Filozofja e njohur Ioanna Kuçuradi ka ndërruar jetë në moshën 89-vjeçare, në spitalin ku po trajtohej në Stamboll.
Sipas NTV-së, Kuçuradi, presidente e Shoqatës Filozofike të Turqisë dhe presidente nderi e Federatës Ndërkombëtare të Shoqatave Filozofike, ndërroi jetë në Spitalin e Fakultetit të Mjekësisë të Universitetit Maltepe.
Ajo do të mbushte 90 vjeç më 4 tetor. Për 10 tetor ishte planifikuar një program në Qendrën Kulturore Boğaziçi në Sarıyer, ku studentët dhe dashamirët e saj do të shënonin përvjetorin e lindjes së filozofes së njohur.
Ceremonia mortore do të mbahet më 4 tetor, pikërisht në ditën e lindjes së saj, në Sallën e Konferencave “Mimar Vedat Çakırca” të Universitetit Maltepe. Më pas, Kuçuradi do të varroset në Varrezat Ortodokse Greke në Şişli.
Zëdhënësi i AK Partisë, Ömer Çelik, shprehu ngushëllimet për ndarjen nga jeta të Kuçuradit, duke e cilësuar atë si “mësuesen e mësuesve”.
Çelik theksoi se ajo e kishte paraqitur filozofinë si “artin e të qenit njeri” dhe se një pjesë e rëndësishme e veprimtarisë së saj ishte përqendruar te dinjiteti njerëzor dhe ruajtja e vlerave njerëzore.
Mesazh ngushëllimi publikoi edhe kreu i Drejtorisë së Komunikimeve të Presidencës së Turqisë, Burhanettin Duran.
Ai tha se Kuçuradi zinte një vend të veçantë në jetën intelektuale të Turqisë falë punës së saj në filozofi dhe në fushën e të drejtave të njeriut dhe se ajo la pas një trashëgimi të qëndrueshme përmes veprave të saj dhe brezave të studentëve që kishte formuar.
Kush ishte Ioanna Kuçuradi?
Ioanna Kuçuradi lindi më 4 tetor 1936 në Stamboll. Në vitin 1954 përfundoi Shkollën e Mesme për Vajza Zapyon, ndërsa në vitin 1959 u diplomua në Departamentin e Filozofisë të Universitetit të Stambollit.
Doktoraturën e përfundoi në vitin 1965.
Nga viti 1965 deri më 1968 punoi në Universitetin Atatürk në Erzurum. Në vitin 1970 mori titullin e docentes, ndërsa në vitin 1978 u bë profesoreshë.
Në vitin 1969 themeloi Departamentin e Filozofisë në Universitetin Hacettepe dhe e drejtoi atë deri në pensionimin e saj në vitin 2003.
Nga viti 1997 drejtoi Qendrën për Kërkime dhe Zbatim të të Drejtave të Njeriut dhe Filozofisë në të njëjtin universitet dhe mbajti Katedrën UNESCO të krijuar në kuadër të kësaj qendre.
Kuçuradi drejtoi Shoqatën Filozofike të Turqisë dhe gjatë karrierës së saj mbajti poste të ndryshme edhe në Federatën Ndërkombëtare të Shoqatave Filozofike, organizatë të cilën gjithashtu e kishte drejtuar.
Veprimtaria e saj akademike u përqendrua kryesisht në filozofi, etikë, të drejtat e njeriut dhe teorinë e vlerave.
Ndër veprat e saj më të njohura janë “Nietzsche dhe njeriu”, “Schopenhauer dhe njeriu”, “Njeriu dhe vlerat e tij”, “Etika”, “Të shikosh artin përmes filozofisë” dhe “Mes ngjarjeve të epokës”.
Për kontributin e saj akademik dhe intelektual, Kuçuradi u nderua me një sërë çmimesh dhe mirënjohjesh, përfshirë Medaljen Goethe, Çmimin e Akademisë Turke të Shkencave dhe Çmimin për Lirinë e Shtypit të Shoqatës së Gazetarëve të Turqisë, si edhe me disa çmime ndërkombëtare.
