Një aksion i gjerë i institucioneve të sigurisë është zhvilluar të hënën, më 28 shtator, në disa lokacione në Shkup, nën dyshimet për vepra penale që lidhen me terrorizmin.
Aksioni po zhvillohet nga Ministria e Punëve të Brendshme dhe Agjencia për Siguri Kombëtare, nën drejtimin e një prokurori publik nga Prokuroria Themelore Publike për Ndjekjen e Krimit të Organizuar dhe Korrupsionit.
Prokuroria ka konfirmuar se janë ndaluar disa persona.
“Nën drejtimin e një prokurori publik nga Prokuroria për Ndjekjen e Krimit të Organizuar dhe Korrupsionit, në territorin e Shkupit po zhvillohet një aksion i MPB-së dhe ASK-së në disa lokacione. Janë ndaluar disa persona për shkak të dyshimit për kryerjen e veprave penale nga fusha e terrorizmit. Pas përfundimit të aksionit, opinioni do të informohet”, kanë njoftuar nga Prokuroria.
Edhe Radio-Televizioni i Maqedonisë konfirmoi se aksioni po zhvillohet në disa lokacione dhe se të ndaluarit dyshohen për vepra penale nga fusha e terrorizmit. Institucionet ende nuk kanë publikuar identitetet e tyre, numrin përfundimtar të personave të përfshirë apo akuzat konkrete.
Ndërkohë, mediat maqedonase kanë publikuar një sërë informacionesh jozyrtare për atë që është gjetur gjatë bastisjeve.
Televizioni Sitel raporton se janë arrestuar gjashtë persona në Shkup dhe rrethinë. Sipas informacioneve jozyrtare të televizionit, gjatë kontrolleve janë gjetur disa pushkë snajperi, disa pistoleta dhe flamuj me simbole të ISIS-it. Sitel raporton gjithashtu se personat e ndaluar dyshohet se kanë qenë më parë pjesëtarë të organizatës terroriste ose vazhdojnë të kenë lidhje me të.
Sipas të njëjtit raportim, përveç armëve janë gjetur edhe pajisje kompjuterike të tipit “rig”, të cilat dyshohet se janë përdorur për nxjerrjen e kriptovalutave. Edhe këto të dhëna nuk janë konfirmuar ende zyrtarisht nga Prokuroria apo MPB-ja.
Media të tjera, duke iu referuar burimeve nga strukturat e sigurisë, raportojnë se gjatë bastisjeve janë gjetur armë, municion dhe një flamur i organizatës terroriste “Shteti Islamik”. Disa raportime flasin gjithashtu për armë automatike, thika, jelek taktik dhe pajisje elektronike të sekuestruara.
“Sloboden Peçat”, informacionet e të cilit janë ripublikuar nga disa media maqedonase, raportoi se hetimi fillimisht kishte përfshirë një grup prej rreth pesë personash, të dyshuar për fajde, indoktrinim dhe nxitje të terrorizmit. Edhe ky informacion mbetet jozyrtar.
Një tjetër raportim i pakonfirmuar pretendon se disa nga personat e përfshirë mund të jenë ish-pjesëtarë ose të kthyer nga ISIS-i, të cilët më parë kishin vuajtur dënime me burg dhe ishin përfshirë në programe risocializimi. Prokuroria deri tani nuk i ka konfirmuar këto pretendime.
Në këtë fazë nuk është bërë e ditur zyrtarisht nëse të dyshuarit po përgatitnin ndonjë sulm konkret, nëse ekzistonte ndonjë objektiv i përcaktuar apo çfarë lloj lidhjesh eventuale kishin me struktura terroriste jashtë vendit.
Po ashtu, ende nuk ka konfirmim zyrtar për shtetësinë, moshën apo identitetin e personave të ndaluar.
Autoritetet kanë paralajmëruar se pas përfundimit të aksionit do të publikohen informacione më të hollësishme për personat e ndaluar, provat e sekuestruara dhe veprat konkrete penale për të cilat dyshohen.
Burime: Prokuroria Themelore Publike për Ndjekjen e Krimit të Organizuar dhe Korrupsionit, MPB, ASK, MIA, MRT, Sitel dhe media të tjera maqedonase.
