Irani ka krijuar një portal online për denoncimin e kritikëve të dyshuar që ndodhen jashtë vendit. Sipas raportimeve të djeshme në mediat iraniane, qëllimi i sistemit të mbikëqyrjes, të quajtur “Aladsch” (“Shërim”), është identifikimi i “tradhtarëve”.
Zyrtarisht, sistemi është krijuar për “mbrojtjen e sigurisë kombëtare”. “Tradhtia ndaj Iranit ka një çmim dhe sjell pasoja ligjore”, shkroi, ndër të tjera, agjencia e lajmeve Fars.
Shtohet mosbesimi
Sipas raportimeve, iranianët mund t’i denoncojnë “tradhtarët” e pretenduar përmes një portali në internet, por edhe përmes kanaleve në rrjetet sociale. Identiteti i personave që japin informacione do të mbahet konfidencial, thuhet në raportime.
Në praktikë, sistemi ka gjasa që para së gjithash ta shtojë edhe më shumë mosbesimin brenda komunitetit iranian jashtë vendit. Se sa do të përdoret ky portal në të ardhmen, mbetet krejtësisht e paqartë.
“Tradhtarë” të mundshëm
Sipas vlerësimeve të ndryshme, jashtë Iranit jetojnë rreth katër milionë njerëz me shtetësi iraniane ose me origjinë iraniane. Shumë prej tyre janë larguar nga vendi për arsye politike.
Ndikimi i aparatit iranian të sigurisë në Evropë dhe në Shtetet e Bashkuara ka bërë prej kohësh që iranianët shpesh ta kenë të vështirë t’i besojnë njëri-tjetrit.
Lufta që përfshin Iranin e ka shtuar edhe më tej mosbesimin dhe praktikën e denoncimeve.
Portali i mbikëqyrjes “Aladsch” i përmend konkretisht si “tradhtarë” të mundshëm edhe personat që mbështesin sulme ushtarake kundër Iranit dhe sanksione ndaj vendit.
Sipas të dhënave të faqes së internetit, popullsia ka denoncuar tashmë 600 persona. Identitetet e disa iranianëve që jetojnë jashtë vendit janë publikuar në portal./ORF.at
