Kryeministri në detyrë i Kosovës, Albin Kurti, ishte i ftuar në emisionin “Interaktiv” në KOHAVISION, ku foli për zgjedhjet e reja të 7 qershorit, krizën institucionale, bllokadën politike, çështjen e presidentit, raportet me opozitën dhe synimin e Lëvizjes Vetëvendosje për një fitore edhe më të madhe.
Më poshtë intervista e plotë:
Gazetari: Mirëmbrëma të nderuar shikues të KOHAVISIONIT, jemi drejtpërdrejt nga Prishtina dhe sonte do të fillojmë një edicion jo të rëndomtë të “Interaktivit”, pasi e filluam më herët dhe do të kemi sonte në intervistë kryeministrin në detyrë, zotin Albin Kurti, i cili njëherësh është edhe kandidat i Lëvizjes Vetëvendosje për kryeministër në zgjedhjet e 7 qershorit. Mirëmbrëma, zoti kryeministër.
Albin Kurti: Mirëmbrëma dhe mirë se ju gjej. Faleminderit për ftesën.
Gazetari: Faleminderit që jeni me ne. Do të nisim patjetër me zgjedhje të reja. Brenda 20 muajsh, ne tashmë po hyjmë në një cikël të ri zgjedhor, tre palë zgjedhje, dhe në fakt pyetja kryesore është nëse këto janë të fundit për këtë vit.
Albin Kurti: Nuk mund ta dimë, por besoj që po. Nuk kanë qenë të nevojshme këto zgjedhje dhe këtu, paradoksalisht, ka një konsensus. Të gjithë e pranojnë se zgjedhjet nuk kanë qenë të nevojshme, se këto janë zgjedhje të përsëritura dhe, thua se për ta konfirmuar këtë gjë, e morëm edhe njëherë numrin tonë që kishim më 28 dhjetor, pra 11/6 si Lëvizje Vetëvendosje me partnerët tanë, Guxo, Alternativa dhe PSDK.
Mbi 10 milionë euro kushton organizimi i këtyre zgjedhjeve, ndërkohë dhjetëra miliona të tjerë rrezikohen, por jemi ku jemi për shkak se tashmë kemi një entitet të konsoliduar politik, do të thosha, që është blloku opozitar përkundrejt qeverisë dhe Lëvizjes Vetëvendosje, dhe që përdor aspekte të ndryshme kushtetuese, procedurale, vetëm dhe vetëm që ne të mos mund të ecim përpara me shpejtësinë e duhur.
Pra, nuk ka ndonjë ndalim. Unë jam kryeministër në detyrë, nuk punoj më pak sesa kur isha kryeministër fuqiplotë. Kemi presidenten në detyrë, zonjën Albulena Haxhiu. Pra, shteti funksionon dhe ecën, mirëpo shpejtësia zvogëlohet dhe unë besoj që kjo vjen kryekëput për shkak të këtij entiteti që do ta quaja bllok opozitar.
Gazetari: Megjithatë, tre pozitat shtetërore funksionojnë, siç thoni ju dhe siç është realiteti, me ushtrues detyre. Ju thoni që i kryeni të gjitha detyrat, por nuk është se shihet kështu edhe nga jashtë. Për shembull, patëm komisioneren për zgjerim, Marta Kos, e cila fliste për jostabilitetin politik. Fonde të caktuara nuk mund të kemi qasje në to dhe ka shumë telashe me qeveri të cilat janë kujdestare, le të themi, nuk janë fuqiplota. Madje edhe për çështje më të mëdha, ju gjithsesi jeni më i rezervuar për të marrë vendime të mëdha, apo jo? Pra, nuk është se…
Albin Kurti: Jo, nuk është njësoj. Veç po dua të them që ne jemi në ballë të përgjegjësisë, me gjithë çka dimë e mundemi, në përputhje me Ligjin për Qeverinë dhe Kushtetutën e Kosovës, që institucionet e shtetit të funksionojnë në mënyrë efikase dhe demokratike.
Shpejtësinë e dikurshme nuk e kanë, imazhi i Kosovës është cenuar, mirëpo edhe nga aktorët ndërkombëtarë ka mirëkuptim për Qeverinë e Republikës së Kosovës. Prandaj ju edhe patë vizitën e komisioneres Kos, e cila megjithatë ishte me përplot vlerësime për vendin tonë.
Tash, ka disa afate të cilat ne mund të mos i mbërrijmë për shkak se nuk kemi Kuvend. Kuvendi është vendi ku, në fakt, lulëzon opozita. Me këto bllokime, ata para së gjithash kanë bllokuar veten, sepse kanë privuar veten nga skena e tyre. Kuvendi i Republikës së Kosovës është vendi ku qeveria është bashkë me opozitën dhe këtë vend të përbashkët nuk e kemi më.
Gazetari: Dakord, por ju e quani bllokadë nga opozita, bllok opozitar, i cili nuk është se funksionoi fort si bllok gjatë gjithë kësaj kohe të këtij ngërçi politik që pamë, zoti Kurti. Kemi parë ndarje të caktuara brenda bllokut opozitar. Çështja është që ju tashmë keni hyrë në vitin e gjashtë të qeverisjes, pesë vjet, një muaj e 27 ditë, nga numërimi që i bëra. Shoh që po qeshni, besoj ju pëlqejnë edhe këto numrat.
Po çështja është që, zoti Kurti, pas gjithë kësaj kohe në qeverisje, besoj që për çështjen e presidentit mund të gjendej një zgjidhje e cila do t’i linte të funksiononin institucionet në mënyrë të drejtë dhe në mënyrë efikase, plotësisht efikase.
Pra, ju një kohë, për çështjen e presidentit dhe presidencën, e shihnit si noteri. Tash për një çështje tjetër, kritikët tuaj thonë: ç’u bë tash që u bë kaq e rëndësishme sa të mos arrihet një konsensus?
Albin Kurti: Së pari, nuk është mirë të dekontekstualizohen deklaratat. Unë i kam thënë ato në një moment të caktuar, për një çështje shumë aktuale para shumë viteve. Unë nuk kam as pretendim që mund të jap deklarata universaliste, jashtëkohore, siç më përshkruan. Pra, duhet ta shikoni kur e kam thënë. Ndoshta ai ish-presidenti dikur ka provuar që të bëjë diçka të paimagjinueshme kundër shtetit, që unë jam përgjigjur dhe kam reaguar asisoj.
E para. E dyta, edhe unë kam besuar që do të mund ta gjejmë një zgjidhje për president konsensual, për shkak se në Republikën e Kosovës ka shumë figura nga jeta e akademisë, shkencës, kulturës, artit e sakrificës që do të mund të bëheshin president, mirëpo nuk u bë e mundur për shkak se bllokada e vitit 2025 u zgjat edhe në vitin 2026.
Mos harroni, kjo nuk është bllokadë e re. Së pari, nuk e deshën Albulena Haxhiun për kryetare të Kuvendit. Gati 10 herë u refuzua. Gruaja më e votuar u stigmatizua me gjithëfarë epitetesh. I thoshin përçarëse, konfliktuoze, i thoshin madje edhe terroriste lidhur me gazin lotsjellës në Kuvendin e Republikës e kështu me radhë.
Kur Gjykata Kushtetuese e solli një aktgjykim që ishte super kreativ, ku vetëm tri herë ti mund të sjellësh emrin e njëjtë, ndërkohë që nuk e mori edhe shembullin e presidentit që zgjidhet me votë të fshehtë, sepse votimi i fshehtë nuk u lejua për Albulena Haxhiun, e ndërruam emrin. Provuam me Donikën, provuam me Hekuranin, provuam me Arbrien. Në fund Dimali funksionoi shkurtimisht, sepse më pastaj nuk më pranuan mua për kryeministër.
Dhe mua m’u krijua përshtypja se sinqerisht e kanë me emrin tim dhe emrit tim ia shtuan edhe emrin e Albulenës. Mirëpo, kur refuzuan edhe Glauk Konjufcën, që të gjithë deputetët opozitarë pranojnë se është më i pranueshmi nga Vetëvendosja për opozitën, atëherë nuk ke se si të mos e quash bllok opozitar. Dhe ky bllokim i këtij blloku vazhdoi edhe në vitin…
Gazetari: Sa keni kontribuar ju? Pra, ju, zoti kryeministër, jeni njeriu më i votuar në historinë më të re bashkëkohore të Republikës së Kosovës. Sa besoni që ju keni sadopak përgjegjësi në botëkuptimin tuaj, pasi kritikët tuaj ju japin shumë përgjegjësi, meqenëse ju keni fituar 51 për qind, diçka jo parë në republikën tonë në zgjedhjet e fundit të 28 dhjetorit? Prandaj, sa i jepni vetes përgjegjësi për këtë çështje?
Albin Kurti: Tash, kjo pyetja juaj do një përgjigje konkrete dhe nëse nuk është akuzë, konkretisht, çfarë bëmë ne? Ne ndërruam emrat në vitin 2025 dhe prapë u refuzuam. Çfarë bëmë në vitin 2026? Fillimisht synuam një president konsensual, nuk arritëm në dakordim.
Asnjë takim me opozitën nuk është zhvilluar me iniciativë të tyre. Që të gjitha takimet i kam iniciuar unë, nganjëherë jam përgjigjur.
Gazetari: Kjo është shumë normale. Ju jeni fitues, jeni më i madhi, keni hisen më të madhe pas zgjedhjeve.
Albin Kurti: Unë besoj që kjo është normalizuar, sepse shteti nuk është veç imi. Shteti nuk është veç i qeverisë. Bile, presidenti duhet të jetë shprehje e unitetit. Për president do të ishte normale që iniciativën për takim ta bëjë ndonjëherë dikush i opozitës.
Gazetari: Besoj që është në rregull, le të themi, ama do të ishte jonormale që ta thërrasë kryeministrin një lider opozitar për të biseduar për çështjen e presidentit.
Albin Kurti: Jo, absolutisht. Por kur jeni më i madhi, gjithsesi keni edhe përgjegjësinë më të madhe. Unë nuk e mohoj që jam më i madhi. Unë veç po them që edhe opozita po të merrte iniciativa do të ishte një gjë normale që nuk e pamë.
Gazetari: Mirë, ju kishit takime, por ju nuk gjetët në asnjë mënyrë konsensus.
Albin Kurti: Takimet ishin një fillim i mbarë, kalonin në atmosferë konstruktive. Propozime jepja vetëm unë, por rezultati nuk ndryshonte. Pra, qartazi partitë opozitare të këtij blloku kishin ndryshuar sjellje dhe pamje ndoshta, por jo edhe qëndrime.
Gazetari: Dhe pasi nuk gjetët një figurë konsensuale, atëherë natyrisht që provuat të bashkëqeverisni me ta, siç keni provuar edhe në vitin 2025. Kryetarit të LDK-së i ofruat pozitën e zëvendëskryeministrit dhe katër ministri. Ata kanë 15 deputetë, ju ishit 66. Është dyfishi i partisë Guxo në qeverisje, e cila ka garuar në listë me ju. Me ata që kanë garuar kundër jush, ju ua ofruat dyfishin atyre që kanë garuar me ju. Pse vjen ky refuzim, zoti Kurti? Sepse këtë kontekst e kam dëgjuar nga ju edhe në raste të tjera dhe në rregull, konteksti është i rëndësishëm, sidomos për “Interaktivin”, që i kontekstualizojmë gjërat përgjithësisht. Po cili është motivi që ju refuzon LDK-ja, për shembull?
Albin Kurti: Mbase do të mund të arrijmë aty po ta shohim pak më hollësisht kronologjinë.
Herën e dytë, kur e pashë që nuk po pranohen bashkëqeverisje, meqenëse thanë “nuk mund t’i kesh tri pozitat shtetërore” – kryeministrin, presidentin dhe kryetarin e Kuvendit – atëherë thashë: mirë pra, le ta bëjmë një rokadë ku Lidhja Demokratike e Kosovës, nënkryetari i saj ose kryetari i subjektit mund të bëhen kryetar Kuvendi dhe Albulena postohet nënkryetare.
Thanë jo, sepse ti po e dojshe presidentin veç për veti. Aq shumë po e donshe presidentin, saqë qenke në gjendje me na dhënë kryetarin e Kuvendit.
Provova këtë të fundit edhe me PDK-në. Thashë: merreni kryetarin e Kuvendit, qoftë nënkryetarja e Kuvendit nga radhët e PDK-së, qoftë kryetari i subjektit politik që ishte zgjedhur rishtazi, dhe ne po spostohemi në vendin e nënkryetarit. Edhe ata thanë: nuk vjen në konsiderim.
Kur e pashë që po pretendojnë se unë me çdo kusht e dua pozitën e presidentit, e diskutuam në Kryesinë e Lëvizjes Vetëvendosje dhe erdhëm në përfundim që ata të cilët i kishim nxjerrë ne si kandidatë do të mund të tërhiqeshin, në rast se ata sjellin tre emra.
Ne kishim paraqitur kandidaturën e Glauk Konjufcës, mbi 318 mijë vota, më pak se 30 orë para mesnatës ndërmjet 5 dhe 6 marsit, dhe vetëm pak orë para asaj mesnate, Fatmire Kollçaku-Mullhaxha. Pra, nuk e kemi vendosur Glaukun edhe Fatmiren me shumë dëshirë, por për shkak se është e pafalshme që për konstituimin e institucioneve të mos propozojë askush asnjëherë asgjë.
Dhe kur sollëm tre emra, u refuzuam sërish.
Opozita ka mundur sot, që po flasim, ta ketë presidentin të garantuar nga njëri prej tre emrave që i propozojnë ata. Ata bashkë mund ta bëjnë veç një kandidaturë. LDK-ja vetëm gjysmë kandidature, PDK-ja veç dy të tretat e një kandidature. Edhe me 22 deputetë do të duhej t’i kishin 30 nënshkrime.
Gazetari: Po dimë numrat, por ju keni vetëm 66 numra dhe ju duhen të paktën 80 të uleshin në sallë, të ishin prezent për kuorumin, siç e parasheh Kushtetuta.
Megjithatë, ju pastaj morët edhe një lëvizje tjetër, zonjën Feride Rushiti. Dhe gjatë një periudhe të shkurtër kohore u bënë shumë rokada, zoti Kurti.
Besoni që ju kështu edhe opozitës, por edhe opinionit publik, i dhatë një huti duke bërë shumë propozime? Tash ju mund të argumentoni që po mos të jepnit propozime do të ishte problem, por në anën tjetër, a ndërtohet mirëbesimi me rokada të shpeshta dhe brenda orësh?
Për shembull, kur po përmendni mundësinë që t’ia lini tre emra opozitës, një natë përpara ju dolët me një video e cila ishte goxha akuzuese ndaj opozitës për bllokadën. Pastaj disa orë më pas ju dolët me propozimin.
Ka qenë ditë e shtunë, sa më kujtohet. Pra, a keni ndërtuar ju një klimë mirëbesimi sado pak?
Albin Kurti: Nëse ka vullnet nga ana tjetër, kur ne themi “na i sillni tre emra”, ju keni në rastin më të mirë 37 nënshkrime – 22 plus 15 – dhe rrjedhimisht për tre emra mungojnë edhe 53 nënshkrime.
Mirëpo nuk ka nevojë për 53 nënshkrime, sepse i kemi 66. Mund të shkojmë te 103. Juve ju mungon ndonjë, neve na mungon ndonjë, mbi 90 jemi me siguri. Tre kandidatura do t’i kishim.
Pra, ne propozuam këtë. Pajtohem, ishte diku rreth të shtunës. Mirëpo kur ka vullnet, atëherë është mjaftueshëm kohë. Kanë mundur të më thonë: “Ma jepni një ditë më shumë”, “Na jepni dy ditë më shumë”.
Kur ka vullnet. Mirëpo ata brenda orësh thanë jo.
E kuptoni pra, ajo çka ishte nxituar nuk ishte propozimi ynë, nuk ishte denduria e propozimeve tona, por denduria e refuzimeve të tyre.
Ne propozime, ata refuzime.
Gazetari: Po, densiteti që ju jepnit…
Albin Kurti: Po janë politikanë, natyrisht. Okej, mund të jeni politikan aktiv, por ajo çfarë shkaktoi më pas është ajo çfarë e dimë.
Pra, tani ne jemi në një proces, siç e thamë në fillim, proces zgjedhor dhe duket sikur LDK-ja nuk pranoi t’ju bashkangjitej në koalicion. Nuk kishte besim në ju. Kanë shprehur kështu haptazi publikisht.
Tashmë ka një pozicion tjetër ku ish-presidentja Vjosa Osmani ju ka bashkangjitur këtij subjekti.
Si ia bëni ju me numrat? E di që tash është pyetje hipotetike, por ne duhet të flasim vetëm me çështje hipotetike, sepse realiteti i vetëm që dimë sot është që 7 qershori është ditë zgjedhje.
Tjetër nuk mund të hamendësojmë. Si ia bëni ju pas 7 qershorit? Do t’i siguroni numrat?
Albin Kurti: Më 9 shkurt të vitit 2025 arritëm 42 për qind. Të parët, 42 për qind dhe më shumë se i pari dhe i dyti marrë së bashku.
Tash, më 28 dhjetor dolëm sërish të parët me 51.1 për qind.
Me këtë rast, jemi më shumë jo vetëm se i pari, i dyti dhe i treti së bashku, por edhe këtyre duhet t’ua shtosh një të tretën e votave që të mbërrijnë tek ne.
Pra, përmasa është gjigante. Rrjedha është e qartë. Nuk do të duhej të kishim zgjedhje.
Mirëpo tash, meqenëse 42 për qind nuk mjaftonte, u bë 51 për qind. Nëse nuk mjafton 51 për qind, ndoshta ju del boll 60 për qind.
Gazetari: Pra ky është synimi juaj, të shkoni 60 për qind?
Albin Kurti: Po normalisht, ne dëshirojmë të fitojmë gjithnjë e më shumë.
Unë nuk kam nevojë për një fitore të re, por duket që blloku opozitar ka nevojë për një humbje të re.
Gazetari: Mirë, por nëse arrihet 60 për qind, nga aspekti demokratik, unë e di që ky është synimi juaj, ju jeni politikan, por sa e dëmton realisht demokracinë? Sepse modeli që kemi i demokracisë, megjithatë, ju jep pastaj pushtet absolut të vendosni mbi çdo çështje. Dhe shumëkush ju akuzon pikërisht për këtë, zoti Kurti, që ju po tentoni të kontrolloni të gjitha levat e pushtetit nga do që mundeni.
Albin Kurti: Pakrahasimisht më shumë dëm për shtetin tonë janë këto zgjedhjet e përsëritura sesa një subjekt t’i marrë mbi 60 për qind.
Atëherë kur blloku opozitar keqpërdor një aktgjykim të Gjykatës Kushtetuese nga e kaluara, që thuajse kanë pasur motiv ta shkruajnë e jo ta interpretojnë Kushtetutën, duke vënë atë kuorumin prej 80 vetave në sallë, kur dihet shumë mirë që në raundin e tretë mund të kalosh me 61.
Dhe patë Feride Rushitin, lideren e shoqërisë sonë civile, i mori 63 vota. Pra, Kosova president ka, Kosova nuk pati kuorum për shkak të bllokimit opozitar.
Gazetari: Po s’mund të ketë president. Kjo është…
Albin Kurti: Po shiko, është një kontradiktë. Shkoni lirisht ku të doni në vendet demokratike perëndimore dhe thoni që një grua, lidere e shoqërisë civile, i mori me votë të fshehtë 63 vota edhe prapë nuk u bë presidente. Nuk është që nuk do të çuditen dhe nuk është që nuk do të bombardoheni ju me pyetje si gazetar.
Gazetari: Për dallim prej meje, zoti Kurti, kushdo që e shtron atë pyetje, është korniza kushtetuese që e përcakton që duhet të jetë kuorumi. Tani ajo është vendosur për një arsye.
Albin Kurti: Nuk jam i sigurt që Kushtetuta e thotë ashtu, por një aktgjykim i Gjykatës Kushtetuese, me një aktivizëm të jurisprudencës së përbërjes së asaj kohe, ka ardhur me një konkluzion të tillë. Sidoqoftë, ne nuk e respektojmë, nuk e vlerësojmë, por e zbatojmë.
Gazetari: Ju vetëm e zbatoni, por gjithsesi shoh që keni në njëfarë mënyre vërejtje. Do të jetë Feride Rushiti sërish kandidate për presidente të Republikës?
Albin Kurti: Feride Rushiti ka ofruar kandidaturën në krizë të jashtëzakonshme dhe unë jam përjetësisht falënderues për këtë. Nuk është kollaj për liderin e shoqërisë civile ta braktisë një organizatë që është më e suksesshmja në shoqërinë tonë dhe të hyjë midis krize përkundrejt një blloku opozitar.
Dhe kishte shumë presione që të tërhiqej. Ju keni parë, ka pasur deputete dikur nga opozita që e kanë lavdëruar, e të cilat kërkonin që të tërhiqej nga gara. Pra, një grua i thoshte një gruaje tjetër: tërhiqu nga gara, ndërkohë që e kishte lavdëruar paraprakisht.
Gazetari: Por kjo ishte për t’i dhënë kontekst. Ata besonin që zonja Rushiti do të ishte në funksion tuajin, që do të ishte një “mashë” për pushtetin tuaj. Shikoni, kjo ishte kritika që ju jepej, zoti Kurti.
Albin Kurti: Duke mos e kuptuar peshën e institucioneve të shtetit, të Republikës si të përbashkëtës sonë, funksionimin demokratik, këta po mendojnë që unë jam shteti.
Unë nuk jam shteti. Unë jam vetëm kryeministër dhe atë kryeministër në detyrë. Unë nuk jam Luigji XIV.
Unë kam thënë: merreni pozitën e presidentit ju tre. Merreni. Sillni tre emra. Njëri prej tre emrave që ju i sillni mund të bëhet president. Edhe kësaj i kanë thënë jo.
Pra, çfarëdo që bënim ne, përgjigjja ishte jo.
Gazetari: Por ju, zoti Kurti, e dini që edhe opozita ka frikën e vet politike. Ata thonë se ju kërkoni presidentin, kryeministrin, kryetarin e Kuvendit dhe shumicën parlamentare. Pra, nga këndvështrimi i tyre, nuk është vetëm çështje emrash, por është çështje balanci institucional.
Albin Kurti: Balanci institucional nuk bëhet duke bllokuar institucionet. Balanci institucional bëhet duke marrë përgjegjësi. Nëse opozita pretendon që dëshiron balancë, atëherë le të hyjë në institucione, le të propozojë, le të votojë, le të marrë përgjegjësi.
Por ata nuk donin as të propozonin, as të votonin, as të merrnin përgjegjësi. Donin vetëm të pengonin.
Gazetari: Pra, sipas jush, zgjidhja është që qytetarët t’ju japin edhe më shumë vota më 7 qershor?
Albin Kurti: Zgjidhja është që qytetarët ta qartësojnë edhe më shumë vullnetin e tyre. Ata e kanë bërë këtë njëherë me 42 për qind, pastaj me 51.1 për qind. Nëse dikush nuk e kupton as këtë, atëherë qytetarët do ta thonë edhe më fuqishëm.
Gazetari: Por a nuk është kjo një mënyrë për të thënë se vetëm një shumicë shumë e madhe e Vetëvendosjes mund ta bëjë shtetin funksional?
Albin Kurti: Jo. Është mënyrë për të thënë se nuk mund të lejohet që një pakicë politike ta mbajë peng shumicën qytetare. Demokracia është garë, është përfaqësim, është debat, por nuk është sabotim.
Gazetari: A pranoni se ndoshta edhe qasja juaj ka qenë përjashtuese?
Albin Kurti: Nuk e pranoj këtë, sepse faktet flasin ndryshe. Ne kemi ftuar në takime, kemi propozuar emra, kemi ofruar pozita, kemi pranuar rokada, kemi thënë sillni ju emrat. Nëse kjo quhet përjashtuese, atëherë çfarë do të ishte përfshirëse?
Gazetari: Mirë, por opozita thotë se ju i bëni ofertat kur jeni në krizë, jo si partneritet të sinqertë politik.
Albin Kurti: Nuk mund ta pranoj këtë. Kriza është e institucioneve, jo e imja personale. Dhe në krizë institucionale, të gjithë duhet të kontribuojnë. Nuk mundet njëra palë të thotë: ti je në krizë, prandaj unë nuk hyj. Sepse nëse shteti është në krizë, kriza është e të gjithëve.
Gazetari: Pra, nuk ndiheni përgjegjës personalisht për këtë ngërç?
Albin Kurti: Ndjej përgjegjësi si kryeministër në detyrë dhe si fitues i zgjedhjeve. Por përgjegjësia nuk është faj. Përgjegjësia ime ka qenë të propozoj zgjidhje. Faji është i atyre që i kanë refuzuar të gjitha zgjidhjet.
Albin Kurti: Unë kam thënë: merreni pozitën e presidentit ju, tre kandidatura na i sillni ju dhe e votojmë njërin prej tyre.
Gazetari: E qartë. Do të jetë kjo oferta, zoti Kurti? Të mbesim më konciz, tash jemi në zgjedhje.
Albin Kurti: Ne duhet të flasim më 8 qershor. Por kur këta i refuzojnë tre kandidatura të vetvetes së tyre, që unë ua garantoj se njëri zgjidhet, këtu nuk kemi të bëjmë me…
Gazetari: Jemi edhe në shkurt…
Albin Kurti: Për t’u kthyer te pyetja juaj, cili është motivi pse po bëhet kjo? Kur ka marrë çmimin “Saharov”, Adem Demaçi në vitin 1991 në Parlamentin Evropian, në atë fjalimin e tij të famshëm e ka thënë një fjali që m’u kujtua tash: “Logjika e blloqeve e bllokon logjikën”.
Në Kosovë keni bllok opozitar.
Gazetari: Po veç se konteksti kur zoti Demaçi ka thënë dhe konteksti i sotëm dallojnë goxha shumë, apo jo, zoti Kurti?
Albin Kurti: Po, dallojnë. Ai e ka thënë për fuqitë e mëdha, mirëpo në këtë miniaturën tonë ka njëfarë asociacioni, ka njëfarë ngjashmërie, në kuptimin që e përbashkëta e tyre është vetëm kundërshtia ndaj meje, pavarësisht se çka bëj.
Gazetari: Pra, ju tani për tani nuk keni kandidat për president, siç ka LDK-ja zonjën Vjosa Osmani. Pse nuk e keni bërë më transparente, meqenëse po thirreni që ju keni qenë hapur me propozime? Pse tash nuk keni ju kandidat për president, kur në shkurt të 2021-s ju kishit zonjën Osmani kandidate për president në zgjedhje parlamentare?
Albin Kurti: Deklaratën që thashë më herët, unë e dhashë kontekstin. Thashë Parlamenti Evropian, Adem Demaçi. Pra, kur të citojmë diçka, le ta japim edhe kontekstin. Unë nuk them që janë situata identike.
Sa i përket presidentes, presidentit të ardhshëm, duhet të jetë konsensual, për bindjen time të qartë, si shprehje e unitetit popullor. Duhet të jetë jashtë skenës politike, të jetë mbipartiak dhe të jetë dikush i cili nuk është pjesë e polemikave të aktualitetit.
Dhe unë besoj që Kosova ka këso emrash. Mirëpo, nëse nuk kalojmë përtej bllokimit të logjikës, është vështirë të gjendet konsensual.
Gazetari: Shumë mirë, po e kuptojmë këtë që po e thoni. Tani, me këtë që po thoni, ju po ia mbyllni derën LDK-së, që tash mund të keni edhe koalicion, nëse zonja Osmani nuk do të tërhiqej prej kandidaturës. A është ky qëndrimi juaj?
Albin Kurti: Po shikoni, ne nuk kemi asnjëherë kandidaturë si Lëvizje Vetëvendosje për president. Nuk kemi kandidaturë ne. Nuk kemi pasur as në zgjedhjet e 28 dhjetorit.
Gazetari: Veç në 2021 keni pasur.
Albin Kurti: Ta shohim. Kur e kemi parë rezultatin e 2021-s, kemi qenë 50.3 për qind dhe ka qenë një situatë e jashtëzakonshme. Ju e dini shumë mirë…
Gazetari: Po, por kjo e jashtëzakonshme duket edhe kjo, zoti Kurti.
Albin Kurti: …të rrëzuar mua në pranverën e vitit 2020, midis pandemisë, në Kuvendin e Republikës, dhe më pastaj sesi u ktheva, por nuk u lejova të garoj. Ju e mbani mend, unë kam qenë numër një, por votat për mua kanë qenë të pavlefshme.
Gazetari: E kuptueshme, e di.
Albin Kurti: Pra, ajo situatë, në kohën kur unë s’u lejova të garoj, ishte situatë kur kishim kryetarin e Vetëvendosjes të parin që s’lejohej të garojë dhe pastaj…
Gazetari: Mirë…
Albin Kurti: …presidentja e ardhshme, e cila ishte numër dy.
Gazetari: Më besoni që e çmoj kontekstin dhe nuk po e them këtë veç sa për ta thënë, por është e rëndësishme nganjëherë të jemi më konciz në disa gjëra.
Ajo që po ju pyes është: nëse LDK qëndron stoike në qëndrimin e saj që zonja Osmani do të jetë kandidate për presidente, i bie që ajo përjashton veten nga mundësia të ketë marrëveshje koalicioni me Vetëvendosjen pas zgjedhjeve?
Atëherë mbetet PDK-ja. Me PDK-në keni pasur së fundmi atë që pamë në Skenderaj, edhe një dhunë fizike me sulmin që iu bë zotit Hysni Mehani. Sa e largon PDK-në nga Vetëvendosja kjo që ndodhi në Skenderaj me zotin Sami Lushtaku?
Albin Kurti: Edhe njëherë po ritheksoj: unë nuk mendoj që president i Republikës duhet të jetë dikush i cili do pushtet, i cili ka ambicie politike, që ka librezë partie, që është në skenën aktuale dhe që merr pjesë në politikat ditore.
Duhet të jetë mbi palët. Republika demokratike dhe parlamentare e Kosovës nuk e ka presidentin si pol pushteti. Pushteti në shtetin tonë të pavarur është legjislativ, ekzekutiv dhe gjyqësor. Nuk është presidenti poli i katërt, nuk është shtyllë e katërt, është shprehje e unitetit të popullit.
Prandaj na duhet një figurë si Murat Jashari, Feride Rushiti e kështu me radhë. Kjo është bindja ime e fuqishme për të ardhmen tonë përpara.
Gazetari: Kam një pyetje tejet esenciale. Zotin Murat Jashari ju e propozuat për të qenë president, ndërkohë që ai doli me një refuzim. Një natë përpara ju kishit pranuar që ishit në kullën e Jasharëve. A morët ju sinjale që do të ishte ai kandidat për president dhe pse u propozua derisa mund të kishte refuzim paraprakisht? Çfarë ka ndodhur? Kjo ka mbetur pak si mister.
Albin Kurti: Propozimi nuk ka qenë aq formal e zyrtar. Kemi qenë në bisedime e sipër dhe propozimin e ka thënë në mëngjes nënkryetari i parë i Vetëvendosjes dhe zëvendësministri i parë, ministri i Punëve të Jashtme dhe Diasporës, kur është pyetur nga gazetari. As ulur nuk janë, është një qëndrim në këmbë për një çështje krejtësisht tjetër. Ai thotë që do të ishte nder për neve emri i Murat Jasharit dhe pastaj një portal…
Gazetari: Jo, jo, na kemi…
Albin Kurti: Shikoni, ne gjithmonë e kemi dashur atë gjë, por edhe njëherë kemi qenë në ndërtim…
Gazetari: Por a dëshironte edhe zoti Murat Jashari që të ishte president?
Albin Kurti: Unë e kam të qartë atë punë.
Gazetari: Besoni që doli pak keq krejt situata, kur ai doli dhe refuzoi, sepse fundi i fundit njeriu propozohet kur duhet ta kesh marrë vullnetin e tij apo të saj.
Albin Kurti: Ashtu siç ia kishin bërë një lloj prite me kamerë e mikrofon Glaukut, shumëfish më keq ia bënë vetë profesorit të Fakultetit Juridik, Murat Jasharit. Ai media e bëri këtë gjë.
Gazetari: Dhe duhet ta bëjë. Kjo është të marrësh qëndrim, është detyra jote.
Albin Kurti: E kuptoj, po edhe tash, si me thënë, u thanë ato fjalë dhe ja ku jemi tani. Meqenëse ajo nuk u realizua, ne kishim edhe lideren e shoqërisë civile, Feride Rushitin.
Gazetari: Tash, për Feride Rushitin, me gjithë respektin, sepse për zonjën Feride Rushiti kam shumë respekt, por s’ka qenë lidere. Shoqëria civile nuk ka një lidere, ka anëtarë të shoqërisë civile. Ajo ka bërë një punë të jashtëzakonshme për çfarë ka bërë, por ju i referoheni disa herë si lidere e shoqërisë civile.
Albin Kurti: Shikoni, ndoshta nuk ka një lider të shoqërisë civile, mirëpo unë po flas në mënyrë të popullarizuar, bisedore për të. Nuk jam duke folur në mënyrë formale-juridike.
Gazetari: Po, patjetër.
Albin Kurti: Nuk besoj që ka dyshim se Feride Rushiti është një figurë konsensuale në shoqërinë tonë. Nuk është në Parlament, por është në shoqërinë tonë.
Gazetari: S’ka diskutim që është e respektuar, sidomos në vitet e fundit. Kemi edhe të tjerë eksponentë të shoqërisë civile që kanë bërë edhe më shumë se Feride Rushiti, po në epoka të tjera, në dhjetëvjeçarë të tjerë.
Çfarë ju kërkoi PDK-ja?
Albin Kurti: Unë nuk është se kam kontakte me Partinë Demokratike të Kosovës. Mund të kem me ndonjë anëtar të thjeshtë të PDK-së, jo me njerëzit në struktura, përveç me kryetarin e ri të PDK-së, zotin Hamza, me të cilin jam takuar dy herë.
Unë besoj që ka pasur vend të takohemi më shumë dhe në fakt u tha që do të takohemi pas aktgjykimit të Gjykatës Kushtetuese, por ja që kjo nuk ndodhi.
Gazetari: Çfarë ju kërkoi PDK-ja?
Albin Kurti: Unë nuk është se kam kontakte me Partinë Demokratike të Kosovës. Mund të kem me ndonjë anëtar të thjeshtë të PDK-së, jo me njerëzit në struktura, përveç me kryetarin e ri të PDK-së, zotin Hamza, me të cilin jam takuar dy herë.
Unë besoj që ka pasur vend të takohemi më shumë dhe në fakt u tha që do të takohemi pas aktgjykimit të Gjykatës Kushtetuese, por ja që kjo nuk ndodhi.
Gazetari: Pse nuk ndodhi?
Albin Kurti: Nuk më takon mua ta them pse nuk ndodhi. Unë kam qenë i gatshëm. Kam shprehur gatishmëri për çdo takim që do të mund ta çonte vendin drejt zgjidhjes.
Gazetari: Por PDK-ja ju akuzon se nuk keni qenë serioz në bisedime.
Albin Kurti: Nuk është seriozitet të thuash “jo” përpara se të dëgjosh propozimin. Nuk është seriozitet të refuzosh çdo mundësi. Ne kemi propozuar figura, kemi propozuar rokada, kemi propozuar bashkëqeverisje, kemi propozuar që opozita t’i sjellë emrat e vet. Në fund, përgjigjja ka qenë e njëjtë: jo.
Gazetari: Pra, sipas jush, opozita nuk e ka pasur qëllim zgjidhjen?
Albin Kurti: Unë mendoj që qëllimi i tyre nuk ka qenë zgjidhja, por pengimi. Kur refuzohet çdo variant, atëherë nuk mund të thuash se po kërkon zgjidhje. Mund të thuash vetëm se po kërkon vazhdimin e bllokadës.
Gazetari: A do të bashkëpunonit me PDK-në pas zgjedhjeve?
Albin Kurti: Ne do ta shohim vullnetin e qytetarëve më 7 qershor. Pas kësaj, do të sillemi në përputhje me atë vullnet. Por unë besoj që qytetarët do ta bëjnë të qartë se kush duhet ta udhëheqë vendin.
Gazetari: Pra, nuk po e përjashtoni?
Albin Kurti: Nuk po flas me përjashtime tash. Po flas për nevojën që qytetarët të mos lihen peng nga kalkulimet e subjekteve opozitare.
Gazetari: Zoti Kurti, në Skenderaj ndodhi një incident serioz. U sulmua Hysni Mehani. Në këtë incident është përmendur edhe emri i Sami Lushtakut. Sa e rëndon kjo raportin tuaj me PDK-në?
Albin Kurti: Dhuna nuk ka vend në politikë. Dhuna politike është e papranueshme. Ajo që ka ndodhur në Skenderaj duhet të trajtohet nga organet kompetente. Askush nuk mund të jetë mbi ligjin, pavarësisht emrit, mbiemrit apo historisë politike.
Gazetari: A e shihni këtë si kulturë politike të PDK-së?
Albin Kurti: Nuk dua të përgjithësoj secilin anëtar apo votues të PDK-së. Ka shumë qytetarë që votojnë parti të ndryshme dhe që janë njerëz të ndershëm. Por strukturat politike që kanë qenë gjatë në pushtet kanë krijuar një kulturë të caktuar të arrogancës, të mosllogaridhënies dhe të kontrollit lokal.
Gazetari: Po ju akuzoheni nga opozita për arrogancë të pushtetit.
Albin Kurti: Arrogancë nuk është të kërkosh zbatim të ligjit. Arrogancë nuk është të kërkosh institucione funksionale. Arrogancë është të bllokosh institucionet dhe pastaj të akuzosh atë që përpiqet t’i zhbllokojë.
Gazetari: Të kalojmë te LDK-ja. Me hyrjen e Vjosa Osmanit në këtë subjekt, a ndryshon llogaria juaj politike?
Albin Kurti: Llogaria ime kryesore është vullneti qytetar. Nuk mund ta ndërtoj politikën mbi lëvizjet e brendshme të partive të tjera. Ne kemi programin tonë, kemi qeverisjen tonë, kemi rezultatet tona dhe kërkojmë mandatin e qytetarëve.
Gazetari: Por Vjosa Osmani ka qenë partnere juaja politike. Tash është në LDK. A e konsideroni këtë kthim politik kundër jush?
Albin Kurti: Nuk dua ta personalizoj. Secili ka rrugën e vet politike. Unë e vlerësoj bashkëpunimin që kemi pasur në të kaluarën, por sot qytetarët do të vendosin për projektet politike që janë para tyre.
Gazetari: A ju ka dëmtuar largimi i saj?
Albin Kurti: Lëvizja Vetëvendosje është subjekt politik me bazë të gjerë qytetare. Ne nuk varemi nga një emër. Natyrisht, çdo figurë ka peshën e vet, por vullneti qytetar është më i madh se individët.
Gazetari: Megjithatë, ajo mund t’i marrë vota Vetëvendosjes.
Albin Kurti: Qytetarët e dinë shumë mirë se kush ka qeverisur, kush ka punuar dhe kush ka bllokuar. Unë kam besim te gjykimi i qytetarëve.
Gazetari: Zoti Kurti, gjatë intervistës ju shpesh e përdorni termin “bllok opozitar”. A nuk është kjo një mënyrë për t’i futur të gjithë kundërshtarët politikë në një kategori dhe për ta shmangur dallimin mes tyre?
Albin Kurti: Nuk është unë që i kam futur në një kategori. Ata janë sjellë njësoj në momentet vendimtare. Mund të kenë dallime në retorikë, mund të kenë dallime në paraqitje publike, por kur ka ardhur puna te zhbllokimi i institucioneve, kanë vepruar si një bllok.
Gazetari: A nuk është normale që opozita të koordinohet kundër qeverisë?
Albin Kurti: Është normale të koordinohet për alternativa politike. Nuk është normale të koordinohet për bllokim institucional. Opozita duhet të kundërshtojë, të propozojë, të kritikojë, por jo ta marrë peng shtetin.
Gazetari: Kjo është akuza juaj kryesore ndaj tyre.
Albin Kurti: Po. Sepse kjo është ajo që ka ndodhur.
Gazetari: Nëse qytetarët nuk ua japin 60 për qind, çfarë ndodh?
Albin Kurti: Unë nuk dua të paragjykoj rezultatin. Por jam i bindur që qytetarët e kanë kuptuar se çfarë është në lojë. Nuk është vetëm garë mes partive. Është pyetje nëse vendi do të ecë përpara apo do të mbetet peng i bllokadave.
Gazetari: Pra, po e paraqisni votën për Vetëvendosjen si votë për zhbllokim.
Albin Kurti: Sepse ashtu është. Sa më i qartë të jetë mandati, aq më pak hapësirë ka për bllokim.
Gazetari: Ju thatë se nuk keni kontakte me PDK-në, përveç me kryetarin e ri, zotin Bedri Hamza, me të cilin jeni takuar dy herë. Çfarë ndodhi më pas? Pse nuk pati takim tjetër?
Albin Kurti: Unë besoj që ka pasur vend të takohemi më shumë. Në fakt, u tha që do të takohemi pas aktgjykimit të Gjykatës Kushtetuese, por ja që kjo nuk ndodhi.
Gazetari: Ju e dini, më 31 janar të vitit 2025, u synua pamundësimi i tubimit të Lëvizjes Vetëvendosje në Skenderaj. Kjo ishte në kuadër të fushatës zgjedhore për zgjedhjet e 9 shkurtit.
Albin Kurti: Nuk ka diçka shumë të re këtu. Edhe atë mbrëmje ka pasur dhunë kundër neve. Dhe jo vetëm kaq, kryetari i Komunës së Skenderajt, me veturë zyrtare, ka synuar që të bëjë ndeshje komunikacioni me eskortën ku ndodhesha unë.
Gazetari: Po e kemi pasur këtë, po nuk bëhet shumë e madhe kjo, a din? Domethënë, tri vetura ishin aty të eskortës.
Albin Kurti: Ka synuar…
Gazetari: Ju ka synuar ju?
Albin Kurti: Po, nuk e di pse duhet ta zvogëlojmë këtë gjë. Është veprim i papranueshëm. Dhuna, pengimi i tubimeve dhe sjellja e tillë ndaj kundërshtarëve politikë nuk kanë vend në demokraci.
Gazetari: Megjithatë, zoti Lushtaku shkoi në stacion, u pyet, të gjitha…
Albin Kurti: Tash të shohim sa do të dënohen. Se në stacion shkon, por është çështje e gjyqësorit. Pra, këtu e kam unë hallin. Kemi një problem të madh me prokurorinë në Kosovë. Edhe në këtë rastin e Skenderajt ishte e ngadalshme.
Gazetari: Po këtu e kam unë hallin, sepse raporti për vendin tonë i Bashkimit Evropian kritikat më të mëdha i ka për gjyqësorin, kritikat më të mëdha i ka për prokurorinë. Ka kritika për efikasitetin, patjetër, por ka kritika edhe për qeverisjen, edhe për shkak se nuk luftohet deri në formën e vendimit të prerë krimi i organizuar dhe korrupsioni i lartë. Pra, t’i rikthehemi pyetjes më politike: si e determinon kjo raportin tuaj me PDK-në në prag të zgjedhjeve? Çfarë elemente të tjera ju jep?
Albin Kurti: Unë kam shpresuar që kryetari i ri i Partisë Demokratike të Kosovës, Bedri Hamza, do të jetë kryetar më shumë sesa ish-kryetari Memli Krasniqi. Sot e mendoj të kundërtën. Sot mendoj që më kryetar ka qenë Memli Krasniqi sesa sot që është Bedri Hamza.
Gazetari: Është kjo ftesë për të mos ju takuar pastaj?
Albin Kurti: Kjo është çështje e dinamikave të brendshme në atë parti politike.
Gazetari: Goxha nënçmuese politikisht kjo.
Albin Kurti: Unë jam në Lëvizjen Vetëvendosje, kryetar aty. Ato janë dinamikat e tyre të brendshme.
Gazetari: Mirë, ta kthej pak memorien tuaj dhe time në një intervistë që kemi pasur në vitin 2017, zoti Kurti. Në tetor të vitit 2017 ju flisnit për partitë politike dhe atëherë thoshit: “Më nevojiten në zgjedhjet e qershorit vetëm edhe 50 për qind se çfarë kishit fituar në 2017-ën.” Flisnit po ashtu për ndryshimet politike të lidershipit të partive.
2017–2026 ka një ndryshim drastik. Të gjitha lidershipet e të gjitha partive kanë ndryshuar, përpos i Vetëvendosjes.
Albin Kurti: Jo, në Lëvizjen Vetëvendosje ka pasur ndryshime të mëdha. Ka pasur ndryshime në Kryesi, në struktura, në përfaqësim, në deputetë, në qeveri. Nuk është e vërtetë që nuk ka ndryshime. Unë jam kryetar i Lëvizjes Vetëvendosje, por Vetëvendosja nuk është një njeri. Është organizatë, është lëvizje, është subjekt politik shumë më i gjerë.
Gazetari: Por kryetari nuk ka ndryshuar.
Albin Kurti: Kryetari zgjidhet nga anëtarësia. Nëse anëtarësia më jep besimin, kjo nuk është mungesë demokracie. Përkundrazi, është demokraci e brendshme. Nuk mund të konsiderohet ndryshim vetëm ndërrimi i emrit të kryetarit.
Gazetari: Tash pjesë e këtij blloku është edhe ish-bashkëpunëtorja juaj e ngushtë, zonja Vjosa Osmani. Ajo është duke ju sulmuar ditëve të fundit në mënyrë të vrullshme. Ju nuk po i përgjigjeni. Mund t’i shohim edhe disa deklarata që ka dhënë së fundmi.
Në njërën prej tyre ajo thotë: kush do ta kishte imagjinuar se konsiderohesh pengesë sepse e do Kosovën si shtet. Ushtari i Kosovës mbron paqen krah për krah me ushtarin amerikan, e jo si një shtet ku politikanë të caktuar thonë se Bondsteelit duhet t’i kërkojmë qira. Pra, këtë e ka pasur për ju, apo jo?
Albin Kurti: Nuk e di për kë e ka pasur, le ta shpjegojë vetë. Por unë po ju them një gjë: unë jam kryeministri i cili ka kërkuar nga Shtetet e Bashkuara të Amerikës që bazën amerikane Bondsteel ta bëjnë të përhershme. Është dokument zyrtar ky.
Po ashtu, kam kërkuar që ajo bazë të shndërrohet në bazë të NATO-s, sepse kjo është në interesin e sigurisë së Kosovës dhe të rajonit.
Gazetari: Pra, ju thoni se deklarata për qira është keqinterpretuar?
Albin Kurti: Unë kam folur për çështje të shfrytëzimit, për çështje të marrëdhënieve institucionale, por asnjëherë nuk kam qenë kundër pranisë amerikane. Përkundrazi, kam kërkuar thellim dhe përhershmëri të saj.
Por edhe diçka tjetër është shumë e rëndësishme: për shëndetin e demokracisë sonë, por edhe për forcimin e opozitës, është shumë e rëndësishme që të mos shkojnë në Amerikë për ta marrë Amerikën që ta sulmojë kryeministrin e Kosovës.
Gazetari: A po e bën këtë zonja Osmani?
Albin Kurti: Duket që po. Por e kuptoni, blloku opozitar ka metodë pune tërësisht të pasuksesshme, thellësisht të gabueshme: të shkosh ta marrësh Amerikën për t’ia mëshuar Albinit. A aq i fortë jam unë? U dashka të shkojnë në Amerikë për ta goditur Albin Kurtin, për t’i lënë pak shenjë? Kjo është shumë irracionale, përveçse është totalisht e padobishme.
Gazetari: Me këto deklarata që bën zonja Osmani, cili besoni se është synimi: t’ju dobësojë ju si Vetëvendosje apo ta forcojë pozicionin e saj politik brenda LDK-së?
Albin Kurti: Unë nuk mendoj që qëllimi kryesor do të ishte për të më dobësuar mua. Mendoj që më shumë kemi të bëjmë me një tendencë që ka të bëjë me ish-presidenten sesa me qëllim që do të ishte kundër meje.
Gazetari: Çka është tendenca këtu?
Albin Kurti: Ajo është duke u përpjekur që në mënyrë të sforcuar dhe të nxituar të integrohet në bllokun opozitar.
Gazetari: Pse të sforcuar?
Albin Kurti: Sepse ka pak kohë. Nuk ka shumë kohë tash. Zgjedhjet janë afër.
Gazetari: Pra, sipas jush, zonja Osmani është duke u integruar me nxitim në bllokun opozitar?
Albin Kurti: Po. Unë mendoj që ajo po përpiqet të dëshmojë para bllokut opozitar se është pjesë e tij. Dhe këtë po e bën duke më sulmuar mua. Por unë nuk besoj që kjo i bën mirë as asaj, as opozitës, as demokracisë në Kosovë.
Gazetari: Por ajo thotë se ju keni ndryshuar, se nuk jeni më ai Albin Kurti me të cilin ajo kishte hyrë në koalicion politik.
Albin Kurti: Unë nuk kam ndryshuar në parime. Kam ndryshuar në përvojë, sepse qeverisja të jep përvojë. Por bindjet themelore, për shtet të së drejtës, për sovranitet, për barazi, për luftë kundër korrupsionit, për zhvillim ekonomik, nuk kanë ndryshuar.
Gazetari: Megjithatë, kritikët thonë se keni ndryshuar në mënyrën si e shihni pushtetin.
Albin Kurti: Nuk është e vërtetë. Unë pushtetin e shoh si përgjegjësi, jo si pronë. Prandaj them se shteti nuk është imi. Por përgjegjësia që ma kanë dhënë qytetarët nuk mund të relativizohet nga ata që humbin zgjedhjet dhe pastaj e bllokojnë funksionimin e institucioneve.
Gazetari: T’i kthehemi marrëdhënieve me Shtetet e Bashkuara të Amerikës. Opozita, përfshirë edhe zonjën Osmani, ju akuzon se i keni dëmtuar raportet me SHBA-në. Ju thatë se keni kërkuar që Bondsteel të bëhet bazë e përhershme amerikane dhe madje bazë e NATO-s. Por a pranoni se ka pasur tensione?
Albin Kurti: Raportet me Shtetet e Bashkuara janë strategjike dhe të pazëvendësueshme. Ka pasur dallime në qasje për çështje të caktuara, por dallimet nuk janë prishje raportesh. Nuk duhet të ngatërrohet debati diplomatik me armiqësi. Ne kemi bashkëpunim në mbrojtje, në siguri, në ekonomi, në energji, në shumë fusha.
Gazetari: Por a ka qenë Kosova nën masa për shkak të vendimeve të qeverisë suaj?
Albin Kurti: Kosova është përballur me masa të padrejta. Ne kemi mbrojtur ligjshmërinë dhe kushtetutshmërinë në territorin tonë. Nuk mund të kërkohet nga një shtet demokratik që të heqë dorë nga sundimi i ligjit në një pjesë të territorit të vet.
Gazetari: Po flisni për veriun?
Albin Kurti: Po flas për parimin. Në veri të Kosovës, për vite me radhë, ka pasur struktura ilegale, ndikim të Serbisë, krim të organizuar, moszbatim të ligjit. Ne kemi punuar që rendi dhe ligji të shtrihen në çdo cep të Republikës.
Gazetari: A mendoni se e keni bërë këtë me koordinim të mjaftueshëm me aleatët?
Albin Kurti: Koordinimi është i rëndësishëm, por koordinimi nuk mund të nënkuptojë pezullim të sovranitetit. Ne kemi qenë të hapur për konsultime, kemi dhënë sqarime, kemi bashkëpunuar, por nuk mund ta lëmë shtetin peng të strukturave ilegale.
Gazetari: Opozita thotë se pikërisht kjo qasje e juaja e ka izoluar Kosovën.
Albin Kurti: Kosova nuk është e izoluar. Kosova ka partnerë, ka aleatë, ka mbështetje. Ajo që ka ndodhur është se disa vendime tona kanë qenë të vështira, por të domosdoshme. Shpeshherë reformat e vështira përballen me rezistencë, brenda dhe jashtë.
Gazetari: A do të ndryshonit diçka në qasjen tuaj ndaj veriut?
Albin Kurti: Unë gjithmonë jam i gatshëm të përmirësoj metodat, por jo të heq dorë nga parimet. Parimi është i qartë: Republika e Kosovës duhet të funksionojë në të gjithë territorin e saj.
Gazetari: Të kalojmë te dialogu me Serbinë. Ku është sot dialogu?
Albin Kurti: Dialogu ka ngecur për shkak të mungesës së gatishmërisë së Serbisë për ta pranuar realitetin e Kosovës së pavarur dhe për t’i zbatuar marrëveshjet. Serbia vazhdon me qasje destruktive, me mosnjohje, me financim të strukturave paralele dhe me fushatë kundër Kosovës.
Gazetari: Por edhe ju akuzoheni se nuk keni qenë fleksibil.
Albin Kurti: Fleksibilitet nuk do të thotë të pranosh cenimin e kushtetutshmërisë. Ne kemi qenë konstruktivë. Kemi pranuar propozime ndërkombëtare, kemi marrë pjesë në takime, kemi dhënë alternativa. Por Serbia nuk ka nënshkruar marrëveshje dhe nuk ka treguar gatishmëri të sinqertë për normalizim.
Gazetari: A është Asociacioni ende pengesa kryesore?
Albin Kurti: Asociacioni nuk mund të jetë Republikë Srpska në Kosovë. Çdo mekanizëm duhet të jetë në përputhje me Kushtetutën e Kosovës, me vendimet e Gjykatës Kushtetuese dhe me parimin e funksionalitetit të shtetit. Ne nuk mund të ndërtojmë mekanizma që e bëjnë shtetin jofunksional.
Gazetari: A do ta themeloni Asociacionin nëse merrni mandat të ri?
Albin Kurti: Ne do të zbatojmë marrëveshje që janë në përputhje me Kushtetutën, me ligjin dhe me interesin e Republikës. Nuk ka zbatim selektiv dhe nuk ka zbatim të njëanshëm. Serbia duhet të zbatojë obligimet e veta.
Gazetari: Pra, pa njohje de facto nga Serbia, nuk ka Asociacion?
Albin Kurti: Normalizimi duhet të jetë i plotë, jo i copëzuar. Nuk mund të kërkohet vetëm nga Kosova të japë, ndërsa Serbia të vazhdojë me mosnjohje dhe sabotim.
Gazetari: Zoti Kurti, po e mbyllim kapitullin e dialogut, por dua ta ndërlidh me sigurinë. Kosova ka pasur vite të tensionuara në veri, kemi pasur edhe sulmin në Banjskë. A mendoni që sot Kosova është më e sigurt sesa para pesë vitesh?
Albin Kurti: Po, pa dyshim që po. Kosova sot është më e sigurt, ka më shumë sovranitet, më shumë rend dhe ligj, më shumë prezencë institucionale. Ju e dini shumë mirë që dikur në veri nuk shkonin as zyrtarët e shtetit. Sot shkojnë policët, doganierët, administratorët, institucionet.
Sulmi terrorist në Banjskë ishte dëshmi që Serbia nuk ka hequr dorë nga destabilizimi i Kosovës, por gjithashtu ishte dëshmi që institucionet tona kanë kapacitet ta mbrojnë vendin.
Gazetari: Po, por kritikët thonë që ju shpesh i përdorni tensionet në veri si argument politik të brendshëm.
Albin Kurti: Jo. Veriu nuk është argument politik, është çështje e sovranitetit shtetëror. Nuk mund të ketë pjesë të shtetit ku nuk zbatohet ligji. Nuk mund të ketë standarde të dyfishta.
Gazetari: A mendoni që marrëdhëniet me aleatët janë dëmtuar gjatë kësaj periudhe?
Albin Kurti: Nuk mendoj që janë dëmtuar. Ka pasur mospajtime për taktika të caktuara, por partneriteti strategjik mbetet shumë i fuqishëm. Ne kemi marrëveshje të reja në fushën e mbrojtjes, kemi bashkëpunim ekonomik, kemi mbështetje për anëtarësim në organizata ndërkombëtare.
Gazetari: Megjithatë, Kosova ende nuk është në Këshillin e Evropës.
Albin Kurti: Ka pengesa politike. Nuk është çështje që varet vetëm prej Kosovës. Ka shtete që kanë kalkulime të tyre gjeopolitike. Por ne kemi bërë punën tonë.
Gazetari: Ta kalojmë pak te ekonomia. Ju shpesh thoni që ekonomia është rritur. Opozita thotë që qytetarët nuk e ndjejnë këtë rritje në xhep. Çfarë i thoni një qytetari që thotë: “Mua nuk më interesojnë statistikat”?
Albin Kurti: I them që statistikat nuk janë abstrakte. Kur kemi më shumë punësim, më shumë eksporte, më shumë të hyra tatimore, më shumë investime, kjo ndikon te ekonomia reale. Sigurisht, nuk jemi aty ku duam të jemi. Ka shumë punë për të bërë.
Por Kosova ka pasur rritje ekonomike të qëndrueshme, ka pasur më shumë formalizim, kemi luftuar kontrabandën, kemi rritur të hyrat pa rritur tatimet.
Gazetari: Inflacioni ka qenë i lartë.
Albin Kurti: Inflacioni ka qenë global. Nuk ka qenë problem vetëm i Kosovës. Pas pandemisë, pas luftës në Ukrainë, të gjitha ekonomitë janë përballur me sfida. Ne kemi subvencionuar energjinë, kemi mbështetur familjet, kemi mbështetur bizneset.
Gazetari: Opozita thotë se nuk ka pasur investime kapitale të mjaftueshme.
Albin Kurti: Nuk është e vërtetë. Ka pasur investime në rrugë, në energji, në arsim, në shëndetësi, në ujësjellës, në infrastrukturë lokale. Por ne kemi ndryshuar qasjen: nuk bëjmë vetëm projekte të mëdha që duken në kamera, por investime që kanë ndikim real.
Gazetari: Si e vlerësoni punën e ministrave tuaj? Ka ndonjë që ju ka zhgënjyer?
Albin Kurti: Nuk do të hyj në personalizime. Secili ka pasur sfidat e veta. Qeverisja nuk është punë individuale. Natyrisht, ka ministra më të ekspozuar dhe më të sulmuar, por unë mendoj që qeveria jonë ka bërë punë të mirë.
Gazetari: Ka ministra që mund të mos jenë më në kabinet nëse fitoni sërish?
Albin Kurti: Kjo është çështje për më vonë. Tash jemi në një proces zgjedhor. Qytetarët do të vendosin fillimisht për drejtimin politik.
Gazetari: Të ndalemi pak te opozita. Nëse nuk arrini 60 për qind, a mund ta shihni veten në kompromis më të madh politik?
Albin Kurti: Unë gjithmonë jam për kompromis që nuk e dëmton funksionalitetin e shtetit dhe vullnetin qytetar. Por kompromis nuk do të thotë që fituesi të sillet sikur ka humbur dhe humbësi sikur ka fituar.
Gazetari: Kjo është një thumb për opozitën?
Albin Kurti: Është përshkrim i realitetit politik që kemi pasur.
Gazetari: A ka ndonjë gjë që do ta kishit bërë ndryshe këto pesë vjet?
Albin Kurti: Gjithmonë ka gjëra që mund t’i bësh më mirë, më shpejt, më efektivisht. Por në parim, drejtimi ka qenë i drejtë: sundim ligji, luftë kundër korrupsionit, sovranitet, zhvillim ekonomik, mbrojtje sociale dhe dinjitet institucional.
Gazetari: Dhe pyetja e fundit: pse duhet t’ju votojnë qytetarët sërish?
Albin Kurti: Sepse kemi dëshmuar që mund të qeverisim ndryshe. Sepse kemi mbajtur stabilitet institucional, kemi luftuar korrupsionin, kemi forcuar shtetin dhe kemi mbrojtur interesin publik. Dhe sepse besoj që Kosovës i duhet vazhdimësi, jo kthim prapa.
Gazetari: Zoti Kurti, faleminderit shumë për intervistën.
Albin Kurti: Faleminderit juve.
