Vizion Plus ka siguruar fotot e dy viktimave, Nazmi dhe Selami Islami. Ata dyshohet se u qëlluan nga autori Ngushëllim Manzi, 40 vjeç .
Nga sherri që dyshohet se lindi për një avlli, Manzi qëlloi me armë, ku si pasojë humbën jetën Selami Islami dhe Nazmi Islami, ndërsa u plagos Shefqet Islami, vëllai tjetër i viktimave.
Burime për Vizion Plus bëjnë me dije se tre vëllezërit jetonin në shtëpi më vete, por që ishin ngjitur me njëra-tjetrën.
Sot kishte ardhur dhe një betoniere, pasi vëllezërit po punonin për ndërtimin e një avllije. Kjo, referuar edhe dëshmive të komshinjve, mendohet të ketë qenë shkaku i konfliktit, që përfundoi me dy viktima dhe një person të plagosur.
NJOFTIMI I POLICISË:
Pas njoftimit të marrë për të shtëna me armë zjarri, në rrugën “Petrela”, në Bathore, shërbimet e Komisariatit të Policisë Nr. 5 shkuan menjëherë në vendngjarje.
Nga veprimet e para rezultoi se, gjatë një konflikti për motive të dobëta ndërmjet shtetasit N. M. dhe tre vëllezërve, S. I., N. I. dhe Sh. I., konflikti u përshkallëzua në përdorimin e armës së zjarrit. Si pasojë, shtetasi S. I., rreth 30 vjeç, humbi jetën, ndërsa shtetasit N. I., 48 vjeç, dhe Sh. I., rreth 44 vjeç, u plagosën dhe u transportuan për në spital, ku 48-vjeçari humbi jetën, ndërsa 44-vjeçari vijon të jetë në kujdesin e mjekëve.
Si rezultat i veprimeve të shpejta policore, u kap dhe u arrestua autori i dyshuar i rastit, shtetasi N. M., rreth 40 vjeç, punonjës i Policisë Ushtarake.
Gjithashtu, u sekuestrua arma e zjarrit (pistoletë), e dyshuar e përdorur për krimin.
Grupi hetimor po vijon punën për dokumentimin e plotë ligjor të ngjarjes dhe sqarimin e rrethanave të saj.
