Drejtori i shërbimit sekret izraelit Mossad, David Barnea, ka mbërritur të premten në mëngjes në Shtetet e Bashkuara për bisedime mbi situatën në Iran, sipas një burimi izraelit dhe një burimi tjetër të njohur me takimin.
Pse ka rëndësi
Vizita e Barnea-s është pjesë e konsultimeve të vazhdueshme mes SHBA-së dhe Izraelit lidhur me protestat në Iran dhe një veprim të mundshëm ushtarak amerikan në përgjigje të shtypjes së dhunshme nga regjimi.
Barnea pritet të takohet në Miami me të dërguarin e Shtëpisë së Bardhë, Steve Witkoff, i cili menaxhon kanalin e drejtpërdrejtë të komunikimit mes SHBA-së dhe Iranit. Witkoff ka qenë në kontakt me ministrin e Jashtëm iranian Abbas Araghchi gjatë protestave.
Ende nuk është e qartë nëse Barnea do të takohet me presidentin Donald Trump gjatë fundjavës në Mar-a-Lago.
Zhvillimet kryesore
Udhëtimi i Barnea-s vjen pas një telefonate të zhvilluar të mërkurën mes Trumpit dhe kryeministrit izraelit Benjamin Netanyahu, ku u diskutua kriza në Iran.
Gjatë bisedës, Netanyahu i kërkoi Trumpit të shtyjë veprimet ushtarake kundër Iranit, për t’i dhënë Izraelit më shumë kohë për t’u përgatitur ndaj një kundërpërgjigjeje të mundshme iraniane.
Një burim izraelit tha se, përveç shqetësimeve për hakmarrje, plani aktual amerikan parashikon goditje ndaj objektivave të forcave të sigurisë në Iran, por Izraeli e konsideron atë jo mjaftueshëm të fortë për ta destabilizuar realisht regjimin.
Zyrtarë amerikanë theksojnë se veprimi ushtarak mbetet ende një opsion nëse Irani rifillon vrasjen e protestuesve. Zyrtarë izraelitë besojnë se, pavarësisht vonesës, një sulm ushtarak amerikan mund të ndodhë në ditët në vijim.
Çfarë pritet
Sipas burimeve amerikane, ushtria e SHBA-së po dërgon kapacitete shtesë mbrojtëse dhe sulmuese në rajon, për t’u përgatitur në rast se Trump urdhëron një sulm.
Aeroplanmbajtësja USS Abraham Lincoln dhe grupi i saj goditës janë nisur drejt Lindjes së Mesme nga Deti i Kinës Jugore. Gjithashtu pritet të mbërrijnë sisteme shtesë të mbrojtjes ajrore, avionë luftarakë dhe mundësisht edhe nëndetëse.
Pas kuintave
Gjatë kontaktit me Witkoff-in, ministri i Jashtëm iranian Abbas Araghchi ka propozuar një takim dhe rifillimin e negociatave bërthamore.
Qeveria izraelite shpreh shqetësim se Irani mund t’i përdorë këto negociata për të fituar kohë dhe për të lehtësuar presionin amerikan.
Nga ana tjetër, disa zyrtarë besojnë se kriza aktuale mund ta detyrojë regjimin iranian të bëjë lëshime që më parë i kishte refuzuar, përfshirë programin bërthamor, programin raketor dhe grupet aleate (proxy)./Axios/TetovaNews
