Gjiganti koreanojugor Samsung Electronics, sipas vlerësimeve të para të publikuara këtë të enjte, më 8 tetor, e ka rritur gati nëntëfish fitimin e tij operativ në tremujorin e tretë të vitit 2026, falë kërkesës së lartë për çipa të inteligjencës artificiale (IA), e cila ka nxitur shitjet e çipave të memories. Asnjë kompani teknologjike në botë nuk kishte realizuar më parë një fitim kaq të madh operativ brenda një tremujori.
Prodhuesi më i madh në botë i çipave të memories parashikon një fitim operativ prej 107.400 miliardë uonësh koreanojugorë (80,2 miliardë dollarë) për periudhën korrik–shtator. Kjo shifër përfaqëson një rritje krahasuar me 12.170 miliardë uonët e regjistruar një vit më parë dhe do të shënonte tremujorin e katërt radhazi me fitim operativ rekord për Samsungun.
Këto të dhëna dëshmojnë edhe një herë vazhdimin e mungesës së çipave të memories, ndërkohë që kërkesa për infrastrukturën e inteligjencës artificiale po rritet më shpejt sesa oferta. Në krahasim me një vit më parë, të ardhurat nga shitjet e kompanisë janë rritur me 127%, duke arritur në 146 miliardë dollarë.
Rritja e çmimeve të çipave ka shtuar kostot e prodhimit të telefonave inteligjentë dhe pajisjeve elektronike të konsumit, duke rënduar kështu mbi kërkesën. Në të njëjtën kohë, marrëveshjet afatgjata të furnizimit ndërmjet prodhuesve të çipave dhe klientëve kanë kufizuar rritjen e çmimeve në këmbim të garantimit të furnizimit. Furnizuesit druhen se rritje të tjera të konsiderueshme të çmimeve mund të dëmtojnë kërkesën për një gamë të gjerë pajisjesh elektronike të konsumit.
Konkurrenca nga Kina
Konkurrenti amerikan i Samsung Electronics, Micron, ka deklaruar se tregu i çipave mund të përballet me një mungesë edhe më të theksuar të furnizimit në vitet 2027 dhe 2028, megjithëse kompania parashikon që marzhi i saj bruto i fitimit të bjerë në 86,3%, ndër të tjera për shkak të kostove të personelit.
Marzhi i fitimit operativ në sektorin e çipave të memories të Samsungut pritet të mbetet në 76% gjatë tremujorit të tretë, në të njëjtin nivel me tremujorin e mëparshëm, sipas vlerësimeve të analistit Han Dong-hee të SK Securities.
Samsung Electronics duhet gjithashtu të përballet me konkurrencën në rritje nga rivalët e saj kinezë, të cilët vazhdojnë të përqendrohen te produktet e segmentit ekonomik, më pak fitimprurëse sesa çipat e memories që përdoren për inteligjencën artificiale.
Kompania koreanojugore synon tani të rrisë shitjet e çipave të memories me gjerësi të lartë brezi (HBM), një komponent thelbësor për qendrat e të dhënave, duke ngushtuar diferencën me SK Hynix, kompaninë që kryeson këtë treg./L’Express.fr
