tani ai që ka qenë më servili ndaj Mickovskit dhe VMRO-së, që e solli për herë të parë në Gostivar në pushtet, akuzon VLEN-in se është vazal i VMRO-së. Ai nuk ka ngritur kurrë asnjë çështje kombëtare. E vetmja kërkesë e tij te kryeministri ishte: “Largo VLEN-in, eja BDI-ja në vend të VLEN-it.”

Mefo Ismaili: A jeni vërtet më i fuqishmi në VLEN, siç thotë Taravari?

Adnan Azizi: Unë nuk vuaj nga egocentrizmi dhe protagonizmi. Jam lojtar ekipi. Ekipet e suksesshme janë ato që bëjnë lojë kolektive. Këtë luftë nuk do të kisha mundur ta bëja pa liderët e tjerë të VLEN-it – Bilallin, Izetin, Zekën, Arbentin. Brenda VLEN-it ka debate normale, mosdakordime, por procesi po shkon drejt zgjidhjes. Jemi të interesuar të ndërtojmë një VLEN të fuqishëm, të konsoliduar, të organizuar. Shqiptarët na dhanë mbështetjen e tyre.

Mefo Ismaili: Nëse shkelen të drejtat e shqiptarëve, a do të dalë VLEN-i nga qeveria?

Adnan Azizi: Kur cënohen të drejtat e shqiptarëve, VLEN-i nuk do të vazhdojë në qeveri. Po them këtë me plot përgjegjësi.

Mefo Ismaili: Keni pasur tentime nga partitë opozitare për të hyrë në qeveri? Për shembull, nga BDI-ja, Zëri i Popullit, etj.?

Adnan Azizi: Ne komunikojmë me deputetë të tjerë. Por unë jam idhtar i funksionimit të kësaj ideje, jo i riciklimit të politikanëve të dështuar, veçanërisht të lidershipit që na solli në këtë situatë. Njerëz të pakorruptuar dhe të pakomprometuar janë të mirëseardhur. Por nuk dua të përmend emra konkretë, sepse ata janë të prirur t’i demantojnë. BDI-ja ka ndejur deri në tre të natës për të votuar qeverinë, me shpresë se një ditë do të kthehen, dhe i ka gënjyer anëtarët e vet se qeveria do të prishet pas dy muajsh.

Mefo Ismaili: Pyetja e fundit: Në rekonstruimin e qeverisë që pritet në maj/qershor, cili ministër shqiptar nuk duhet të jetë më pjesë e qeverisë?

Adnan Azizi: Të gjithë ata që nuk e kanë përmbushur detyrën dhe obligimin për të realizuar aspiratat e shqiptarëve do të jenë pjesë e ndryshimeve. Kjo vlen jo vetëm për ministrat, por edhe për zëvendësministrat, sekretarët e shtetit, etj. Ne vazhdimisht kemi ndryshime në eshalonin e dytë dhe të tretë. Ministrat nuk janë të paprekshëm.

Mefo Ismaili: Z. Azizi, ju falenderoj për kohën dhe për bisedën e frytshme. Shpresoj se edhe shikuesit tanë mbetën të kënaqur.

Adnan Azizi: Faleminderit! Ishte kënaqësi.

Mefo Ismaili: Ndërsa ju, shikues të nderuar, ju falenderoj që na ndoqët dhe shihemi në podiumin e radhës në Ora 24.tv./Intervistën e transkriptoi Tetova News