Ballina Aktualitet Rusia do tentojë “të marrë” Malin e Zi, Escobar jep alarmin!

Rusia do tentojë “të marrë” Malin e Zi, Escobar jep alarmin!

I dërguari i posaçëm i SHBA-së për Ballkanin Perëndimor, Gabriel Escobar, tërhoqi vëmendjen sërish tek Ballkani, duke nënvizuar se Mali i Zi vazhdon ta joshë Moskën.

Për këtë arsye, tha ai për të përditëshmen malazeze Vijesti, Shtetet e Bashkuara dhe partnerët euroatlantikë duhet t’i shtojnë përpjekjet kolektive për të kundërshtuar veprimet armiqësore të presidentit rus, Vladimir Putin.

E njëjta ideologji e gabuar, siç nënvizoi ai, po e shtyn Kremlinin të parandalojë dhe ngadalësojë integrimin euroatlantik të Ballkanit.

Escobar e pati një thirrje për të gjithë në rajon, që ta konsiderojnë Putinin përgjegjës për pushtimin e Ukrainës.

“Teksa shpaloset katastrofa humanitare në Ukrainë, ju duhet ta pyesni veten se çfarë është gati Putin të bëjë gjetkë në botë, përfshirë edhe Ballkanin Perëndimor”, ishte komenti i tij.

Duke ndjekur politikën e Bashkimit Europian, Qeveria e Malit të Zi ka vendosur sanksione kundër Rusisë në 1 mars, por nuk ka marrë ende vendimet e nevojshme për t’i zbatuar ato.

Kështu, ajo ende nuk e ka vendosur ndalimin e mediave ruse, Russia Today dhe Sputnik, në Mal të Zi – ndërkohë që blloku europian i ka ndaluar ato që në 2 mars./Top Channel

Artikulli paraprakErdogan pret kancelarin gjerman Scholz në Ankara (VIDEO)
Artikulli tjetërÇfarë do të bëjë Gjermania nëse nuk rrjedh më gaz rus?