Profesori i Programit Studimor të Biologjisë, Sheval Memishi, është avancuar në titullin akademik profesor inordinar, përkatësisht profesor i asociuar, në Fakultetin e Shkencave Matematike-Natyrore të Universitetit të Tetovës.
Lajmin e ka bërë të ditur vetë Prof. Dr. Sheval Memishi përmes një postimi publik, në të cilin ka shprehur mirënjohje ndaj organeve akademike, drejtuesve të Fakultetit, kolegëve, studentëve dhe bashkëpunëtorëve që e kanë mbështetur gjatë rrugëtimit të tij profesional, shkencor dhe pedagogjik.
Memishi ka falënderuar anëtarët e Këshillit Mësimor-Shkencor të Fakultetit të Shkencave Matematike-Natyrore, dekanin e Fakultetit, komisionin recensues dhe stafin akademik për besimin dhe vlerësimin e punës së tij shumëvjeçare.
Ai e ka cilësuar avancimin jo vetëm si një arritje personale, por edhe si rezultat të bashkëpunimit me kolegët, ish-studentët dhe bashkëpunëtorët e Programit Studimor të Biologjisë në Universitetin e Tetovës.
Sipas tij, puna e përbashkët akademike ka mundësuar realizimin e punimeve cilësore, pjesëmarrjen në konferenca të rëndësishme dhe publikimin e punimeve shkencore me ndikim ndërkombëtar, duke kontribuuar në afirmimin e Programit Studimor të Biologjisë dhe të Universitetit të Tetovës në arenën shkencore.
Prof. Dr. Sheval Memishi ka theksuar se, krahas kërkimit shkencor, një ndër përgjegjësitë më të rëndësishme të stafit universitar mbetet arsimimi dhe përgatitja e gjeneratave të reja.
Gjatë angazhimit të tij në Universitetin e Tetovës, ai ka ligjëruar në ciklin e parë të studimeve dhe në studimet master, duke synuar që studentëve t’u transmetojë jo vetëm njohuri profesionale dhe shkencore, por edhe pasionin dhe vizionin për biologjinë.
Në kuadër të veprimtarisë pedagogjike dhe akademike, Memishi ka përmendur edhe mentorimin e studentëve gjatë përgatitjes së temave të diplomës dhe tezave të masterit, si dhe angazhimin si anëtar i komisioneve për vlerësimin dhe mbrojtjen e dy punimeve të doktoratës në Universitetin e Prishtinës.
Një ndër arritjet e rëndësishme të punës së tij është edhe botimi i tekstit profesional “Kafshët vertebrore në Rajonin e Pollogut”, i cili synon të shërbejë si burim shkencor, referues dhe edukativ për studentët, studiuesit dhe të interesuarit për faunën e rajonit të Pollogut.
Profesori i biologjisë ka theksuar se titulli i ri akademik paraqet edhe një obligim shtesë për të vazhduar punën me më shumë përkushtim në ngritjen e cilësisë së arsimit, mbështetjen e studentëve dhe zhvillimin e shkencës së biologjisë në Universitetin e Tetovës.
Postimi i plotë i Prof. Dr. Sheval Memishit
“Asnjë arritje individuale nuk ka vlerë pa mbështetjen e një komuniteti që të shtyn të kalosh kufijtë e vetes.”
Me një ndjenjë të lartë përgjegjësie dhe kënaqësie të veçantë, shpreh mirënjohjen time më të thellë për të gjithë anëtarët e Këshillit Mësimor-Shkencor të FSHMN-së, dekanin e Fakultetit, anëtarët e komisionit recensues dhe stafin më të gjerë të këtij Fakulteti, për besimin e dhënë dhe vlerësimin e punës sime kërkimore e pedagogjike, si dhe të kontributit tim të vazhdueshëm në shkencë dhe arsim, duke më avancuar në titullin akademik profesor inordinar – profesor i asociuar në Universitetin e Tetovës.
Ky stacion i rëndësishëm në rrugëtimin tim profesional është rezultat i një pune të përbashkët dhe i mbështetjes së shumë njerëzve në FSHMN, me të cilët ndaj përditshmërinë akademike, duke përfshirë kolegët, ish-studentët dhe bashkëpunëtorët e mi në Programin Studimor të Biologjisë të Universitetit të Tetovës dhe më gjerë.
Ky bashkëpunim është një mozaik i ndërtuar me kontribut të përbashkët kolegial, debate shkencore dhe besim të ndërsjellë.
Falë kësaj mbështetjeje dhe këtij bashkëpunimi, kemi arritur të realizojmë punime cilësore, të prezantojmë në konferenca të rëndësishme dhe të realizojmë publikime shkencore me ndikim të lartë ndërkombëtar, duke e lartësuar emrin e programit tonë studimor dhe të Universitetit në arenën globale shkencore.
Dhe, gjithsesi, përtej kërkimit shkencor, misioni ynë më i shenjtë është arsimimi i gjeneratave të reja, ku unë, gjatë këtyre viteve, jam përpjekur të jap kontributin tim maksimal përmes mbajtjes së ligjëratave cilësore, si në ciklin e parë, ashtu edhe në studimet master, duke u munduar të transmetoj jo vetëm dije shkencore, por edhe pasion dhe vizion për biologjinë.
Në kuadër të këtij avancimi akademik vlerësohet edhe mentorimi i studentëve në temat e diplomës dhe tezat e masterit, duke i udhëhequr ata drejt hapave të parë të kërkimit shkencor, si dhe angazhimi si anëtar i komisionit për vlerësimin dhe mbrojtjen e dy punimeve të doktoratës në Universitetin e Prishtinës.
Kurorëzimi i kësaj pune pedagogjike u arrit me botimin e tekstit profesional “Kafshët vertebrore në Rajonin e Pollogut”, i cili shpresoj të shërbejë si një udhërrëfyes i vlefshëm dhe burim referimi shkencor e edukativ për studentët tanë dhe më gjerë.
Ky titull, përveçse është një arritje personale, është edhe një obligim i ri për të punuar edhe më me përkushtim për ngritjen e cilësisë së arsimit, mbështetjen e studentëve tanë dhe zhvillimin e shkencës së biologjisë në kuadër të Universitetit të Tetovës.
Ju falënderoj përzemërsisht secilin prej jush, kolegët e nderuar, bashkëpunëtorët profesionalë dhe anëtarët e organeve akademike, për çdo këshillë, sugjerim, bashkëpunim dhe mbështetje përgjatë këtij rrugëtimi!
Me respekt të lartë,
Prof. Dr. Sheval Memishi
Profesor i asociuar
Programi Studimor i Biologjisë
Fakulteti i Shkencave Matematike-Natyrore
Universiteti i Tetovës
