Maqedonia e Veriut ka nënshkruar Konventën Kornizë të Këshilli i Evropës për Inteligjencën Artificiale (IA), me qëllim vendosjen e parimeve dhe standardeve për përdorim të sigurt, etik dhe të përgjegjshëm të inteligjencës artificiale.
Konventa, e miratuar nga Komiteti i Ministrave në maj të vitit 2024, paraqet instrumentin e parë ndërkombëtar detyrues në këtë fushë. Me nënshkrimin e saj, shteti obligohet të vendosë rregulla të qarta se si, ku dhe në çfarë mase do të përdoret inteligjenca artificiale, në përputhje me parimet e të drejtave të njeriut, demokracisë dhe sundimit të ligjit.
Ministri i Drejtësisë, Igor Filkov, deklaroi se Konventa sjell garanci të qarta që inteligjenca artificiale do të përdoret në mënyrë që respekton dinjitetin njerëzor, barazinë dhe mosdiskriminimin, ndërsa qytetarët do të kenë mbrojtje më të madhe të privatësisë dhe të dhënave personale, si dhe qasje në mjete juridike efektive nëse të drejtat e tyre shkelen.
“Veçanërisht e përshëndesim fleksibilitetin që Konventa ua mundëson shteteve – t’i përshtatin masat në përputhje me sistemet e tyre juridike dhe institucionale, duke respektuar standardet universale. Kjo është me rëndësi kyçe për implementim efektiv dhe rezultate të qëndrueshme”, theksoi Filkov.
Ai shtoi se zhvillimi teknologjik duhet të jetë në shërbim të qytetarëve dhe se inovacionet duhet të jenë të sigurta, etike dhe të përgjegjshme.
Në periudhën e ardhshme do të vijojë analiza para ratifikimit dhe procesi i harmonizimit me legjislacionin kombëtar, ku do të përfshihen institucionet relevante, ekspertët dhe përfaqësuesit e sektorit civil, me qëllim zbatimin cilësor dhe gjithëpërfshirës të obligimeve që dalin nga Konventa.
Përdorimi i inteligjencës artificiale mbetet temë aktuale në të gjithë kontinentin evropian. Vendet anëtare të Bashkimi Evropian dhe negociatorët e Parlamenti Evropian së fundmi ranë dakord të ndalojnë aplikacionet e inteligjencës artificiale që përdoren për krijimin e përmbajtjeve seksualisht eksplicite “deepfake” pa pëlqim.
