Një stuhi e fuqishme, e shoqëruar me erë të fortë, shi të dendur, breshër, rrufe dhe rënie të ndjeshme temperaturash, ka përfshirë Slloveninë dhe më pas veriun e Kroacisë, duke shkaktuar kaos veçanërisht në Zagreb dhe rrethinë.
Fronti i ftohtë fillimisht goditi pjesë të Sllovenisë, ku u raportuan breshër i madh, erëra të fuqishme, pemë të rrëzuara, dëme në çati, përmbytje lokale dhe madje reshje bore në disa zona malore. Në rrethinën e Domžales, breshëri mbuloi tokën dhe dëmtoi të mbjellat brenda pak minutash, ndërsa në disa pjesë të Luginës së Logarskës dhe në Velika Planina u regjistruan reshje bore.
Pas Sllovenisë, fronti u zhvendos drejt Kroacisë, ku përfshiu Međimurjen, Zagorjen, Varaždinin, Zagrebin, Sisakun, Popovaçën, Ivanić Gradin dhe zona të tjera. Në disa rajone ra breshër i dendur, ndërsa në Sljeme, Platak dhe Gorski Kotar u regjistruan edhe reshje bore, pamje të pazakonta për mesin e muajit maj.
Goditja më e rëndë u regjistrua në Zagreb. Rreth mesditës, qielli u errësua, nisi erë e fortë, shiu u shndërrua në breshër në disa pjesë të qytetit dhe pemët nisën të rrëzoheshin mbi rrugë, vetura, linja elektrike dhe rrjetin e tramvajit. Në zonën e Tuškanacit, një person u lëndua lehtë pasi u godit nga një degë e rrëzuar.
Qendra 112 në Zagreb pranoi rreth 250 thirrje nga qytetarët për pemë të rrëzuara në rrugë dhe mbi linja elektrike, çati të dëmtuara ose të shkëputura, objekte banimi dhe afariste të dëmtuara, zjarr në çatinë e një shtëpie familjare dhe rënie të pemëve mbi automjete në lëvizje. Më së shumti denoncime erdhën nga qendra e Zagrebit, sidomos nga zona e Tuškanacit.
Zjarrfikësit e Zagrebit kryen dhjetëra ndërhyrje brenda pak orësh, kryesisht për largimin e pemëve nga rrugët, veturat, telat elektrikë dhe objektet publike. Ata shuan edhe një zjarr në një shtëpi në Retkovec, ndërsa autoritetet paralajmëruan se do të kishte edhe ndërhyrje të tjera gjatë ditës.
Transporti publik në Zagreb u përball me ndërprerje të mëdha. Pemët e rrëzuara dhe dëmtimet në rrjetin elektrik ndalën ose devijuan disa linja tramvaji në Savska dhe Maksimirska. Linjat 2, 4, 8, 9, 12, 13, 14 dhe 17 qarkulluan me itinerare të ndryshuara, ndërsa disa linja autobusësh u ndërprenë përkohësisht për shkak të pemëve të rrëzuara dhe kabllove elektrike. Linja 140 nuk qarkulloi pasi rruga e Sljemes u mbyll, ndërsa teleferiku për në Sljeme u ndal për shkak të stuhisë me bubullima.
Në rrugën Savska, një pemë ra mbi rrugë dhe këputi kabllot e tramvajit, duke bllokuar qarkullimin. Në Maksimirska, pemët e rrëzuara dëmtuan rrjetin elektrik dhe një automjet, ndërsa trafiku u bllokua në drejtim të lindjes. Probleme pati edhe në Vodnikova, Jukićeva, Jelenovac, Mikulići, Veliki Dol, Oboj dhe zona të tjera të qytetit.
Stuhia shkaktoi dëme edhe në ndërtesa. Në lagjen Špansko, era ngriti çati ndërtesash, ndërsa në Çrnomerec, një pjesë e çatisë së ndërtesës administrative të kompanisë PLIVA u shkëput dhe përfundoi mbi hekurudhën pranë objektit. Hekurudhat kroate njoftuan se çatia u largua dhe se qarkullimi i trenave nuk u ndërpre.
Në tregun Splavnica pranë Dolacit, era e fuqishme shpërndau tezga, çadra, arka, fruta dhe perime. Shitësit u detyruan të mblidhnin mallrat e shpërndara pas goditjeve të erës. Në disa pjesë të qytetit u rrëzuan kontejnerë, biçikleta publike dhe stenda, ndërsa në parkun Ribnjak u thyen disa pemë.
Në Stacionin Kryesor Hekurudhor të Zagrebit pati përmbytje në peronë, ndërsa në lagjen Srednjaci degë të mëdha ranë mbi vetura të parkuara. Në disa rrugë qytetarët u detyruan të largonin vetë degët për të hapur kalimin.
Në Sljeme, breshëri dhe më pas bora zbardhën zonën, ndërsa rruga e Sljemes u mbyll për shkak të pemëve të rrëzuara, sidomos në zonën e Bliznecit. Në Medvednica, shumë pemë ranë mbi shtigjet malore, ndërsa disa roje të parkut u detyruan të kërkonin strehim në pyll gjatë stuhisë. Terreni u bë i rrezikshëm dhe pjesërisht i pakalueshëm.
Breshëri goditi edhe Samoborin, Zaprešićin, Sesveten, Maksimirin, Jarunin, Glinën, Kutinin, Popovaçën, Rugvicën, Vinkovcin, Varaždinin dhe Zagorjen. Në autostradën pranë Popovaçës, akulli zbardhi asfaltin, ndërsa shoferët e përshkruan pamjen “si në mes të dimrit”. HAK u bëri thirrje drejtuesve të automjeteve të përshtatin shpejtësinë me kushtet në rrugë, për shkak të rrugëve të lagështa, të rrëshqitshme dhe ujit në asfalt.
Në Zagorje, breshëri ishte kryesisht sa kokrra e misrit, ndërsa më të goditura ishin zonat Kraljevec na Sutli, Klanjec dhe rrethina e Krapinske Toplice. Përfaqësues të mbrojtjes kundër breshrit thanë se sistemi i mbrojtjes ende nuk kishte nisur punën për këtë sezon, pasi aktivizimi ishte paraparë nga 15 maji. Dëme priten sidomos në bujqësi.
Stuhia u zhvendos më pas drejt lindjes së Kroacisë. Në zonën e Ivanić Gradit dhe Vrbovečka Dubravës, breshëri goditi pemishte dhe toka bujqësore, duke krijuar frikë për dëme të mëdha te fermerët. Në Varaždin dhe rrethinë, shiu i dendur shkaktoi vërshime në rrugë dhe bllokim të kanalizimeve.
Gjatë stuhisë në Zagreb u regjistruan edhe goditje të fuqishme rrufeje. Në rrjetet sociale u shpërndanë pamje të një shtylle të fortë drite portokalli-të bardhë, që dukej sikur lidhte qiellin me tokën. Fotot e rrufesë mbi kodrat e Zagrebit u shpërndanë me shpejtësi dhe u cilësuan si ndër pamjet më dramatike të ditës.
Meteorologu Zoran Vakula shpjegoi se ndryshimi i menjëhershëm i motit ndodhi për shkak të depërtimit të ajrit të ftohtë dhe një çrregullimi frontal. Sipas tij, kombinimi i ajrit të ftohtë me sasi të madhe lagështie solli në disa zona më shumë se 30 litra shi për metër katror brenda vetëm një ore. Në Maksimir u matën erëra rreth 90 kilometra në orë, ndërsa në disa lokacione të tjera shpejtësia kaloi 20 metra në sekondë.
DHMZ lëshoi alarm portokalli për rajonet e Zagrebit, Karlovacit dhe Osijekut për shkak të erës së fortë, reshjeve intensive dhe rrezikut nga stuhitë. Për pjesën tjetër të Kroacisë u aktivizua alarmi i verdhë. Autoritetet paralajmëruan për ndërprerje në trafik, dëme në objekte, ndërprerje të mundshme të energjisë elektrike, rrëshqitje në rrugë, shikueshmëri të ulët dhe përmbytje urbane.
Mbrojtja Civile u bëri thirrje qytetarëve të tregojnë kujdes të shtuar, të shmangin lëvizjen dhe parkimin nën pemë, të sigurojnë sendet e lira, të mos qëndrojnë pranë objekteve të larta dhe të ndjekin udhëzimet e shërbimeve kompetente. Të gjitha ekipet emergjente mbetën në terren për largimin e pasojave dhe sigurimin e zonave të rrezikuara.
Sipas parashikimeve, reshjet pritet të dobësohen gradualisht nga perëndimi, por rënia e temperaturave do të vazhdojë. Në brendësi të Kroacisë, temperaturat pritet të zbresin deri në 5–9 gradë gjatë ditës, ndërsa mëngjesin e së mërkurës në disa zona të brendshme mund të ketë temperatura nga -1 deri në 4 gradë Celsius dhe ngricë të lehtë pranë tokës. Në Adriatik priten temperatura më të larta, nga 8 deri në 14 gradë në mëngjes./TetovaNews
