Një 53-vjeçar, i cili u plagos pasi u sulmua nga një ari në rrethin Tercan të provincës Erzincan, është shtruar në spital për trajtim.
Pas operacionit, İsmail Tirifi tregoi se arriti të shpëtonte nga sulmi falë lopatës që mbante në dorë.
İsmail Tirifi, 53 vjeç, banor i fshatit Bağpınar, u sulmua nga një ari teksa po ujiste arën e tij të mbjellë me luledielli.
I plagosur në krah, Tirifi arriti të largohej nga ara dhe kërkoi ndihmë nga njerëzit përreth.
Ai po vazhdon trajtimin në repartin e Ortopedisë të Spitalit Universitar dhe Kërkimor “Erzincan Mengücek Gazi”.
Duke treguar se sulmi ndodhi papritur, Tirifi tha:
“Po ujisja arën me luledielli. Hyra deri në brendësi të arës për të kontrolluar nëse uji kishte arritur deri poshtë. Në atë çast, ariu më sulmoi drejtpërdrejt nga anash. Unë reagova instinktivisht me dorën e majtë dhe ai më kafshoi në dorë. Më hodhi përtokë. Luftova me të për një kohë të gjatë. Kur e godita me lopatë, më lëshoi dhe iku. Nuk e di si do të kishte përfunduar po të mos e kisha lopatën.”
Tirifi tregoi se dora e majtë iu plagos rëndë gjatë sulmit.
“Nga dora më rridhte shumë gjak. Ma kishte shqyer dorën dhe më kishte thyer gishtat. Pasi ariu iku, arrita të shkoja deri te makina. Në atë moment, një shok që po vinte me motoçikletë njoftoi të tjerët. Më pas më dërguan në spital”, tha ai.
Duke kërkuar që të gjendet një zgjidhje për parandalimin e sulmeve të arinjve, Tirifi shtoi:
“Vrasja e arinjve është e ndaluar dhe dënimet janë shumë të larta. Por çfarë do të ndodhë kur të vriten njerëz? Mbrojtësit e kafshëve mund të reagojnë, por as jeta e njeriut nuk është pa vlerë. Duhet patjetër të gjendet një zgjidhje.”
