Për shkak të thithjes së tymit, D.A. (65) dhe vajza e saj S.D. (39) janë dërguar në Kompleksin e Klinikave “Nënë Tereza” në Shkup për trajtim mjekësor.
Dy gra nga Shtipi janë lënduar pas një zjarri që shpërtheu në një oxhak në një banesë në rrugën “9 Maji”, ku u asfiksuan nga tymi dhe u transportuan për mjekim në Shkup. Zjarri ka ndodhur herët në mëngjes, rreth orës 06:00, në një banesë në pronësi të S.A. (41). Si pasojë e thithjes së tymit, nëna e tij D.A. (65) dhe motra S.D. (39) janë dërguar në Kompleksin e Klinikave “Nënë Tereza” për ndihmë mjekësore.
Flakët kanë përfshirë edhe një banesë fqinje, në pronësi të një 61-vjeçari nga Shtipi. Zjarri është lokalizuar nga ekipet e Njësisë Territoriale të Zjarrfikësve të Shtipit. Për rastin është njoftuar prokurori publik dhe është kryer këqyrja në vendngjarje.
Disa orë më vonë, rreth orës 18:30, në një ndërtesë banimi në bulevardin “APJ (JNA)” në Shtip është raportuar edhe një tjetër zjarr në oxhak, i cili është përhapur nëpër banesa nga kati i parë deri në të pestin. Në këtë rast nuk ka persona të lënduar, ndërsa zjarri është shuar plotësisht nga zjarrfikësit. Edhe për këtë ngjarje, ekipet e SPB Shtip kanë kryer këqyrje./TetovaNews
