Në Ohër dhe Strugë po vendosen 40 kamera komunikacioni nga sistemi “Qytet i Sigurt”, i cili për momentin ndodhet në fazë të testimit teknik dhe shkeljet ende nuk sanksionohen.
Kamerat po vendosen në disa lokacione, mes tyre në rrethrrotullimet në hyrjet e Ohrit dhe në zonën qendrore të qytetit, ndërsa një pjesë e pajisjeve më herët ishte instaluar edhe në aksin rrugor Ohër-Kërçovë, te Gorenica, Trebenishta, Botuni dhe Novo Sello në Komunën e Debërcës.
Zëdhënësi i SPB Ohër, Stefan Dimoski, thotë se deri në aktivizimin e plotë të sistemit, policia rrugore vazhdon me kontrolle të shtuara me kamera elektronike mobile, me qëllim rritjen e sigurisë dhe uljen e numrit të aksidenteve në komunikacion.
Nga policia paralajmërojnë se opinioni do të informohet me kohë për lokacionet e kamerave, për shkeljet që do të sanksionohen dhe për masat për mbrojtjen e të dhënave personale. Sistemi synon uljen e shpejtësisë së madhe, tejkalimeve të rrezikshme dhe parkimit të parregullt, sidomos në periudhën e rritjes së komunikacionit turistik.
