Dëshmitari Vllado Petkovski deklaroi para gjykatës se idetë diskutoheshin në mbledhjet e drejtuesve që udhëhiqte Përparim Bajrami, ndërsa projekti me terminalet VLT ishte bllokuar për shkak të pengesave ligjore.
Projekte të reja për zhvillimin e shoqërisë aksionare “Lotaria Shtetërore”, përfshirë krijimin e “Novo VLT”, platformën në internet “Megawin.mk” dhe nismën për organizimin e pavarur të lojërave elektronike të fatit, ishin ndërmarrë gjatë mandatit të Përparim Bajramit. Kështu dëshmoi sot para Gjykatës Penale Vllado Petkovski, drejtor i Sektorit të Lojërave të Fatit në këtë shoqëri.
Petkovski, i punësuar në Lotarinë Shtetërore që nga dhjetori i vitit 2017, deklaroi në gjykimin për çështjen “Lotaria Shtetërore” se, pas ardhjes së ish-drejtorit të përgjithshëm Përparim Bajrami, ishin iniciuar disa projekte për zgjerimin e portofolit të kompanisë dhe rritjen e fitimit. Megjithatë, ai theksoi se nuk mund të thoshte për çfarë arsyesh ishte zëvendësuar drejtoresha e mëparshme, Katica Nikollovska Prnakova.
Duke iu përgjigjur pyetjeve të prokurorisë, Petkovski tha se gjatë punës në kompani kishte mbajtur disa poste drejtuese.
“Jam i punësuar në Lotari që nga dhjetori i vitit 2017. Kam punuar në pozitën e drejtorit të shitjeve dhe të veprimtarisë tregtare. Gjatë punës sime kam ndërruar disa poste drejtuese. Më pas kam qenë drejtor i lojërave të fatit dhe kryedrejtor përgjegjës për tri sektorë”, deklaroi dëshmitari.
I pyetur nëse i njihte arsyet e zëvendësimit të Katica Nikollovska Prnakovës dhe të emërimit të Përparim Bajramit, ai u përgjigj:
“Nuk mund ta pohoj apo të them arsyen pse u bë ky ndryshim.”
Në lidhje me punën e dy drejtorëve, Petkovski bëri një krahasim vetëm për politikat e zhvillimit të kompanisë.
“Mund të flas vetëm për zhvillimin e portofolit të Lotarisë Shtetërore. Në kohën e Katicës pothuajse nuk kishte projekte të reja. Pasi erdhi drejtori i ri, ai u angazhua në mënyrë aktive për zbatimin e projekteve të reja, me qëllim zgjerimin e portofolit dhe rritjen e fitimit të Lotarisë Shtetërore”, tha ai.
Sipas dëshmitarit, ndër nismat e para ishte krijimi i shoqërisë “Novo VLT”.
“U nis me idenë e krijimit të një shoqërie të re sipas modelit të shoqërisë ekzistuese Lotaria Shtetërore Video, në të cilën Lotaria Shtetërore është bashkëortake me ‘Casinos Austria’. Kjo shoqëri funksionoi pothuajse dy vjet dhe quhet ‘Novo VLT’”, deklaroi Petkovski.
Ai tha se më pas kishin vijuar projektet “Megawin.mk”, si platformë në internet tërësisht në pronësi të Lotarisë Shtetërore, organizimi i pavarur i lojërave elektronike të fatit dhe krijimi i tri shoqërive për lojëra në internet përmes investimeve të përbashkëta me partnerë privatë.
Duke shpjeguar idenë e krijimit të “Novo VLT”, dëshmitari theksoi se shoqëria ishte themeluar për të organizuar lojëra elektronike të fatit, por nuk e kishte nisur këtë veprimtari për shkak të pengesave ligjore.
“Duhej të organizonte lojëra elektronike të fatit, por interpretimi autentik i ligjit nuk e lejoi këtë shoqëri të ushtronte veprimtarinë, përkatësisht t’i vinte në përdorim terminalet VLT”, tha ai.
Sipas tij, synimi ishte që Lotaria Shtetërore t’i organizonte vetë këto lojëra.
“Ideja ishte të bliheshin terminale VLT, me të cilat Lotaria Shtetërore do t’i organizonte lojërat në mënyrë të pavarur dhe i gjithë fitimi do të mbetej në Lotarinë Shtetërore, në vend që të ndahej me ‘Novo VLT’ dhe ‘Casinos Austria’”, deklaroi Petkovski.
Për këtë qëllim, shtoi ai, ishin siguruar analiza dhe mendime nga institucionet përkatëse.
“U siguruan një sërë dokumentesh: mendime profesionale nga profesorë, studime fizibiliteti, hulumtime të tregut, mendime nga institucionet qeveritare, Ministria e Financave dhe vetë Qeveria. U mblodhën të gjitha dokumentet përkatëse mbështetëse, ndonëse ‘Novo VLT’ ishte themeluar tashmë. Mendoja se kjo nuk do të ishte problematike, sepse kisha marrë pjesë në të gjitha procedurat e blerjes”, tha dëshmitari.
Ai theksoi se, pas miratimit të planit financiar, ishte zhvilluar procedura e prokurimit publik dhe se Drejtoria e të Ardhurave Publike kishte dhënë mendim pozitiv.
“Mbi këtë bazë u miratua një plan financiar për blerjen e aparateve. Pasi blerja u përfshi në planin e prokurimeve publike, u zhvillua procedura e prokurimit. Drejtoria e të Ardhurave Publike dha mendim pozitiv, por miratimi nga Ministria e Financave nuk erdhi, sepse u miratua interpretimi autentik i ligjit, pas të cilit u bllokuan të gjitha proceset”, deklaroi Petkovski.
Për prejardhjen e ideve për këto projekte, dëshmitari tha se ato diskutoheshin në mbledhjet e drejtuesve.
“Ideja diskutohej në mbledhjet që udhëhiqte drejtori Përparim Bajrami. Kishte shumë ide për projekte të reja, por ato duhej të shqyrtoheshin me institucionet përkatëse të Qeverisë, për të përcaktuar ligjshmërinë dhe mundësinë e realizimit të tyre”, tha ai.
Duke folur për marrëdhënien mes Përparim Bajramit dhe Artan Grubit, dëshmitari deklaroi se nuk kishte dijeni të drejtpërdrejtë.
“Nuk mund ta përcaktoj me siguri. Nuk kam qenë vetë dëshmitar i ndonjë situate që të më lejojë të them se ata të dy janë miq”, tha Petkovski.
Ai shtoi se drejtorët e Lotarisë Shtetërore komunikojnë shpesh me Qeverinë për shkak të natyrës së veprimtarisë së kompanisë. I pyetur nëse Bajrami e kishte përmendur ndonjëherë Grubin, ai u përgjigj se nuk i kujtohej.
“Ndoshta e ka përmendur, por nuk e ka përmendur në lidhje me çështje konkrete të Lotarisë Shtetërore”, tha dëshmitari, duke shtuar se nuk kishte marrë pjesë në ndonjë takim mes Bajramit dhe Grubit.
Gjatë seancës, prokuroria kërkoi që dëshmitari t’i nënshtrohej marrjes në pyetje të kryqëzuar, duke vlerësuar se, për shkak të përgjigjeve të dhëna, nuk mund të konsiderohej më dëshmitar i palës që e kishte propozuar.
Kërkeshtimin e kundërshtuan avokatët mbrojtës, përfshirë Elenko Millanovin, mbrojtësit e Artan Grubit dhe Jordan Apostollskin. Gjykata e pranoi kërkesën dhe gjykimi vijoi me marrjen në pyetje të kryqëzuar të dëshmitarit nga prokuroria.
Gjatë hetimit, Petkovski ishte marrë në pyetje nga prokuroria edhe në cilësinë e të dyshuarit.
Në çështjen “Lotaria Shtetërore”, përveç Artan Grubit dhe Përparim Bajramit, janë të akuzuar edhe Bashkim Avdi, Metodija Dimovski, Skender Mehmeti, Bojan Janev, Fatmir Ramadanovski dhe Aleksandar Dimitrioski.
Sipas aktakuzës, duke tejkaluar kompetencat zyrtare, ata i kanë shkaktuar shoqërisë aksionare “Lotaria Shtetërore” një dëm prej 596.125.511 denarësh.
Të gjithë të akuzuarit, gjatë deritanishëm të procedurës, janë deklaruar të pafajshëm.
Aktakuza përfaqësohet nga prokurorët publikë Daniel Kocev dhe Aleksandar Davçevski, ndërsa procesin gjyqësor e drejton gjyqtarja Biljana Shupllinovska-Jovevski./Plusinfo.
