Tri aksidente tragjike kanë ndodhur të hënën, më 18 maj 2026, në rrugët e Kosovës, duke lënë tre persona të vdekur dhe 11 të lënduar.
Aksidenti i parë fatal ndodhi rreth orës 04:55 në fshatin Dollc të Klinës. Një veturë, në të cilën ndodheshin pesë anëtarë të një familjeje, ra në një gropë të hapur gjatë punimeve në rrugë. Shoferi vdiq në vendin e ngjarjes, ndërsa katër pasagjerët u dërguan për trajtim në Spitalin Rajonal të Pejës. Sipas mjekëve, gjendja e tyre është stabile dhe jashtë rrezikut për jetë. Policia po e trajton rastin si vetaksident.
Aksidenti i dytë me fatalitet ndodhi rreth orës 11:50 në rrugën nacionale Mitrovicë–Prishtinë, në fshatin Doberllukë të Vushtrrisë. Një 74-vjeçar, i cili kishte pësuar lëndime të rënda, ndërroi jetë rreth orës 14:00 në QKUK. Me urdhër të prokurorit, trupi i pajetë u dërgua për obduksion në Institutin e Mjekësisë Ligjore.
Rreth 20 minuta më vonë, në orën 12:15, një tjetër aksident fatal ndodhi në fshatin Koshare të Ferizajt, ku u përfshinë dy vetura me targa vendore. Si pasojë, humbi jetën një burrë 60-vjeçar, vdekja e të cilit u konfirmua në vendin e ngjarjes nga ekipi mjekësor. Dy persona të tjerë pësuan lëndime të lehta.
Hetimet për të tria rastet po vazhdojnë.
Driton Haliti, 43-vjeçar, vdiq sot në fshatin Dollc të Klinës, vendin ku shkaktoi një vetaksident me veturë.
Si pasojë e plagëve të marra nga përplasja e veturës, Haliti vdiq në vendin e ngjarjes sot rreth orës 05:00 të mëngjesit.
Vdekjen e 43-vjeçarit e konstatoi një ekip mjekësor që iu përgjigj thirrjes për intervenim në aksident, bëri të ditur Policia e Kosovës në një njoftim për media.
