Kryetari i Komunës së Tearcës, Daut Memishi, ka njoftuar se janë ndarë vendimet për punësimet në çerdhen “Foleja” në fshatin Përshefcë, duke e cilësuar këtë si një ditë historike për komunën.
Memishi theksoi se pas shumë vitesh pritjeje, zvarritjesh dhe premtimesh të pambajtura, çerdhja po shkon drejt hapjes dhe funksionalizimit, ndërsa sipas tij ky institucion do të jetë një mbështetje e rëndësishme për fëmijët dhe prindërit e Komunës së Tearcës.
Në vazhdim, statusi i plotë i kryetarit të Komunës së Tearcës, Daut Memishi:
“DITË HISTORIKE PËR TEARCËN! 🏫❤️
Pas shumë vitesh pritje, zvarritje dhe premtime të pambajtura, sot po bëjmë realitet një nga premtimet që ua dhamë banorëve të Komunës së Tearcës. Ishte nder dhe kënaqësi e veçantë që, si kryetar i Komunës, të ndaj vendimet për punësimet në çerdhen ‘Foleja’ në fshatin Përshefcë.
Kjo nuk është vetëm hapja e një çerdhe, por është hapja e një dere të re për fëmijët tanë, një mbështetje për prindërit dhe një investim në të ardhmen e brezave tanë.
Për shumë vite kjo çerdhe ishte vetëm një premtim. Sot, ajo po bëhet realitet.
Premtuam se do ta hapim dhe ajo po hapet. Ky është vetëm fillimi. Bashkë do të vazhdojmë të punojmë që fëmijët tanë të kenë kushte më të mira dhe që çdo premtim i dhënë para qytetarëve të shndërrohet në vepër. 🤝
Sot, Tearca ka arsye të krenohet. Sot, fitojnë fëmijët tanë! ❤️”, ka shkruar Memishi.
