OpenAI njoftoi të mërkurën se deri në vitin 2030 do të shpenzojë 750 miliardë dollarë për infrastrukturë, rreth 25 për qind më shumë se parashikimi i bërë në fillim të këtij viti, raportoi “The Wall Street Journal”. Vala e re e investimeve vjen në një kohë kur projekti i qendrave të të dhënave Stargate duket se ka ngecur.
Hapi i parë në këtë ofensivë të madhe investimesh do të jetë ndërtimi i një kompleksi qendrash të të dhënave me vlerë 20 miliardë dollarë në Xhorxhia, i njohur si “Project Camellia”. Kompleksi do të shtrihet në rreth 1.400 hektarë në veriperëndim të Savannah-s dhe do të furnizohet me të paktën 3,2 gigavat energji elektrike nga Georgia Power, kompania energjetike e rajonit. Kapaciteti i nevojshëm prodhues pritet të vihet në dispozicion ndërmjet viteve 2028 dhe 2032.
Kompania e inteligjencës artificiale deklaroi se do të “mbulojë të gjithë koston e infrastrukturës dhe të shërbimeve të furnizimit me energji elektrike” për qendrën e re të të dhënave. Komisioni i Shërbimeve Publike i Xhorxhias, PSC, miratoi vitin e kaluar një rregull që synon të parandalojë kompanitë energjetike t’ua kalojnë konsumatorëve kostot që lidhen me përdorues të rinj, të cilët kërkojnë më shumë se 100 megavat energji.
Georgia Power deklaroi gjithashtu se OpenAI do ta ulë konsumin e energjisë deri në 1 gigavat gjatë periudhave kur kërkesa në rrjet është e lartë.
Sipas gazetës “Effingham Herald”, OpenAI ka përfituar nga Qarku Effingham një ulje prej 50 për qind të tatimit mbi pronën për një periudhë 15-vjeçare.
As OpenAI dhe as Georgia Power nuk kanë bërë të ditur se me çfarë burimesh energjetike do të furnizohet “Project Camellia”. TechCrunch u kërkoi të dyja kompanive hollësi, por nuk mori menjëherë përgjigje.
Dokumentet rregullatore mund të japin disa të dhëna. Në dhjetor, Georgia Power mori miratimin e PSC-së për të prodhuar edhe 9.885 megavat energji shtesë. Kompania i deklaroi komisionit se pret që i gjithë ky kapacitet të jetë kontraktuar deri në fund të vitit 2026. Marrëveshja me OpenAI përbën rreth një të tretën e tij.
Bazuar në dokumentet që Georgia Power ka dorëzuar në PSC, pjesa më e madhe e kapacitetit të ri do të sigurohet nga gazi natyror. Kompania tha se do të ndërtojë ose do të blejë nga palë të treta rreth 5,8 gigavat kapacitet prodhues me gaz natyror. Rreth një e katërta e këtij kapaciteti do të vijë nga turbina me cikël të thjeshtë, të cilat shkaktojnë më shumë ndotje.
Në tërësi, kapaciteti i ri me lëndë djegëse fosile do ta dyfishojë më shumë se dy herë flotën e centraleve me gaz natyror të Georgia Power. Pjesa tjetër e energjisë do të sigurohet nga bateritë e mëdha të lidhura me rrjetin dhe nga energjia diellore.
Megjithëse furnizimi me energji elektrike nga Georgia Power pritet të fillojë në vitin 2028, OpenAI nuk dha një afat se kur do të aktivizohet njësia e parë grafike, GPU. Kjo mund të ndodhë edhe para vitit 2028, duke pasur parasysh se OpenAI së fundmi punësoi Brett Mayo-n për të drejtuar ndërtimin e qendrave të të dhënave.
Mayo më parë ka punuar në xAI, ku ka mbikëqyrur ndërtimin e qendrës së të dhënave Colossus në Memphis.
Colossus u ndërtua në një kohë rekord, por dyshohet se ka ndikuar negativisht në cilësinë e ajrit në zonë, sipas një padie të ngritur nga organizata NAACP dhe Southern Environmental Law Center.
Qendra e të dhënave e xAI-t ka përdorur dhjetëra turbina me gaz natyror pa lejet përkatëse, duke pretenduar se përjashtohet nga rregulloret federale për ajrin e pastër./TN
