Ballina Kronika 37 lajmet e fundit nga kronika e zezë e fundjavës në Kosovë

37 lajmet e fundit nga kronika e zezë e fundjavës në Kosovë

SHKURT:

U kthye në banesë dhe dera nuk hapej – një ditë më vonë gjen shtëpinë e demoluar dhe 10 mijë euro të zhdukura në Ferizaj
Në Ferizaj, në rrugën “Cen Dugolli”, një 26-vjeçar raportoi se persona të panjohur kishin hyrë në banesën e tij, e kishin demoluar dhe kishin marrë stoli ari e para të gatshme në vlerë rreth 10 mijë euro. Rasti është iniciuar si “Vjedhje e rëndë”.
Grinder, rizlla dhe marihuanë – dy të rinj ndalohen nga Policia në Skenderaj
Në Skenderaj, në rrugën “Shaban Jashari”, Policia kontrolloi një veturë të ndalur dhe te dy të rinj gjeti grinder, rizlla dhe substancë të dyshuar narkotike. Të dy u intervistuan dhe u liruan në procedurë të rregullt.
Kapet me armë në brez në Koshutovë – 23-vjeçari përfundon në ndalim
Në fshatin Koshutovë të Leposaviçit, njësitë speciale ndaluan Rion Begiqin, te i cili u gjet një pistoletë me katër fishekë 9 mm pa leje. Ai u ndalua për 48 orë.
“Kam me ju vra krejt” – 17-vjeçari sulmon policët pasi iu konfiskua kamioneta me dru në Istog
Në Istog, një i mitur kërcënoi policët dhe dyshohet se sulmoi fizikisht njërin prej tyre pasi iu konfiskua kamioneta me dru pa dokumentacion. Ai u ndalua për 24 orë.
74-vjeçari i dha fund jetës para syve të motrave në Shtërpcë – përdori revolen derisa ato po pastronin dhomën
Në Biti të Epërme të Shtërpcës, Faik Bakiu, 74 vjeç, dyshohet se i dha fund jetës me revole në shtëpinë e tij. Trupi u dërgua për autopsi, ndërsa arma dhe fishekët u sekuestruan.
Ky është 30-vjeçari që u arrestua në Gjakovë me urdhër-arrest ndërkombëtar nga Interpol Tirana
Në Gjakovë u arrestua Hil Meme, i kërkuar me urdhër-arrest ndërkombëtar nga Interpol Tirana. Ai u ndalua për 48 orë për procedura të mëtejshme.
26-vjeçarja dyshohet se tentoi t’i japë fund jetës me skalper në Novobërdë
Në fshatin Pasjak të Novobërdës, një 26-vjeçare u gjet me shenja jete pas dyshimeve për tentim vetëvrasjeje me skalper. Gjendja e saj u raportua stabile dhe u dërgua në QKUK.
Vetëm një aktakuzë për manipulimin e votave të 28 dhjetorit 2025
Për dyshimet për manipulim votash në zgjedhjet e 28 dhjetorit 2025 janë intervistuar së paku 700 persona, por deri tani është ngritur vetëm një aktakuzë ndaj katër personave nga Prokuroria e Ferizajt.
Dy vëllezër humbin jetën brenda pak orësh në Pejë – njëri nga aksidenti në trafik, tjetri nga sëmundja
Në Pejë humbën jetën brenda pak orësh dy vëllezër, Gazmend dhe Bashkim Maloku; njëri pas një aksidenti, ndërsa tjetri pas gjendjes së rënduar shëndetësore.
Tre arinj futen në oborrin e një shtëpie në Hoçë të Prizrenit
Në Hoçë të Prizrenit, tre arinj u futën në oborrin e një shtëpie, duke shqetësuar banorët. Sipas banorëve, raste të ngjashme janë parë edhe më herët.
Vdes në QKUK personi i aksidentuar me motoçikletë në Pejë
Një person i aksidentuar më 3 maj me motoçikletë në Pejë vdiq në QKUK rreth një javë më vonë si pasojë e plagëve. Trupi u dërgua për obduksion.
Zvarriti për flokësh gruan në Obiliq – 23-vjeçari përfundon në ndalim
Në Plemetin të Obiliqit, një 28-vjeçare denoncoi bashkëshortin 23-vjeçar se e kishte zvarritur për flokësh. Ai dyshohej se ishte nën ndikim të alkoolit dhe u ndalua për 48 orë.
Kapet me pistoletë në brez dhe brisk gjatë kontrollit në Prizren – 22-vjeçari përfundon në ndalim
Në Prizren, te Valerjan Berisha u gjetën një pistoletë M-57, karikator, tetë fishekë dhe një brisk. Ai u ndalua për 48 orë për armëmbajtje pa autorizim.
“Mos e merr veturën” – eskalon konflikti mes vëllezërve në Prishtinë, 29-vjeçari përfundon në ndalim
Në Prishtinë, një konflikt mes vëllezërve eskaloi pasi njëri nuk e lejoi tjetrin ta merrte veturën. Rasti u cilësua si dhunë në familje dhe 29-vjeçari u ndalua për 48 orë.
Sherr mes vëllezërve për pronë në Mitrovicë – gruaja përfundon në spital pasi hyri t’i ndajë
Në Mitrovicë, dy vëllezër u përleshën për pronë, ndërsa gruaja e njërit u lëndua duke tentuar t’i ndajë. Dy vëllezërit u ndaluan për 48 orë.
“Pinte dhe më ofendonte vazhdimisht” – burri arrestohet në Gjakovë pas denoncimit nga bashkëshortja
Në Gjakovë, një grua denoncoi bashkëshortin për ofendime të vazhdueshme dhe dhunë psikike. Ai rezultoi me 2.02 promilë alkool dhe u ndalua për 48 orë.
Apel për ndihmë | Ky është 38-vjeçari nga Gjakova që u zhduk pasi paralajmëroi se kishte marrë “hapa qetësimi”
Në Gjakovë u raportua i zhdukur Altin Bicurrin, 38 vjeç, pasi kishte njoftuar familjen se kishte marrë “hapa qetësimi” dhe kishte lënë shënim në rrjete sociale.
Po rrinte në lokalin “Toks” në rrugën C – arrestohet 33-vjeçari i kërkuar me urdhër-arrest për vuajtje dënimi me burgim
Në Prishtinë, në lokalin “Toks”, u arrestua Egzon Abazi, i kërkuar me urdhër-arrest aktiv. Ai u dërgua në Hajvali për vuajtjen e një viti burgim.
Pa mesazhet me një vajzë tjetër, gruaja i hyn me shuplaka burrit në Prishtinë
Në Prishtinë, një grua dyshohet se goditi me shuplaka bashkëshortin pasi pa në telefonin e tij mesazhe me një vajzë tjetër. Rasti u iniciua si dhunë në familje, ndërsa ajo u lirua në procedurë të rregullt.
“Më godiste vazhdimisht” – 22-vjeçarja nga Peja denoncon burrin për dhunë fizike dhe psikike
Në Pejë, një 22-vjeçare denoncoi bashkëshortin për dhunë të vazhdueshme fizike dhe psikike, përfshirë goditje me grushte e shuplaka. Hetimet vazhdojnë.
“Më jep para për drogë” – 32-vjeçari rrah babanë me shkop në Pejë, pastaj sulmon edhe Policinë në stacion
Në Pejë, Kastriot Grapci dyshohet se rrahu babanë me shuplaka e shkop pasi i kërkoi para për drogë, shkeli urdhrin mbrojtës dhe më pas sulmoi një polic. U ndalua për 48 orë.
Zhduket kasaforta me armë brenda në Viti – pronari kishte lënë derën e shtëpisë pa çelës
Në Ballancë të Vitisë, persona të panjohur vodhën një kasafortë ku ndodhej një armë “Tisas Zig 14”, dy karikatorë dhe 12 fishekë. Rasti u iniciua si vjedhje e rëndë.
50 aksidente brenda 24 orëve në Kosovë, mbi 1 mijë gjoba trafiku
Në Kosovë, brenda 24 orëve u regjistruan 50 aksidente trafiku, prej tyre 21 me të lënduar. Policia shqiptoi 1,829 gjoba, arrestoi 33 persona dhe 19 i dërgoi në mbajtje.
Pistoletë “Sig Sauer”, 3 karikatorë e 46 fishekë – çka gjeti Policia gjatë bastisjes tek Liridon Restelica
Në Çagllavicë, gjatë një kontrolli në shtëpinë e Liridon Restelicës u sekuestruan një pistoletë “Sig Sauer P320”, tre karikatorë dhe 46 fishekë. Rasti u iniciua për armëmbajtje pa autorizim.
U ndal në Aeroportin “Adem Jashari” – 31-vjeçari përfundon në burg për një gjobë 200 euro
Në Aeroportin “Adem Jashari”, Leonard Sylejmani u ndalua për një urdhër-arrest aktiv pasi një gjobë prej 200 eurosh i ishte shndërruar në 10 ditë burgim.
Ky është i dyshuari që bëri kaos në Emergjencën e QKUK-së dhe kafshoi policin gjatë arrestimit
Në Emergjencën e QKUK-së, Valon Murtezi dyshohet se u bë agresiv ndaj stafit mjekësor dhe gjatë arrestimit sulmoi dy policë, njërin duke e kafshuar në dorë. Rasti po hetohet si sulm ndaj personit zyrtar.
Aksion i madh në Burgun e Dubravës, bastisen të gjitha dhomat e të burgosurve
Në Burgun e Dubravës u zhvillua një bastisje e gjerë në dhoma, hapësira të përbashkëta dhe ambiente të jashtme. Nuk u gjetën sende të kundërligjshme, por u larguan sende të tepërta.
Hetuesit antidrogë e përcollën deri në lokal – 23-vjeçarit në Viti i gjenden 10 qese me marihuanë
Në Viti, hetuesit antidrogë ndaluan Hetem Gashin pas vëzhgimit dhe i gjetën 10 qese me marihuanë dhe një cigare me marihuanë, gjithsej 5.92 gramë. Ai u lirua në procedurë të rregullt.
Skenë e rëndë në Pejë: 18-vjeçarja tërhiqet zvarrë drejt kamionit nga burri i saj, Policia ndërhyn në momentet kritike
Në Pejë, një 18-vjeçare dyshohet se u kap për flokësh dhe u tërhoq drejt kamionit nga bashkëshorti. Policia ndërhyri, viktima kërkoi strehim, ndërsa i dyshuari u ndalua për 48 orë.
Ia vodhën kamionetën gjatë natës në Mitrovicë – e gjen përmes rrjeteve sociale, por të demoluar
Në Mitrovicë, një qytetari iu vodh kamioneta VW gjatë natës. Ai u njoftua përmes rrjeteve sociale për vendndodhjen e saj dhe Policia e gjeti me dëme të mëdha materiale.
Vrau një qen endacak me armë gjahu në Kaçanik – Policia ia sekuestron pushkën
Në Begracë të Kaçanikut, Arif Luzha dyshohet se vrau një qen endacak me armë gjahu. Policia sekuestroi pushkën “qifte”, 11 fishekë dhe dy gëzhoja; ai u lirua në procedurë të rregullt.
Punëtori bie nga kati i dytë në objektin “Qami Construction” – arrestohet koordinatori i sigurisë në punë
Në Fushë Kosovë, një punëtor ra nga kati i dytë në objektin “Qami Construction” dhe përfundoi në operim në QKUK. Koordinatori për siguri në punë u ndalua për 48 orë.
Kontrolli rutinë në Pejë zbulon armë në Audi A8 – 24-vjeçari e pranon në vend
Në Zllapek të Pejës, gjatë kontrollit të një Audi A8 u gjet një armë “Zoraki”, karikator dhe gjashtë fishekë. Pasagjeri Valjet Ahmetaj pranoi se arma ishte e tij dhe u lirua në procedurë të rregullt.
Vozitësi humb kontrollin me “Fiat Punto” në rrugën Mitrovicë–Jarinje, përfundojnë të lënduar dy të rinj
Në rrugën Mitrovicë–Jarinje, një Fiat Punto doli nga rruga në fshatin Jezero. Shoferi 20-vjeçar dhe pasagjerja 17-vjeçare mbetën të lënduar dhe u dërguan për trajtim.
“Fantazma” e veturave në Prishtinë? Dyshohet për 113 vjedhje – kapet pasi mori 8 mijë euro nga një BMW
Në Prishtinë u arrestua Qemajl Mehmeti, i dyshuar për 113 vjedhje nga veturat. Rasti u zbardh pas vjedhjes së 8 mijë eurove nga një BMW në rrugën “Hajdar Dushi”.
Nga dhuna në familje te arma ilegale – çka iu gjet 31-vjeçarit në Lipjan?
Në Shalë të Lipjanit, te një person i ndaluar më parë për dhunë në familje u gjet një armë me gaz “Ecol Special 99”, karikator dhe 41 fishekë me gaz, me numër serik të dyshuar të fshirë.
Goditi policin në fytyrë gjatë arrestimit në Prishtinë – përfundon në ndalim 48-orësh
Në Prishtinë, Fatmir Kalaja dyshohet se goditi me grusht në nofull një polic gjatë realizimit të një urdhërese. Polici mori trajtim në QKUK, ndërsa i dyshuari u ndalua për 48 orë.

Më gjerësisht:

1. U kthye në banesë dhe dera nuk hapej – një ditë më vonë gjen shtëpinë e demoluar dhe 10 mijë euro të zhdukura në Ferizaj

Një vjedhje e rëndë është raportuar në Ferizaj, ku një 26-vjeçar dyshohet se mbeti pa stoli ari dhe para të gatshme në vlerë rreth 10 mijë euro, pasi persona ende të panjohur hynë në banesën e tij.

Ngjarja ka ndodhur në rrugën “Cen Dugolli”.

Sipas informatave, viktima A. Ibrahimi kishte shkuar në banesën e tij më 9 maj rreth orës 23:30 dhe kishte vërejtur se dera nuk hapej as me çelës.

Ai kishte menduar se dera kishte pësuar defekt dhe kishte vendosur ta kontrollonte ditën tjetër.

Por të nesërmen, rreth orës 12:00, pasi ishte njoftuar se në objektin ku jeton kishte ndodhur një vjedhje, ai kishte shkuar sërish te banesa dhe kishte hapur derën me forcë.

Aty kishte kuptuar se banesa ishte demoluar.

Persona të panjohur dyshohet se kishin marrë stoli ari dhe para të gatshme, në vlerë totale rreth 10 mijë euro.

Në vendngjarje kanë dalë njësia e hetimeve të stacionit dhe forenzika, të cilat kanë kryer ekzaminimin dhe fotografimin e banesës.

Me konsultim të Prokurorit kujdestar, rasti është iniciuar si “Vjedhje e rëndë”, ndërsa hetimet janë duke vazhduar nga Hetimet Rajonale.

2. Grinder, rizlla dhe marihuanë – dy të rinj ndalohen nga Policia në Skenderaj

Një patrullë policore në Skenderaj ka hasur në një veturë të ndalur anash rrugës, ku ndodheshin tre persona, ndërsa gjatë kontrollit dy prej tyre dyshohet se u kapën me substanca narkotike.

Ngjarja ka ndodhur më 10 maj 2026 rreth orës 09:00 në rrugën “Shaban Jashari”.

Sipas informatave, policët kishin vërejtur veturën të ndalur jashtë rrugës dhe kishin vendosur të bëjnë kontroll rutinë.

Gjatë kontrollit, te Ardit Xhemajli janë gjetur një mulli për bluarjen e substancave narkotike, rizlla dhe një sasi e vogël substance që dyshohet të jetë narkotike.

Ndërsa te Ylli Bajrami, sipas Policisë, është gjetur po ashtu një mulli për bluarje, ndërsa afër veturës në tokë është gjetur edhe një cigare me substancë të dyshuar narkotike.

Substancat dhe mjetet e gjetura janë sekuestruar nga Policia.

Dy të rinjtë janë shoqëruar në Stacion Policor, ku janë intervistuar nga hetuesit.

Me udhëzim të Prokurorit kujdestar, rasti është iniciuar si “Posedim i paautorizuar i narkotikëve, substancave psikotrope ose analoge”, ndërsa pas procedurave policore, të dyshuarit janë liruar në procedurë të rregullt.

3. Kapet me armë në brez në Koshutovë – 23-vjeçari përfundon në ndalim

Një 23-vjeçar është arrestuar të shtunën në Leposaviç pasi njësitë speciale policore i gjetën armë zjarri gjatë kontrollit.

Bëhet fjalë për Rion Begiqin, i cili u ndalua nga njësia NJNSH-Lindje në fshatin Koshutovë.

Gjatë kontrollit sipërfaqësor policor, te Begiqi është gjetur një armë brezi, pistoletë me katër fishekë të kalibrit 9 mm, për të cilën nuk posedonte leje.

Pas zbulimit të armës, Policia e arrestoi menjëherë 23-vjeçarin, ndërsa arma dhe fishekët u sekuestruan si prova materiale.

Pas intervistimit në prezencë të avokatit mbrojtës, me urdhër të Prokurorit të Shtetit, Rion Begiqi është dërguar në mbajtje për 48 orë.

Rasti po hetohet si “Mbajtje në pronësi, kontroll ose posedim të paautorizuar të armëve”.

4. “Kam me ju vra krejt” – 17-vjeçari sulmon policët pasi iu konfiskua kamioneta me dru në Istog

Një situatë e tensionuar ka eskaluar në Istog, ku një i mitur dyshohet se ka sulmuar zyrtarët policorë dhe i ka kërcënuar me jetë pasi Policia ia konfiskoi kamionetën me dru.

Ngjarja ka ndodhur më 10 maj 2026 rreth orës 10:00.

Patrulla policore kishte ndaluar një kamionetë që transportonte dru dhe gjatë kontrollit kishte konstatuar se drejtuesi nuk posedonte patentë shoferi.

Automjeti dhe lënda drunore janë konfiskuar, pasi nuk posedonin dokumentacionin përkatës për prejardhjen e druve.

Pas këtij veprimi, i dyshuari L.M. ishte revoltuar dhe kishte filluar të bëhej agresiv ndaj policëve.

Sipas dëshmitarit okular, ai kishte kërcënuar zyrtarët duke u thënë: “Kam me ju vra krejt se nuk me njihni mu.”

I mituri kishte tentuar të largohej me kamionetë, por kur policët ndërhynë për ta ndalur, ai dyshohet se sulmoi fizikisht njërin nga zyrtarët policorë, duke i shkaktuar lëndime në dorë dhe duke ia dëmtuar uniformën.

Pas arrestimit, i dyshuari është intervistuar dhe me urdhër të Prokurorit është ndaluar për 24 orë.

Automjeti dhe drutë janë konfiskuar, ndërsa Pylltaria do të verifikojë prejardhjen dhe vendin e prerjes së lëndës drunore.

5. 74-vjeçari i dha fund jetës para syve të motrave në Shtërpcë – përdori revolen derisa ato po pastronin dhomën

Një ngjarje e rëndë ka ndodhur paraditen e së shtunës në fshatin Biti e Epërme në Shtërpcë, ku një 74-vjeçar dyshohet se i dha fund jetës me armë zjarri brenda shtëpisë së tij.

Viktima është Faik Bakiu, i cili, sipas informatave, ishte në gjendje të rënduar shëndetësore dhe qëndronte në një dhomë të mbushur me pajisje mjekësore dhe barna.

Ngjarja ka ndodhur rreth orës 11:20, në momentin kur dy motrat e tij, të ardhura nga shtetet perëndimore, po pastronin dhomën ku ai qëndronte.

Sipas hetimeve fillestare, 74-vjeçari dyshohet se ka shfrytëzuar momentin kur motrat ishin të angazhuara me pastrimin dhe me një revole ka qëlluar veten në kokë, duke pësuar plagë vdekjeprurëse.

Ekipi mjekësor i Shtëpisë së Shëndetit në Shtërpcë ka konstatuar vdekjen e tij në vendngjarje rreth orës 12:00.

Në vendin e ngjarjes kanë dalë hetuesit rajonalë dhe forenzika, ndërsa me urdhër të Prokurorit për Krime të Rënda është kryer ekzaminimi i vendit të ngjarjes.

Trupi i pajetë është dërguar në Institutin e Mjekësisë Ligjore për autopsi, ndërsa arma, karikatori dhe dy fishekë janë sekuestruar për procedura të mëtejshme hetimore.

6. Ky është 30-vjeçari që u arrestua në Gjakovë me urdhër-arrest ndërkombëtar nga Interpol Tirana

Një person i kërkuar me urdhër-arrest ndërkombëtar është arrestuar të shtunën në Gjakovë, pas informacioneve operative të siguruara nga Policia.

Bëhet fjalë për Hil Memen, ndaj të cilit ishte aktiv një urdhër-arrest ndërkombëtar i lëshuar nga Interpol Tirana.

Arrestimi është realizuar më 10 maj 2026 rreth orës 13:10 në rrugën “Mic Sokoli” në Gjakovë.

Sipas informatave, patrulla policore kishte pranuar informacion për vendndodhjen e personit të kërkuar dhe kishte intervenuar menjëherë në lokacion.

Pas identifikimit dhe verifikimeve zyrtare, është konfirmuar se 30-vjeçari kërkohej ndërkombëtarisht nga autoritetet shqiptare.

Me urdhër të Prokurorit kujdestar, i dyshuari është ndaluar për 48 orë për procedura të mëtejshme.

7. 26-vjeçarja dyshohet se tentoi t’i japë fund jetës me skalper në Novobërdë

Një ngjarje e rëndë ka tronditur fshatin Pasjak në Novobërdë, ku një 26-vjeçare dyshohet se ka tentuar t’i japë fund jetës duke përdorur një mjet të mprehtë.

Rasti është raportuar më 10 maj 2026 rreth orës 10:00.

Policia dhe ekipi mjekësor kanë dalë menjëherë në vendngjarje pas pranimit të informacionit për një tentim vetëvrasjeje që dyshohet se është kryer me skalper.

Viktima, B.I., është gjetur me shenja jete dhe ka marrë ndihmën e parë nga ekipi mjekësor.

Në vendngjarje kanë intervenuar edhe hetuesit rajonalë për ekzaminimin e rrethanave të incidentit.

Prokurori i Krimeve të Rënda e ka cilësuar rastin si “Tentim vetëvrasje”.

Sipas mjekëve që kanë trajtuar të renë, gjendja e saj është stabile, por për shkak të lëndimeve ajo është dërguar në QKUK, në repartin e kirurgjisë plastike, për trajtim të mëtejshëm.

8. Vetëm një aktakuzë për manipulimin e votave të 28 dhjetorit 2025

Për manipulimet në numërimin e votave në zgjedhjet e 28 dhjetorit 2025, deri tani është ngritur vetëm një aktakuzë ndaj katër personave.

Nga të dhënat e publikuara nga shtatë prokuroritë themelore, rezulton se janë intervistuar së paku 700 persona lidhur me dyshime për manipulim të votave të kandidatëve gjatë numërimit.

Në këtë shifër nuk përfshihen njoftimet për hetime e intervistime ku nuk është përmendur numri i të dyshuarve.

Të gjithë këta persona mund të angazhohen sërish në numërimin e votave, pasi Komisioni Qendror i Zgjedhjeve ende nuk ka marrë vendim lidhur me ndalimin e personave që janë nën hetime që të angazhohen si komisionerë.

Aktakuzën e vetme për vjedhje të votave të kandidatëve në zgjedhjet e 28 dhjetorit e ka ngritur Prokuroria e Ferizajt, në muajin mars.

Megjithatë, nuk janë ndarë informacione nëse ka persona të tjerë nën dyshime.

Në njoftimin e Prokurorisë Themelore në Ferizaj thuhej se në muajin mars 2026 kjo prokurori ka ngritur aktakuzë kundër katër personave të pandehur, për shkak të dyshimit të bazuar për veprën penale “Falsifikim i rezultateve të votimit”, sipas Kodit Penal të Republikës së Kosovës.

Prokuroria Themelore në Ferizaj ka deklaruar se mbetet e angazhuar për mbrojtjen e votës së lirë të qytetarëve dhe se do të hetojë çdo rast të dyshuar, me qëllim ruajtjen e integritetit të procesit zgjedhor dhe sundimit të ligjit.

Dallaveret më të mëdha dyshohet se kanë ndodhur në Prizren, ku janë tjetërsuar afro 70 mijë vota.

Më 23 janar, Prokuroria Themelore e Prizrenit ka intervistuar 109 persona nën dyshimet për dallavere në Qendrën Komunale të Numërimit.

Më vonë, kjo prokurori ka intervistuar edhe afro 100 komisionerë të tjerë të komunave Dragash, Suharekë dhe Mamushë.

Një pjesë e madhe e tyre janë dërguar në paraburgim, por janë liruar më pas.

Megjithatë, ende nuk është ngritur asnjë aktakuzë për këto dyshime për manipulime. Në Prokurorinë Themelore të Prizrenit nuk kanë treguar se sa persona janë të dyshuar dhe as nëse pritet të ngrihet ndonjë aktakuzë.

Nga Prokuroria në Mitrovicë kanë thënë se rastet janë në fazë të hetimeve, por nuk kanë ndarë më shumë informata se a do të ketë aktakuza dhe, nëse po, kur.

Në fillim të shkurtit, kjo prokurori ftoi për intervistim 43 persona, ndërsa ndaj 10 prej tyre pati kërkuar paraburgim.

Edhe në Prokurorinë e Gjakovës kanë thënë se rastet janë nën hetime, por nuk kanë ndarë më shumë informata.

Në komunat që janë nën juridiksionin e kësaj prokurorie, nga të dhënat publike del se janë intervistuar afro 100 persona, kryesisht komisionerë të Malishevës dhe Gjakovës.

Në Prokurorinë e Pejës po ashtu kanë thënë se rastet po hetohen. Nga të dhënat publike del se kjo prokurori i ka hetuar si të dyshuar për vjedhje të votave afro 200 persona.

Prokuroria Themelore në Pejë, Departamenti i Krimeve të Rënda, ka bërë të ditur se ka pranuar dhjetëra kallëzime penale ndaj komisioneve dhe kryesuesve të zgjedhjeve për procesin e numërimit të votave të kandidatëve të subjekteve politike.

Sipas kësaj prokurorie, aktualisht janë në fazën e procesit hetimor ndaj qindra personave të dyshuar.

Anëtarë të KQZ-së kanë thënë se synojnë që për certifikimin e komisionerëve të vendosin edhe kriterin që ata të mos jenë duke u hetuar për shkelje zgjedhore. Por në mbledhjen e mbajtur javën e shkuar nuk është marrë një vendim i tillë.

Zgjedhjet e radhës do të mbahen më 7 qershor.

9. Dy vëllezër humbin jetën brenda pak orësh në Pejë – njëri nga aksidenti në trafik, tjetri nga sëmundja

Peja është tronditur këtë të diel nga një tragjedi e rëndë familjare, ku dy vëllezër kanë humbur jetën brenda pak orësh.

Fillimisht, Gazmend (Shefqet) Maloku, i njohur nga të afërmit dhe miqtë si “Meni”, humbi jetën aksidentalisht, në një rast që u raportua gjatë ditës.

Por dhimbja për familjen Maloku nuk përfundoi me kaq. Vetëm pak kohë më vonë, edhe vëllai i tij, Bashkim (Shefqet) Maloku, ndërroi jetë pas një gjendjeje të rënduar shëndetësore.

Sipas burimeve, Bashkimi ka ndërruar jetë gjatë trajtimit në spital, brenda rreth një ore pasi kishte marrë lajmin për humbjen tragjike të vëllait të tij.

Dy humbje të njëpasnjëshme në të njëjtën ditë kanë lënë të pikëlluar familjarët, miqtë dhe qytetarë të shumtë në Pejë.

10. Tre arinj futen në oborrin e një shtëpie në Hoçë të Prizrenit

Një situatë e pazakontë është regjistruar në fshatin Hoçë të Prizrenit, ku tre arinj janë futur në oborrin e një familjeje, duke shkaktuar shqetësim te banorët e zonës.

Pamjet e publikuara në media lokale tregojnë momentin kur arinjtë lëvizin pranë shtëpisë dhe më pas largohen me vrap sapo vërejnë praninë e dy personave afër hyrjes së objektit.

Banorët thonë se raste të tilla nuk janë të rralla, pasi arinjtë janë parë edhe herë të tjera pranë zonave të banuara, duke shtuar frikën për sigurinë e familjeve dhe të kafshëve shtëpiake.

11. Vdes në QKUK personi i aksidentuar me motoçikletë në Pejë

Një person ka ndërruar jetë në Qendrën Klinike Universitare të Kosovës, pasi kishte mbetur i lënduar rëndë në një vetaksident me motoçikletë në qytetin e Pejës.

Rasti ka ndodhur më 3 maj në rrugën “Perandori Justinian”, ku viktima kishte humbur kontrollin mbi motoçikletën dhe ishte përfshirë në aksident.

Për shkak të gjendjes së rëndë shëndetësore, ai ishte dërguar për trajtim emergjent në QKUK.

Lajmi për vdekjen e tij është konfirmuar nga Policia e Kosovës, e cila ka bërë të ditur se i riu ka ndërruar jetë rreth një javë pas aksidentit, si pasojë e plagëve të marra.

Trupi i pajetë është dërguar në Institutin e Mjekësisë Ligjore për obduksion, ndërsa autoritetet kanë nisur hetimet për të sqaruar plotësisht rrethanat e ngjarjes.

12. Zvarriti për flokësh gruan në Obiliq – 23-vjeçari përfundon në ndalim

Një rast i rëndë i dhunës në familje është raportuar mbrëmjen e së premtes në Obiliq, ku një grua ka denoncuar bashkëshortin e saj se e kishte sulmuar fizikisht dhe e kishte zvarritur për flokësh.

Ngjarja ka ndodhur në rrugën “Kosova B”, në Plemetin.

Rreth orës 21:50, viktima E.Z., 28-vjeçare, është paraqitur në Stacionin Policor në Obiliq për të raportuar dhunën e ushtruar ndaj saj.

Ajo ka deklaruar para hetuesve se bashkëshorti i saj, F.B., 23-vjeçar, e kishte sulmuar fizikisht duke e zvarritur për flokësh.

Pas denoncimit, Policia ka arrestuar të dyshuarin dhe e ka shoqëruar në Stacionin Policor në Obiliq.

Në momentin e arrestimit, ai dyshohet se ndodhej nën ndikim të alkoolit.

Me urdhër të Prokurorit për dhunë në familje, 23-vjeçari është dërguar në mbajtje për 48 orë, ndërsa hetimet për rastin janë në vazhdim.

13. Kapet me pistoletë në brez dhe brisk gjatë kontrollit në Prizren – 22-vjeçari përfundon në ndalim

Një kontroll rutinë policor gjatë orëve të para të mëngjesit në Prizren ka çuar në arrestimin e një të riu, te i cili Policia gjeti armë zjarri dhe brisk.

Ngjarja ka ndodhur rreth orës 01:30 në rrugën “Hamit Thaqi”.

Patrulla policore kishte hasur një automjet ku ndodheshin katër persona dhe kishte vendosur të kryente kontroll rutinë.

Gjatë kontrollit te Valerjan Berisha, 22-vjeçar, Policia ka gjetur të fshehur në brez:

një pistoletë M-57, kalibër 7.62 mm,

një karikator,

tetë fishekë,

si dhe një brisk me gjatësi tehu rreth 9 centimetra.

Pas zbulimit të armës, 22-vjeçari është shoqëruar në Stacionin Policor në Prizren, ku është intervistuar në prezencë të avokatit mbrojtës.

Në vendngjarje kanë dalë edhe njësia e krimteknikës dhe hetuesit policorë.

Me urdhër të Prokurorit kujdestar, i dyshuari është ndaluar për 48 orë.

Rasti po hetohet si “Mbajtje në pronësi, kontroll ose posedim të paautorizuar të armëve”.

14. “Mos e merr veturën” – eskalon konflikti mes vëllezërve në Prishtinë, 29-vjeçari përfundon në ndalim

Një konflikt familjar ka eskaluar pak para mesnatës në Prishtinë, pasi një i ri dyshohet se sulmoi vëllain e tij pasi ky i fundit nuk e lejoi ta merrte veturën për të dalë në qytet.

Ngjarja ka ndodhur më 9 maj 2026 rreth orës 23:30 në rrugën “Lefter Bica”.

R.D., 32-vjeçar, kishte kërkuar ndihmën e Policisë duke raportuar se ishte sulmuar nga vëllai i tij, B.D., 29-vjeçar.

Sipas ankuesit, i dyshuari është përdorues i lëndëve narkotike dhe kishte insistuar ta merrte veturën për të dalë vetëm në qytet.

Por pasi vëllai nuk e kishte lejuar për shkak të sigurisë, situata kishte eskaluar në konflikt fizik.

Në rast është intervistuar edhe një dëshmitar tjetër, B.D., 53-vjeçar.

Pavarësisht incidentit, nga rasti nuk janë raportuar persona të lënduar.

Me urdhër të Prokurorit të Shtetit, Departamenti për Dhunë në Familje, rasti është iniciuar si “Dhunë në familje”, ndërsa i dyshuari është ndaluar për 48 orë.

15. Sherr mes vëllezërve për pronë në Mitrovicë – gruaja përfundon në spital pasi hyri t’i ndajë

Një konflikt familjar për çështje pronësore ka eskaluar në përleshje fizike mes dy vëllezërve në Mitrovicë, ndërsa gruaja e njërit prej tyre ka përfunduar e lënduar në spital pasi tentoi t’i ndajë.

Ngjarja ka ndodhur më 9 maj 2026 rreth orës 13:45 në rrugën “Adem Voca”, në Mitrovicën e Jugut.

Policia kishte pranuar njoftim për një mosmarrëveshje familjare dhe njësitë policore kishin intervenuar menjëherë në lokacion.

Dy vëllezër, Z.L., 33-vjeçar, dhe M.L., 35-vjeçar, dyshohet se u përfshinë në rrahje fizike mes vete për shkak të një konflikti pronësor.

Gjatë përleshjes kishte ndërhyrë edhe H.L., e lindur në vitin 1988, bashkëshortja e njërit prej tyre, e cila dyshohet se pësoi lëndime trupore teksa tentonte t’i ndante.

Ajo ka marrë trajtim mjekësor në Spitalin Rajonal të Mitrovicës.

Sipas burimeve, të përfshirët jetojnë në të njëjtën shtëpi.

Me konsultim të Prokurorit kujdestar, rasti është iniciuar si “Dhunë në familje” dhe “Lëndim i lehtë trupor”.

Dy vëllezërit janë intervistuar në cilësinë e të dyshuarve dhe me vendim të Prokurorit janë ndaluar për 48 orë.

16. “Pinte dhe më ofendonte vazhdimisht” – burri arrestohet në Gjakovë pas denoncimit nga bashkëshortja

Një grua në Gjakovë ka denoncuar bashkëshortin e saj për dhunë psikike dhe sjellje të vazhdueshme nën ndikim të alkoolit, ndërsa Policia ka intervenuar duke e arrestuar të dyshuarin.

Rasti ka ndodhur më 9 maj 2026 rreth orës 13:00 në rrugën “Tirana”, në Gjakovë.

Viktima A.M., 46-vjeçare, ka raportuar në Polici se bashkëshorti i saj, V.M., 50-vjeçar, konsumonte vazhdimisht alkool dhe e ofendonte në mënyrë të vazhdueshme.

Viktima ka refuzuar strehimin, por ka kërkuar urdhër mbrojtës.

Ndaj saj është lëshuar urdhër i përkohshëm emergjent për mbrojtje.

Pas arrestimit, të dyshuarit i është bërë testi i alkoolit, ku ka rezultuar me 2.02 promilë alkool në organizëm.

Për shkak të gjendjes së tij, ai fillimisht është dërguar në spital, ndërsa më pas, me urdhër të Prokurorit kujdestar, është ndaluar për 48 orë.

Rasti po trajtohet si “Dhunë në familje”.

17. Apel për ndihmë | Ky është 38-vjeçari nga Gjakova që u zhduk pasi paralajmëroi se kishte marrë “hapa qetësimi”

Detaje shqetësuese kanë dalë nga rasti i zhdukjes së një burri në Gjakovë, i cili dyshohet se u largua në rrethana të panjohura pasi kishte njoftuar bashkëshorten se kishte përdorur “hapa qetësimi”.

Bëhet fjalë për Altin Bicurrin, 38-vjeçar, për zhdukjen e të cilit janë alarmuar familjarët dhe rrethi i tij.

Kontaktin e fundit me familjen ai e kishte pasur më 9 maj, rreth orës 19:30, kur kishte treguar se kishte përdorur hapa qetësimi dhe kishte lënë edhe një shënim në rrjetet sociale.

Hera e fundit që ai ishte parë në banesë kishte qenë më 8 maj, në mbrëmje.

Sipas deklarimeve të familjarëve, 38-vjeçari dyshohet se është edhe përdorues i substancave narkotike.

Policia ka iniciuar rastin si “Person i zhdukur”, ndërsa hetimet dhe kërkimet për gjetjen e tij janë në vazhdim.

18. Po rrinte në lokalin “Toks” në rrugën C – arrestohet 33-vjeçari i kërkuar me urdhër-arrest për vuajtje dënimi me burgim

Një aksion i shpejtë policor është zhvilluar mbrëmjen e së premtes në një nga lokalet në rrugën C në Prishtinë, ku njësitë elitare të reagimit kanë arrestuar një person që kërkohej me urdhër-arrest aktiv.

Ngjarja ka ndodhur rreth orës 19:30 në lokalin “Toks”.

Njësia e Reagimit të Shpejtë, së bashku me hetuesit policorë, kishte siguruar informacion se Egzon Abazi, 33-vjeçar, ndodhej brenda lokalit.

Policët kanë zbarkuar në lokacion dhe kanë intervenuar menjëherë për arrestimin e tij.

Ndaj 33-vjeçarit ekzistonte një urdhër-arrest aktiv, ndërsa pas prangosjes ai është shoqëruar në Stacionin Policor “Jugu”.

Pas procedurave policore, ai është dërguar në Qendrën e Paraburgimit në Hajvali për vuajtjen e dënimit me burgim në kohëzgjatje prej një viti.

19. Pa mesazhet me një vajzë tjetër, gruaja i hyn me shuplaka burrit në Prishtinë

Një konflikt mes bashkëshortëve në Prishtinë ka përfunduar me intervenim të Policisë, pasi një grua dyshohet se e sulmoi fizikisht burrin e saj pasi pa në telefonin e tij komunikime me një vajzë tjetër.

Ngjarja ka ndodhur mbrëmjen e 9 majit, rreth orës 19:40, në rrugën “Ferid Curri” në Prishtinë.

Policia kishte pranuar raportim për një mosmarrëveshje mes një çifti dhe menjëherë kishte dalë në vendngjarje.

Në lokacion janë takuar bashkëshortët, të cilët më pas janë shoqëruar në Stacionin Policor “Veriu” për intervistim.

Gjatë deklarimit para hetuesve, e dyshuara Y.R., 32-vjeçare, ka pranuar se e kishte goditur bashkëshortin e saj, V.M., 34-vjeçar, me shuplaka në gjendje afekti, pasi kishte parë në telefonin e tij komunikime me një vajzë tjetër.

Pas incidentit, e dyshuara ka marrë trajtim mjekësor pasi nuk ishte ndier mirë, ndërsa bashkëshorti nuk ka kërkuar trajtim mjekësor.

Me udhëzim të Prokurorit kujdestar, rasti është iniciuar si “Dhunë në familje”, ndërsa e dyshuara është liruar në procedurë të rregullt.

20. “Më godiste vazhdimisht” – 22-vjeçarja nga Peja denoncon burrin për dhunë fizike dhe psikike

Një 22-vjeçare nga Peja ka denoncuar bashkëshortin e saj për dhunë të vazhdueshme fizike dhe psikike, duke pretenduar se ishte rrahur brutalisht para se të largohej nga shtëpia dhe të kërkonte ndihmë te familja e saj.

Rasti është raportuar në Policinë e Pejës nga F.Q., 22-vjeçare, e cila është intervistuar nga njësia për dhunë në familje.

Sipas deklarimit të saj, ajo ishte martuar me K.K. në vitin 2025, por që nga fillimi i martesës kishte përjetuar dhunë të vazhdueshme fizike dhe psikike.

Incidenti i fundit kishte ndodhur më 5 maj 2026 në fshatin Pavlan të Pejës.

Ajo ka deklaruar se bashkëshorti i saj e kishte goditur me grushte në kokë dhe me shuplaka në fytyrë.

Pas sulmit, 22-vjeçarja kishte arritur të largohej nga shtëpia, kishte njoftuar familjen dhe më pas ishte strehuar te familjarët e saj.

Hetuesit kanë tentuar disa herë ta kontaktojnë të dyshuarin, por sipas Policisë nuk kanë arritur të kenë qasje në numrin e telefonit që kishte dhënë viktima.

Me udhëzim të Prokurorit kujdestar, rasti është iniciuar si “Dhunë në familje”.

Hetimet janë në vazhdim.

21. “Më jep para për drogë” – 32-vjeçari rrah babanë me shkop në Pejë, pastaj sulmon edhe Policinë në stacion

Një rast i rëndë i dhunës në familje ka ndodhur pas mesnate në Pejë, ku një 32-vjeçar dyshohet se sulmoi fizikisht babanë e tij për para, ndërsa më pas, pas arrestimit, goditi edhe një zyrtar policor brenda Stacionit Policor.

Ngjarja ka ndodhur në rrugën “Lekë Dukagjini”, rreth orës 00:00 të datës 10 maj 2026.

Policia kishte intervenuar pas raportimit për dhunë në familje.

Viktima kishte deklaruar para hetuesve se djali i tij, Kastriot Grapci, kishte shkuar në shtëpi dhe kishte kërkuar para për të blerë narkotikë.

Kur babai nuk kishte pasur para për t’i dhënë, situata kishte eskaluar.

Sipas deklarimit të viktimës, i dyshuari fillimisht kishte fikur dritat e shtëpisë dhe më pas kishte nisur ta godiste me shuplaka.

Por dhuna nuk kishte përfunduar aty.

Më pas, ai kishte marrë edhe një shkop, me të cilin dyshohet se e kishte goditur disa herë babanë e tij.

Për rastin, Policia ka arrestuar të dyshuarin dhe e ka shoqëruar në Stacionin Policor në Pejë.

Ndaj tij ekzistonte edhe urdhër mbrojtjeje i lëshuar nga Gjykata Themelore – Divizioni Civil, çka bëri që Prokurori të urdhërojë ndalimin e tij për “Dhunë në familje” dhe “Mospërfillje të gjykatës”.

Por incidenti vazhdoi edhe brenda ambienteve policore.

Pasi iu dorëzua aktvendimi për ndalim, i dyshuari e grisi kopjen e dokumentit para policëve.

Më pas, gjatë transportimit për në Qendrën e Ndalimit, ai dyshohet se bëri rezistencë aktive dhe, në një moment, në korridorin e stacionit policor, e goditi me kokë në pjesën e tëmthit një zyrtar policor.

Pas këtij incidenti, Prokurori urdhëroi që ndaj tij të shtohet edhe vepra penale “Sulm ndaj personit zyrtar”.

I dyshuari është dërguar në ndalim për 48 orë, ndërsa hetimet janë në vazhdim.

22. Zhduket kasaforta me armë brenda në Viti – pronari kishte lënë derën e shtëpisë pa çelës

Një armë zjarri me leje valide është raportuar e vjedhur në fshatin Ballancë të Vitisë, pasi persona ende të panjohur dyshohet se kanë hyrë në një shtëpi dhe kanë marrë tërë kasafortën ku mbahej arma.

Rasti është raportuar mbrëmjen e 9 majit, rreth orës 18:30, në Nënstacionin Policor në Pozheran.

Ankuesi A.N., 42-vjeçar, ka deklaruar se posedonte me leje valide një armë zjarri të prodhuesit “Tisas”, modeli “Zig 14”, kalibër 9 mm, bashkë me dy karikatorë dhe 12 fishekë.

Arma mbahej e fshehur në një kasafortë brenda një ormari në dhomën e gjumit, në shtëpinë e tij në fshatin Ballancë.

Sipas deklarimit të tij, më 7 maj kishte udhëtuar për në Pejë te disa shokë, ndërsa shtëpinë e kishte lënë bosh dhe dera hyrëse nuk kishte qenë e mbyllur me çelës.

Kur u kthye, rreth orës 12:00, ai vuri re se mungonte e gjithë kasaforta ku mbahej arma.

Pronari ka deklaruar se nuk dyshon në ndonjë person konkret.

Me urdhër të Prokurores kujdestare, rasti është iniciuar si “Vjedhje e rëndë”, ndërsa hetimet janë duke vazhduar nga njësia hetimore në Viti.

23. 50 aksidente brenda 24 orëve në Kosovë, mbi 1 mijë gjoba trafiku

Gjatë 24 orëve të fundit në Kosovë janë regjistruar gjithsej 50 aksidente trafiku, sipas statistikave të publikuara nga autoritetet policore.

Prej tyre, 21 aksidente kanë përfunduar me persona të lënduar, ndërsa 29 të tjera vetëm me dëme materiale.

Policia ka bërë të ditur se gjatë së njëjtës periudhë janë shqiptuar 1,829 gjoba trafiku, si pjesë e kontrolleve të shtuara në rrugë për rritjen e sigurisë.

Po ashtu, në kuadër të veprimeve policore, janë arrestuar 33 persona, ndërsa 19 prej tyre janë dërguar në mbajtje.

Autoritetet u kanë bërë thirrje pjesëmarrësve në trafik që të respektojnë rregullat e qarkullimit, me qëllim uljen e numrit të aksidenteve në vend.

24. Pistoletë “Sig Sauer”, 3 karikatorë e 46 fishekë – çka gjeti Policia gjatë bastisjes tek Liridon Restelica

Një armë zjarri me pajisje përcjellëse dhe dhjetëra fishekë janë sekuestruar gjatë një aksioni të njësisë për krime ekonomike në Çagllavicë.

Ngjarja lidhet me një asistencë policore të kërkuar më 7 maj 2026, rreth orës 10:10, në lagjen NIC në Çagllavicë.

Njësitë relevante policore dhe hetimore kanë dalë në vendngjarje pas kërkesës së njësisë për krime ekonomike, e cila gjatë kontrollit në një shtëpi kishte gjetur armë zjarri.

Në shtëpinë e Liridon Restelicës (1984) janë sekuestruar:

një pistoletë “Sig Sauer P320”,
tre karikatorë,
dhe 46 fishekë.

Arma dhe municioni janë konfiskuar nga njësia hetimore e Graçanicës, ndërsa ndaj të dyshuarit janë marrë deklarata lidhur me rastin.

Pas konsultimeve me Prokurorin, rasti është iniciuar si “Mbajtje në pronësi, kontroll ose posedim të paautorizuar të armëve”.

Hetimet për rastin janë duke vazhduar.

25. U ndal në Aeroportin “Adem Jashari” – 31-vjeçari përfundon në burg për një gjobë 200 euro

Një 31-vjeçar ka përfunduar në Qendrën Korrektuese në Hajvali pasi u ndalua në Aeroportin Ndërkombëtar “Adem Jashari”, për shkak të një urdhër-arresti aktiv të lëshuar nga Gjykata Themelore në Prishtinë.

Ngjarja ka ndodhur më 9 maj 2026, rreth orës 10:30.

Gjatë verifikimeve në hyrje të aeroportit, autoritetet kanë ndaluar Leonard Sylejmanin, 31-vjeçar, ndaj të cilit rezultonte aktiv një letër-rreshtim i lëshuar nga Gjykata Themelore në Prishtinë – Departamenti i Përgjithshëm.

I njëjti nuk kishte paguar një gjobë prej 200 eurosh, e cila më pas i ishte shndërruar në dënim me burgim në kohëzgjatje prej 10 ditësh.

Pas ndalimit në aeroport, ai është dërguar në Qendrën Korrektuese në Hajvali për vuajtjen e dënimit.

26. Ky është i dyshuari që bëri kaos në Emergjencën e QKUK-së dhe kafshoi policin gjatë arrestimit

Detaje të reja kanë dalë nga incidenti i rëndë që ndodhi në Emergjencën e QKUK-së në Prishtinë, ku një person i dyshuar për sjellje agresive ndaj stafit mjekësor përfundoi duke sulmuar edhe zyrtarët policorë.

Bëhet fjalë për Valon Murtezin, 32-vjeçar, i cili kishte përfunduar në Emergjencë për trajtim mjekësor pasi paraprakisht kishte pësuar aksident trafiku në Prishtinë.

Gjatë trajtimit ai dyshohet se ndodhej nën ndikim të alkoolit dhe kishte nisur të shfaqte sjellje agresive ndaj stafit mjekësor.

Situata eskaloi edhe më shumë kur Policia intervenoi për ta qetësuar dhe shoqëruar në stacion.

Gjatë arrestimit, i dyshuari ka kundërshtuar urdhrat policorë, ka bërë rezistencë aktive dhe ka sulmuar fizikisht dy zyrtarë policorë.

Njërin prej policëve, sipas burimeve, ai e ka kafshuar në dorë, duke i shkaktuar lëndime trupore, ndërsa edhe polici tjetër ka marrë lëndime në duar gjatë intervenimit.

Pas arrestimit dhe intervistimit në prezencë të avokatit mbrojtës, me vendim të Prokurorit të Shtetit, Valon Murtezi është dërguar në Qendrën e Ndalimit.

Rasti po hetohet si “Sulm ndaj personit zyrtar”.

27. Aksion i madh në Burgun e Dubravës, bastisen të gjitha dhomat e të burgosurve

Zyrtarët e Shërbimit Korrektues të Kosovës kanë zhvilluar një operacion të gjerë bastisjeje në Qendrën Korrektuese të Dubravës, me qëllim të parandalimit të veprimtarive të kundërligjshme dhe rritjes së sigurisë brenda institucionit korrektues.

Gjatë aksionit janë kontrolluar të gjitha hapësirat e brendshme të qendrës, përfshirë dhomat e të burgosurve, hapësirat e përbashkëta, sallën e sportit, si dhe ambientet e jashtme përcjellëse.

Në operacion kanë marrë pjesë edhe zyrtarë korrektues nga institucione të tjera korrektuese, ndërsa mbështetje ka ofruar edhe njësia speciale K9.

Sipas njoftimit zyrtar, pas përfundimit të kontrollit nuk është gjetur asnjë send i kundërligjshëm.

Megjithatë, gjatë bastisjes janë larguar sende të tepërta nga dhomat e të burgosurve dhe hapësirat e përbashkëta, me qëllim të ruajtjes së rendit dhe sigurisë.

Shërbimi Korrektues i Kosovës ka falënderuar të burgosurit për mirëkuptimin dhe bashkëpunimin gjatë realizimit të operacionit, duke theksuar se aksione të tilla synojnë krijimin e një ambienti korrektues të qetë, të sigurt dhe funksional.

28. Hetuesit antidrogë e përcollën deri në lokal – 23-vjeçarit në Viti i gjenden 10 qese me marihuanë

Një aksion i hetuesve antidrogë në Viti ka çuar në kapjen e një të riu që dyshohet se posedonte marihuanë të ndarë në disa qese.

Ngjarja ka ndodhur mbrëmjen e 8 majit, rreth orës 20:00, në rrugën “Kongresi i Manastirit” në Viti.

Hetuesit e Drejtorisë për Hetimin e Trafikimit me Narkotikë në Gjilan kishin pranuar informata operative se Hetem Gashi, rreth 24-vjeçar, posedonte substanca narkotike.

Pas lokalizimit të tij, hetuesit e kanë mbajtur nën vëzhgim dhe e kanë përcjellë deri në një lokal, ku më pas kanë ndërhyrë për kontroll.

Gjatë kontrollit, Policia ka gjetur dhe sekuestruar:

10 qese me substancë të dyshuar narkotike të llojit marihuanë,
si dhe një cigare me marihuanë.

Substanca i është nënshtruar testit fushor, ku ka rezultuar pozitive në marihuanë, me peshë totale prej 5.92 gramësh.

Pas intervistimit, me rekomandim të Prokurorit të Shtetit, i dyshuari është liruar në procedurë të rregullt, ndërsa hetimet për rastin vazhdojnë.

29. Skenë e rëndë në Pejë: 18-vjeçarja tërhiqet zvarrë drejt kamionit nga burri i saj, Policia ndërhyn në momentet kritike

Një ngjarje shqetësuese ka ndodhur mbrëmjen e së enjtes në Pejë, ku një 18-vjeçare dyshohet se u sulmua fizikisht nga bashkëshorti i saj në mes të rrugës, ndërsa i njëjti tentoi ta fusë me forcë në kamion.

Rasti ka ndodhur rreth orës 21:00 në rrugën “Shpëtim Bojku”.

Pas një mosmarrëveshjeje mes çiftit, I.L., rreth 26-vjeçar, dyshohet se e ka kapur për flokësh bashkëshorten e tij, E.D., rreth 18-vjeçare, duke e tërhequr me forcë drejt kamionit.

Situata ka alarmuar qytetarët dhe në momentet kritike kanë ndërhyrë zyrtarët policorë, të cilët kanë ndaluar incidentin dhe kanë shoqëruar çiftin në Stacionin Policor.

Viktima ka marrë trajtim mjekësor, ndërsa më pas është intervistuar nga njësia e hetimeve për dhunë në familje.

18-vjeçarja ka kërkuar të dërgohet në strehimore.

Me urdhër të Prokurorit kujdestar, I.L. është ndaluar për 48 orë, ndërsa rasti po hetohet si “Dhunë në familje”.

30. Ia vodhën kamionetën gjatë natës në Mitrovicë – e gjen përmes rrjeteve sociale, por të demoluar

Një qytetar nga Mitrovica ka mbetur pa fjalë pasi kamioneta e tij, e vjedhur gjatë natës, u gjet vetëm pak orë më vonë me dëme të mëdha materiale.

Rasti është raportuar më 8 maj 2026, rreth orës 08:45, në rrugën “Rifat Tahiri” në Mitrovicë.

Ankuesi R.V., rreth 55-vjeçar, kishte njoftuar Policinë se persona të panjohur ia kishin vjedhur gjatë natës automjetin e tij VW Kamionetë me ngjyrë të bardhë, që ndodhej afër shtëpisë së tij.

Vetëm pak orë më vonë, viktima ishte njoftuar përmes rrjeteve sociale se automjeti i tij ishte parë në rrugën “Cen Stantergu”.

Njësitë policore kanë dalë menjëherë në lokacion, ku kanë gjetur kamionetën me dëme të konsiderueshme materiale.

Automjeti është sekuestruar për ekzaminime të mëtejshme nga Policia, ndërsa autorët e vjedhjes ende nuk janë identifikuar.

Rasti mbetet nën hetime.

31. Vrau një qen endacak me armë gjahu në Kaçanik – Policia ia sekuestron pushkën

Një rast i rëndë është raportuar në fshatin Begracë të Kaçanikut, ku një person dyshohet se ka qëlluar me armë zjarri në drejtim të qenve endacakë, duke lënë një prej tyre të vrarë.

Ngjarja ka ndodhur më 8 maj 2026, rreth orës 18:20.

Policia kishte pranuar informacion se në fshat ishin dëgjuar të shtëna me armë, ndërsa dyshohej se një person kishte qëlluar ndaj kafshëve endacake.

Kur patrulla policore ka arritur në vendngjarje, ka hasur në një qen endacak të ngordhur, për të cilin dyshohet se ishte vrarë me armë zjarri.

Pas lokalizimit të të dyshuarit, Arif Luzha, rreth 66-vjeçar, ai ua ka dorëzuar vetë Policisë:

një pushkë gjuetie të tipit “qifte”, kalibër 16,
11 fishekë,
si dhe dy gëzhoja të shkrepura.

Me urdhër të Prokurorit kujdestar, ndaj tij është iniciuar rast për “Mbajtje në pronësi, kontroll ose posedim të paautorizuar të armëve”.

Pas intervistimit, i dyshuari është liruar në procedurë të rregullt, ndërsa arma dhe municioni janë sekuestruar për procedura të mëtejshme hetimore.

32. Punëtori bie nga kati i dytë në objektin “Qami Construction” – arrestohet koordinatori i sigurisë në punë

Një aksident i rëndë në vendin e punës ka ndodhur pasditen e së enjtes në Fushë Kosovë, ku një punëtor ka rënë nga kati i dytë i një objekti në ndërtim dhe ka përfunduar në sallën e operimit në QKUK.

Ngjarja ka ndodhur më 8 maj 2026, rreth orës 16:45, në rrugën “Doruntina”, afër hekurudhës, në objektin e kompanisë “Qami Construction”.

Viktima I.J., rreth 55-vjeçar, dyshohet se është rrëzuar nga kati i dytë gjatë punës në objekt.

Ai ka pësuar lëndime serioze në fytyrë dhe pjesë të tjera të trupit, ndërsa është dërguar me urgjencë në QKUK në Prishtinë, ku është futur në sallën e operimit.

Sipas mjekëve, gjendja e tij aktualisht raportohet relativisht stabile.

Në vendngjarje kanë dalë njësitë relevante policore dhe Prokurori kujdestar, ndërsa janë intervistuar tre dëshmitarë dhe dy persona të dyshuar.

Si të dyshuar janë intervistuar:

Shqipdon Maliqaj, rreth 37-vjeçar, në cilësinë e Koordinatorit për Siguri dhe Shëndet në Punë;
Rrezon Sylaj, rreth 20-vjeçar, si përfaqësues juridik i kompanisë “Qami Construction”.

Pas intervistimit, me vendim të Prokurorit, koordinatori për siguri në punë është ndaluar për 48 orë dhe është dërguar në Qendrën e Mbajtjes në Prishtinë.

Ndërkohë, i dyshuari tjetër është liruar në procedurë të rregullt.

Rasti po hetohet për veprën: “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

33. Kontrolli rutinë në Pejë zbulon armë në Audi A8 – 24-vjeçari e pranon në vend

Një kontroll rutinë policor gjatë orëve të para të mëngjesit në Pejë ka çuar në zbulimin e një arme pa leje brenda një veture luksoze Audi A8.

Ngjarja ka ndodhur më 9 maj 2026, rreth orës 01:05, në rrugën “4 Dëshmorët” në fshatin Zllapek të Pejës.

Patrulla policore kishte ndaluar për kontroll një Audi A8 me ngjyrë të bardhë, ndërsa gjatë bastisjes së veturës është gjetur një armë e tipit “Zoraki”, e fshehur te fioka pranë ulëses së pasagjerit.

Bashkë me armën janë gjetur edhe:

një karikator,
dhe gjashtë fishekë.

Pasagjeri i veturës, Valjet Ahmetaj, rreth 26-vjeçar, dyshohet se e ka pranuar menjëherë para Policisë se arma ishte e tij dhe se nuk posedonte leje për armëmbajtje.

Ndërkohë, shoferi i veturës, Ajet Ahmetaj, rreth 39-vjeçar, ka deklaruar se nuk kishte njohuri për armën që ndodhej në automjet.

Në vendngjarje kanë dalë hetuesit dhe krimteknika, të cilët kanë kryer ekzaminimet dhe kanë sekuestruar armën në cilësinë e provës materiale.

Pas intervistimit në Stacionin Policor në Pejë, me urdhër të Prokurorit kujdestar, i dyshuari është liruar në procedurë të rregullt.

Rasti po hetohet për veprën: “Mbajtje në pronësi apo kontroll të paautorizuar të armëve”.

34. Vozitësi humb kontrollin me “Fiat Punto” në rrugën Mitrovicë–Jarinje, përfundojnë të lënduar dy të rinj

Një vetaksident trafiku ka ndodhur mbrëmjen e së enjtes në rrugën nacionale Mitrovicë–Jarinje, ku dy të rinj kanë mbetur të lënduar pasi vetura doli jashtë rrugës dhe përfundoi në shkurre.

Aksidenti ka ndodhur rreth orës 18:45 në fshatin Jezero.

Në aksident ishte i përfshirë një automjet civil “Fiat Punto” me ngjyrë hiri, që drejtohej nga L.F., rreth 20-vjeçar.

Sipas informatave, deri te aksidenti dyshohet të ketë ardhur pasi shoferi nuk e kishte përshtatur shpejtësinë me kushtet e rrugës.

Si pasojë, ai humbi kontrollin mbi veturën, doli nga rruga në anën e djathtë dhe u përplas në disa shkurre pranë rrugës nacionale.

Nga aksidenti kanë mbetur të lënduar drejtuesi i veturës, si dhe pasagjerja T.N., rreth 17-vjeçare.

Të dy fillimisht kanë marrë ndihmën e parë në Shtëpinë e Shëndetit në Leposaviq, ndërsa më pas janë dërguar për trajtim të mëtejshëm në Spitalin e Mitrovicës së Veriut.

Rasti po hetohet nga Policia.

35. “Fantazma” e veturave në Prishtinë? Dyshohet për 113 vjedhje – kapet pasi mori 8 mijë euro nga një BMW

Një skemë vjedhjesh që dyshohet se kishte terrorizuar pronarët e veturave në Prishtinë ka çuar në arrestimin e një personi që Policia e lidh me mbi 100 raste të ngjashme.

Gjithçka nisi më 2 maj në rrugën “Hajdar Dushi”, kur Y.G., rreth 21-vjeçare, parkoi BMW-në e saj të zezë rreth orës 12:55, pa e ditur se vetëm pak minuta më vonë do të mbetej pa mijëra euro.

Kur ajo u kthye rreth orës 13:35, gjeti veturën e hapur dhe kuptoi se nga brenda mungonin rreth 8 mijë euro para të gatshme.

Gjatë hetimeve, pas analizimit të kamerave të sigurisë dhe informacioneve operative, hetuesit e Policisë së Kryeqytetit arritën ta identifikojnë dhe arrestojnë Qemajl Mehmetin, rreth 47-vjeçar.

Sipas burimeve, ai nuk dyshohet vetëm për këtë rast.

Hetuesit e lidhin të njëjtin me plot 113 raste vjedhjesh të këtij modeli, kryesisht thyerje veturash dhe marrje të parave apo sendeve me vlerë brenda tyre.

Pas arrestimit, i dyshuari është intervistuar nga hetuesit në Prishtinë dhe me vendim të Prokurorit të Shtetit është dërguar në ndalim për 48 orë.

Hetimet janë në vazhdim.

36. Nga dhuna në familje te arma ilegale – çka iu gjet 31-vjeçarit në Lipjan?

Detaje të reja kanë dalë në rastin e A.Rr., rreth 32-vjeçar, i cili ndodhet në ndalim për dhunë në familje, pasi Policia ka zbuluar edhe një armë që dyshohet se mbahej ilegalisht.

Më 8 maj 2026, rreth orës 11:05, Stacioni Policor në Lipjan ka pranuar informacion nga Policia e Rahovecit se i dyshuari, i arrestuar më herët për dhunë në familje, posedonte armë zjarri.

Rreth orës 11:35, hetuesit policorë, në koordinim me Prokurorin e Shtetit, kanë shkuar në fshatin Shalë të Lipjanit, ku kanë kontaktuar me babanë e të dyshuarit.

Arma është gjetur pasi vetë A.Rr. kishte treguar se ku ndodhej.

Në vendngjarje është sekuestruar:

një armë me gaz e tipit “Ecol Special 99”,
një karikator,
dhe 41 fishekë me gaz.

Pjesa e numrit serik të armës dyshohet se ishte e fshirë.

Pas konsultimit me Prokurorin, ndaj të dyshuarit është iniciuar edhe rast i ri penal për “Mbajtje në pronësi të paautorizuar të armës”.

I njëjti pritet të intervistohet nga hetuesit e Rahovecit në prezencë të avokatit mbrojtës, pasi aktualisht ndodhet në ndalim 48-orësh për rastin e dhunës në familje.

37. Goditi policin në fytyrë gjatë arrestimit në Prishtinë – përfundon në ndalim 48-orësh

Një person ka përfunduar në pranga pasi dyshohet se sulmoi fizikisht një zyrtar policor gjatë realizimit të një urdhërese në Prishtinë.

Ngjarja ka ndodhur më 8 maj 2026, rreth orës 09:40, në rrugën “Gjon Sereqi” në Prishtinë.

Njësitë policore për realizimin e urdhëresave kishin ndërhyrë për ta ndaluar të dyshuarin Fatmir Kalaja, rreth 58-vjeçar, kur situata ka eskaluar.

Gjatë intervenimit, i dyshuari dyshohet se e ka goditur me grusht zyrtarin policor në pjesën e nofullës, duke i shkaktuar lëndime trupore.

Polici i lënduar ka marrë trajtim mjekësor në QKUK, ndërsa kolegët e tij kanë neutralizuar dhe arrestuar menjëherë të dyshuarin në vendngjarje.

Pas arrestimit, Fatmir Kalaja është shoqëruar në Stacionin Policor “Veriu”, ku janë intervistuar edhe dëshmitarët dhe zyrtari policor në cilësinë e viktimës.

I dyshuari është marrë në pyetje në prezencë të avokatit mbrojtës nga hetuesit rajonalë.

Me udhëzim të Prokurorit kujdestar, rasti është iniciuar si “Sulm ndaj personit zyrtar”, ndërsa ndaj të dyshuarit është caktuar masa e ndalimit për 48 orë.