Holanda numëron më shumë se 2.500 persona më të vjetër se 100 vjeç. Në fillim të këtij viti ishin 2.551, ka llogaritur Zyra Qendrore për Statistika, CBS. Sipas CBS-së, numri i qindvjeçarëve gjatë pesë viteve të fundit ka qenë i qëndrueshëm.
Në pjesën dërrmuese bëhet fjalë për gra: gati 2.100. Dihet se gratë kanë jetëgjatësi më të lartë se burrat. Nga të dhënat del se dallimi mes burrave dhe grave është bërë shumë më i madh, sidomos mes viteve 1950 dhe 1970, gjë që lidhej me pirjen e madhe të duhanit nga burrat në atë periudhë.
Mundësia për të arritur 100 vjeç
Studiuesit janë kthyer deri te viti i lindjes 1812 për të parë sa njerëz më pas arritën moshën 100 vjeç ose më shumë. Nga çdo 100.000 persona të lindur deri në vitin 1850, mesatarisht 13 arritën moshën 100 vjeç. Në fund të shekullit XIX, ky numër ishte rritur në 300. Nga çdo 100.000 persona të lindur mes viteve 1920 dhe 1923, mbi 700 arritën një shekull jetë.
Hulumtimi tregon gjithashtu se ekzistojnë dallime të mëdha rajonale. Mundësia që dikush i lindur në Limburgun Jugor të arrijë 100 vjeç ose më shumë është 155 në 100.000, ndërsa për dikë nga Haga dhe rrethina kjo mundësi është 309 në 100.000. Studiuesit nuk kanë analizuar saktësisht arsyet e këtij dallimi, por sugjerojnë se rol mund të kenë kushtet e jetesës, mjedisi ku është kaluar fëmijëria dhe faktorët trashëgues.
Holandezët më të vjetër
Në shkurt të këtij viti ndërroi jetë John Huang nga Hilversumi, në moshën 112-vjeçare. Në atë moment ai ishte holandezi më i vjetër. Tani këtë titull me gjasë e mban Bets Smaal nga Capelle aan den IJssel. Ajo ka lindur në janar të vitit 1915 dhe aktualisht është 111 vjeçe.
Holandezja më e vjetër ndonjëherë, madje për një periudhë edhe njeriu më i vjetër në botë, ishte Hendrikje van Andel-Schipper. Ajo ndërroi jetë në vitin 2005, në moshën 115-vjeçare./TetovaNews
