Një mesazh në telefon, e pak më vonë një telefonatë. Në një zyrë, kjo fillimisht tingëllon si një ditë krejt normale pune. Por në një bankë private në Itali, pikërisht kështu nisi një mashtrim.
Autorët e mashtrimit e bindën një drejtues të bankës se kishte marrë një kërkesë urgjente nga nivelet më të larta të drejtimit. Më pas, nëpërmjet telefonit erdhi edhe ajo që dukej si konfirmim i kërkesës – dhe kurthi funksionoi. Drejtuesi autorizoi disa pagesa.
Banka e zbuloi shpejt mashtrimin, por deri atëherë paratë kishin përfunduar në llogari jashtë vendit. Shuma: 95 milionë euro.
Viktimë ishte Paolo Molesini, në atë kohë kryetar i bordit të administrimit të Fideuram. Në shkurt 2026, sipas Reuters, ai mori një mesazh në WhatsApp që dukej sikur ishte dërguar nga Carlo Messina. Messina drejton Intesa Sanpaolo, grupin mëmë të Fideuram. Drejtuesi i supozuar i grupit i kërkonte ndihmë për një transaksion jashtë vendit.
Më pas erdhi një telefonatë. Një person që u paraqit si partner i një studioje të njohur ligjore konfirmoi kërkesën. Ajo që Molesini nuk e dinte ishte se autorët e mashtrimit kishin imituar me Inteligjencë Artificiale (IA) zërin e avokatit.
### Një pjesë e parave ende nuk është gjetur
Edhe vitin e kaluar, mashtruesit në Itali kishin arritur sukses duke përdorur një zë të krijuar me IA. Sipërmarrësi Massimo Moratti besoi se po fliste me një ministër dhe transferoi jashtë vendit pothuajse një milion euro. Më vonë ai arriti t’i merrte paratë mbrapsht.
Edhe Fideuram ka arritur ndërkohë të rikuperojë një pjesë të miliona eurove të transferuara.
Në rikuperimin e parave ndihmuan autoritetet e disa vendeve, përfshirë Kinën. Paratë kishin përfunduar kryesisht në Kinë dhe Hong-Kong.
Megjithatë, rreth 36 milionë euro vazhdojnë të mungojnë. Arsyeja është se mashtruesit e transferuan këtë shumë përmes llogarive të tjera jashtë vendit dhe më pas e konvertuan në kriptovaluta. Pas kësaj, gjurmët e parave humbasin.
Hetuesit në Milano kanë tashmë në fokus një person që jeton jashtë Evropës. Dyshimi lidhet me mashtrim kompjuterik.
Ndaj Molesinit dhe drejtuesve të tjerë të Fideuram nuk po zhvillohen hetime. Molesini u largua nga posti që në muajin mars, duke përmendur arsye personale. Fideuram nuk dha hollësi të tjera.
As Fideuram dhe as grupi mëmë Intesa Sanpaolo nuk deshën të komentonin lidhur me mashtrimin./BILD
