Largohet kreu amerikan për inteligjencën artificiale
Chris Fall, drejtori i Qendrës për Standardet dhe Inovacionin në Inteligjencën Artificiale, po jep dorëheqje vetëm tre muaj pasi mori drejtimin e institutit federal për testimin e IA-së, konfirmoi të hënën Departamenti amerikan i Tregtisë.
Pse ka rëndësi: Largimi i papritur vjen në një kohë kur administrata Trump po përpiqet të përcaktojë se si të zbatojë inteligjencën artificiale në mënyrë të sigurt, ndërsa agjencia po harton standardet përkatëse.
Zëdhënësi i Departamentit të Tregtisë, Benno Kass, ia konfirmoi Axios-it dorëheqjen e Fall-it.
Konteksti: Fall u emërua në prill për të drejtuar Qendrën për Standardet dhe Inovacionin në Inteligjencën Artificiale të Departamentit të Tregtisë, pasi administrata e riorganizoi institucionin që më parë njihej si Instituti Amerikan për Sigurinë e IA-së.
Qendra, e njohur me shkurtesën CAISI, është përgjegjëse për zhvillimin e kapaciteteve për testimin dhe vlerësimin e inteligjencës artificiale, si dhe për mbështetjen e standardeve për sistemet e avancuara të IA-së.
Çfarë thonë autoritetet: “Pas largimit të Chris-it, drejtori i NIST-it, Dr. Arvind Raman, do të vazhdojë ta mbikëqyrë CAISI-n dhe do të shërbejë si drejtor në detyrë i qendrës”, tha zëdhënësja e Departamentit të Tregtisë, Kristen Eichamer, në një deklaratë për Axios.
Raman, ish-dekan i inxhinierisë në Universitetin Purdue, dha betimin si drejtor i Institutit Kombëtar të Standardeve dhe Teknologjisë më 30 qershor.
Çfarë po vëzhgojmë: Megjithëse Raman do të shërbejë si drejtor në detyrë, institucioni do të mbetet pa udhëheqje të përhershme, ndërsa administrata diskuton hapat e ardhshëm lidhur me standardet dhe mbikëqyrjen e inteligjencës artificiale.
Çfarë pritet më tej: Departamenti i Tregtisë pret të njoftojë emrin e drejtorit të ri gjatë javëve të ardhshme.
Një zyrtar i Departamentit të Tregtisë tha se emërimi i Fall-it kishte qenë që në fillim i paraparë si i përkohshëm dhe se Raman gjatë javëve të fundit ka shqyrtuar kandidatët e mundshëm.
Shënim i redaksisë: Artikulli është përditësuar me një deklaratë të Departamentit amerikan të Tregtisë./axios
