Nëse ju nuk interesoheni për botën e mbrojtjes dhe të spiunazhit, ajo do të interesohet për ju. Çdo javë ju sjellim një përzgjedhje informacionesh ekskluzive dhe konfidenciale nga Franca, si dhe një pasqyrë të lajmeve më të rëndësishme nga Evropa.
Qendra Ruse në Paris nën mbikëqyrje
Institucioni i ngjashëm në Berlin u mbyll nga autoritetet gjermane pas sulmit të dështuar në Leipzig, më 4 gusht, për të cilin fajësohet Moska.
Në Paris, Shtëpia Ruse e Shkencës dhe Kulturës vazhdon të jetë nën vëzhgimin e shërbimeve të inteligjencës, ashtu si edhe Qendra Shpirtërore dhe Kulturore Ortodokse Ruse.
Megjithëse për momentin nuk po shqyrtohet mbyllja e saj, Shtëpia Ruse konsiderohet “një instrument për identifikimin e objektivave dhe ndërhyrjen në punët e brendshme”, sipas një burimi nga strukturat e sigurisë.
“Disa agjentë të shërbimit rus të inteligjencës së jashtme, SVR, të cilët vepronin aty, u dëbuan” pas pushtimit rus të Ukrainës në vitin 2022, saktëson burimi.
Paralajmërimi i CIA-s që nuk dha rezultat
Sipas informacioneve të siguruara nga L’Express, CIA kishte paralajmëruar disa ambasada evropiane në Moskë për mundësinë e një sulmi terrorist të afërt, në mars të vitit 2024.
Ambasadori francez Pierre Levy dhe homologja e tij suedeze Karin Olofsdotter kishin marrë masa sigurie.
Edhe FSB-ja, shërbimi kryesor rus i sigurisë së brendshme, e kishte marrë këtë paralajmërim, por pa rezultat.
Më 22 mars 2024, tre terroristë hynë në sallën e koncerteve Crocus City Hall, në periferi të Moskës, ku vranë 150 persona.
Përgjegjësinë për sulmin e mori Shteti Islamik i Khorasanit.
Këshilltarët e Gabriel Attal për mbrojtjen
Ish-kryeministri francez dhe kandidat për zgjedhjet presidenciale, Gabriel Attal, mbështetet te një grup prej rreth njëzet këshilltarësh për hartimin e programit të tij në fushën e mbrojtjes.
Mes tyre është deputetja Natalia Pouzyreff, nga partia Ensemble pour la République, e cila ka punuar për më shumë se 25 vjet në industrinë e aviacionit dhe të mbrojtjes.
Në grup bën pjesë edhe konsulenti i gjeopolitikës Louis Duclos.
Të gjithë komunikojnë përmes një grupi në Telegram, të quajtur “GT Défense”.
Attal është kandidati që ka zhvilluar më shumë vizita në Ukrainë dhe planifikon të udhëtojë përsëri atje gjatë tetorit.
CNAM përqendrohet te teknologjitë me përdorim të dyfishtë
Konservatori Kombëtar i Arteve dhe Zejeve (CNAM) nisi më 6 tetor një program të ri akademik me titull “Gjeopolitika, sovraniteti teknologjik dhe produktet me përdorim të dyfishtë”.
Programi drejtohet bashkërisht nga studiueset Héloïse Heuls dhe Jeanne Dubroca.
Nisma synon të zhvillojë kërkimet mbi teknologjitë me përdorim të dyfishtë, pra produktet e destinuara për përdorim civil që mund të kenë edhe zbatime ushtarake.
Për këtë qëllim, CNAM bashkëpunon me disa institucione dhe kompani, përfshirë firmën e inteligjencës ekonomike Adit, shoqërinë e investimeve Isalt dhe qendrën për zhvillimin e sipërmarrjeve EuraTechnologies.
Zhvillimet nga Evropa
Gjermania: paralajmërim për rrezikun e një konflikti me Rusinë
“Gjermania rrezikon të përfshihet në një konflikt të dhunshëm me Rusinë”, paralajmëroi Martin Jäger, drejtuesi i Shërbimit Federal Gjerman të Inteligjencës së Jashtme (BND), gjatë një seance dëgjimore në Bundestag, të hënën, më 5 tetor.
“Rusia po na vë në provë dhe po vëzhgon me kujdes mënyrën se si e menaxhojmë këtë situatë. Çdo shenjë hezitimi e shtyn Moskën ta shtojë edhe më shumë presionin ndaj Gjermanisë”, vazhdoi ai.
(Der Spiegel, Berlin, 5 tetor)
Rusia përgatit dëbimin e diplomatëve hungarezë
Rusia po përgatitet të dëbojë një numër të papërcaktuar diplomatësh hungarezë, si kundërpërgjigje ndaj dëbimit të dhjetë diplomatëve rusë nga Budapesti në shtator, për shkak të “veprimtarive të papranueshme”.
Hungaria nuk kishte dëbuar diplomatë rusë që nga viti 2018.
(Slobodna Dalmacija, Split, 1 tetor)
Norvegjia paralajmëron për veprimtari të dyshimta përgjatë bregdetit
Shërbimi norvegjez i kundërzbulimit ka ngritur alarmin për veprimtari përgjatë bregdetit të vendit, të cilat mund të jenë përgatitje për akte sabotimi.
Një nga drejtuesit e lartë të këtij shërbimi, John Fitje Hoffmann, e vendosi kërcënimin në një kontekst më të gjerë:
“Po vërejmë një interesim të madh të shumë vendeve për Arktikun dhe rajonet veriore. Kjo ka të bëjë para së gjithash me Rusinë, por edhe me Kinën.”
(Interia Wydarzenia, Varshavë, 2 tetor)
Britani e Madhe: MI5 paralajmëron universitetet për spiunazhin teknologjik kinez
Shërbimi britanik i sigurisë së brendshme, MI5, ka paralajmëruar universitetet për rrezikun e “vjedhjes së sekreteve teknologjike” nga një kompani mbuluese që mbështetet nga shërbimet kineze të inteligjencës.
Agjentët britanikë u kanë rekomanduar institucioneve akademike të ndërpresin çdo bashkëpunim me China General Technology Research Institute (CGTRI), një organizatë që, sipas MI5, mbështetet nga shërbimet kineze të inteligjencës.
(The Guardian, Londër, 30 shtator)
