Policia britanike ka intensifikuar kërkimet për një 45-vjeçar të dyshuar për vrasjen e bashkëshortes dhe dy vajzave të tyre në Great Denham, pranë Bedfordit, një ngjarje që ka tronditur komunitetin lokal dhe ka marrë përmasa ndërkombëtare pasi i dyshuari besohet se është larguar drejt Zimbabvesë.
Viktimat janë Nothabo Zandile Tshuma, 42 vjeçe, e njohur si Zandile, dhe dy vajzat e saj, Natalie, 15 vjeçe, dhe Nala, 5 vjeçe. Trupat e tyre u zbuluan të hënën në banesën familjare në Carnoustie Drive, pasi policia hyri me forcë në shtëpi. Autoritetet ishin njoftuar se familja nuk ishte parë prej disa ditësh.
Personi i kërkuar është Ndodana Mkhanyisi Tshuma, i njohur edhe si Mark. Sipas Policisë së Bedfordshire, ai është shtetas britanik me origjinë nga Zimbabveja dhe është larguar nga Britania e Madhe përmes aeroportit Heathrow, me pasaportë britanike, të shtunën para se trupat të zbuloheshin. Policia ka publikuar edhe një pamje nga kamerat e sigurisë në Heathrow, ku ai shihet duke kaluar në aeroport.
Detektivi Lee Martin, i cili drejton hetimin për vrasje, i bëri thirrje të dyshuarit që të dorëzohet te autoritetet lokale. Ai tha se policia po punon me agjenci kombëtare dhe ndërkombëtare për ta gjetur dhe arrestuar, duke theksuar se hetimet penale nuk ndalen në kufijtë shtetërorë.
Sipas BBC-së, policia e Zimbabvesë ka bërë të ditur se ende nuk ka marrë njoftim zyrtar nga Interpoli për praninë e mundshme të Mark Tshuma në vend, por është në dijeni të rastit përmes mediave dhe ka vendosur mekanizma paralajmërues për çdo informacion të mundshëm.
Hetimi është cilësuar nga policia si i shpejtë dhe kompleks, me disa pista që po ndiqen paralelisht. Më herët, ndihmës-shefi i Policisë së Bedfordshire, John Murphy, e përshkroi rastin si thellësisht tronditës, ku një nënë dhe dy fëmijët e saj besohet se janë vrarë. Autoritetet kanë theksuar se nuk ka të dhëna për ndonjë rrezik më të gjerë për publikun, por kanë shtuar patrullimet në zonë.
Ngjarja ndodhi në një lagje të qetë dhe të pasur rezidenciale. Guardian raporton se Carnoustie Drive është një zonë me shtëpi të mëdha të veçuara, pranë një fushe golfi. Sipas të njëjtit raportim, prona ku jetonte familja ishte blerë në maj të vitit 2024 për rreth 1.27 milionë paund dhe përshkruhej si një banesë me pishinë, katër dhoma gjumi dhe katër banjo.
Guardian shkruan gjithashtu se Mark Tshuma figuron në regjistrat e Companies House si drejtor i Nexus Trove Holdings, një biznes pronash me asete mbi 1 milion paund. Sipas të dhënave të fundit të cituara nga media britanike, kompania kishte realizuar fitime prej më shumë se 48 mijë paundësh në vitin 2024.
Ndërkohë, Zandile Tshuma ishte një profesioniste e fushës së hetimeve financiare. Ajo punonte si associate director në kompaninë londineze Forensic Risk Alliance, ku ishte e specializuar në zbulimin e mashtrimeve, parandalimin e pastrimit të parave dhe përputhshmërinë rregullatore. Më herët kishte punuar edhe në KPMG, ku ndihmonte banka dhe kompani energjetike në monitorimin e komunikimeve të tregtarëve me rrezik të lartë.
Jashtë shtëpisë në Carnoustie Drive janë vendosur lule dhe mesazhe ngushëllimi, ndërsa banorët e zonës janë shprehur të shokuar nga ngjarja. Një grua që vendosi lule pranë banesës tha se Zandile ishte një nënë fisnike, ndërsa fqinjë të tjerë e përshkruan zonën si të qetë dhe të sigurt.
Dhimbje të madhe kanë shprehur edhe shkollat ku mësonin dy vajzat. Drejtuesja e Pilgrims Pre-Prep School, Jo Webster, e përshkroi Nala-n si një “rreze dielli”, një vajzë kureshtare dhe me sens të mrekullueshëm humori. Sipas saj, shumë pjesëtarë të stafit e kishin njohur vajzën që kur ishte vetëm shtatë muajshe.
Ndërsa drejtuesja e Bedford Girls’ School, Gemma Gibson, e kujtoi Natalie-n si një nxënëse të zgjuar, të talentuar dhe plot jetë, me prirje në kërcim, muzikë dhe sport. Ajo tha se Natalie kishte ndikim pozitiv te të gjithë ata që e njihnin dhe do të kujtohej me shumë dashuri.
Policia u ka bërë thirrje qytetarëve që mund të kenë informacione për rastin, ose që kanë parë lëvizje të dyshimta në zonën e Carnoustie Drive të premten ose të shtunën para zbulimit të trupave, të kontaktojnë sa më shpejt Policinë e Bedfordshire. Autoritetet kanë kërkuar gjithashtu që publiku të shmangë spekulimet dhe të respektojë privatësinë e viktimave dhe familjarëve të tyre.
Identifikimi formal i viktimave ende nuk ishte përfunduar në momentin e raportimeve të fundit, ndërsa hetimet për zbardhjen e plotë të ngjarjes vijojnë.
