Në një anije turistike holandeze në Oqeanin Atlantik, të paktën dy persona kanë humbur jetën nga një infeksion i rrugëve të frymëmarrjes, me shumë gjasë pas infektimit me hantavirus.
Agjencia franceze e lajmeve AFP shkruan, duke iu referuar një burimi anonim, se bëhet fjalë për një çift holandez, 70 dhe 69 vjeç. Ministria e Punëve të Jashtme ende nuk mund ta konfirmojë këtë.
Një person i tretë ndodhet në kujdes intensiv në Johanesburg të Afrikës së Jugut. Ky britanik 69-vjeçar ka rezultuar pozitiv me hantavirus, thotë një zëdhënës i Ministrisë së Shëndetësisë së Afrikës së Jugut për AFP.
Anije turistike polare
Viktimat ishin pasagjerë të anijes turistike polare holandeze MV Hondius, në Oqeanin Atlantik. Anija ishte nisur nga Ushuaia në Argjentinë drejt Kepit të Gjelbër. Kompania detare Oceanwide Expeditions nga Scheveningen ende nuk ishte e disponueshme për koment.
Organizata Botërore e Shëndetësisë është njoftuar për zhvillimet. “Po zhvillohet një hetim dhe është në proces një reagim i koordinuar ndërkombëtar i shëndetit publik. Do të ndajmë më shumë informacion sapo të jetë i disponueshëm”, deklaron OBSH për AFP.
Hantavirusi
Ekzistojnë disa variante të hantavirusit, i cili transmetohet nga brejtësit. Njerëzit mund të sëmuren nga kafshimi i një kafshe të tillë ose nga jashtëqitjet e saj. Gjithashtu, mund të thithen grimca të thata pluhuri të kontaminuara.
Hantaviruset mund të shkaktojnë infeksione të rrugëve të frymëmarrjes ose temperaturë të rëndë me probleme në veshka. Ndër simptomat përmenden lodhja, temperatura, të përzierat dhe dhimbja e kokës. Viruset nuk transmetohen nga njeriu te njeriu./TN
