Drejtori i Inteligjencës Kombëtare do të ndihmojë në hartimin e politikave të reja dhe, potencialisht, të rregulloreve për teknologjinë që po evoluon me shpejtësi.
Nga Julian E. Barnes dhe Tyler Pager
Raportim nga Uashingtoni
Presidenti Trump do t’i japë Jay Clayton, drejtorit të Inteligjencës Kombëtare, një detyrë shtesë, të përqendruar në ndihmën për hartimin e politikave dhe rregulloreve të administratës për inteligjencën artificiale, sipas zyrtarëve aktualë dhe ish-zyrtarëve.
Trump tha muajin e kaluar se do të krijonte postin e një “koordinatori për IA-në” (“AI ‘Czar’”), ndërsa po shtohen shqetësimet lidhur me qasjen e administratës së tij ndaj kësaj teknologjie.
Mes reagimeve të gjera politike dhe publike kundër inteligjencës artificiale, administrata po përballet me presion për të hartuar rregullore ose standarde të reja sigurie për këtë industri.
Por Trump ka shprehur skepticizëm ndaj rregulloreve qeveritare ose ndaj çdo ideje se laboratorët kërkimorë të IA-së duhet të ngadalësojnë zhvillimin e modeleve të reja.
Dy nga kompanitë kryesore të IA-së, OpenAI dhe Anthropic, kanë ndërmarrë hapa për të ngadalësuar publikimin dhe zhvillimin e modeleve të reja të teknologjisë së tyre. Këto masa erdhën pas zbulimeve se versione të avancuara të teknologjisë kishin anashkaluar protokollet e sigurisë për të ndërhyrë në mënyrë të paautorizuar në faqe interneti dhe për të siguruar qasje në informacione pa autorizim.
Clayton u konfirmua në korrik si drejtor i Inteligjencës Kombëtare, pasi kishte shërbyer si prokuror federal i SHBA-së për Distriktin Jugor të Nju Jorkut. John Ratcliffe, drejtori i CIA-s, e rekomandoi Clayton për të dyja postet në administratën Trump, sipas personave të informuar për diskutimet, të cilët folën në kushte anonimiteti përpara njoftimit zyrtar.
Nuk është e qartë saktësisht se çfarë roli do të ketë koordinatori për IA-në, përfshirë nëse shqyrtimi i modeleve të reja apo hartimi i standardeve të sigurisë do të jenë pjesë e mandatit të tij.
Clayton mori pjesë këtë javë në një drekë në Shtëpinë e Bardhë me Trump dhe drejtues të lartë të kompanive të IA-së.
Një zyrtar i Shtëpisë së Bardhë nuk pranoi të komentonte, duke thënë se raportimet mbeten spekulime derisa Trump të bëjë një njoftim. Një zëdhënës i Clayton nuk iu përgjigj kërkesës për koment.
Emërimi i Clayton ishte raportuar më herët nga CNN dhe CBS News. Trump i tha Axios se Clayton ishte një zgjedhje e mirë për këtë detyrë.
Zyrtarëve të lartë në administratën Trump u janë ngarkuar shpesh role të shumëfishta. Sekretari i Shtetit Marco Rubio, për shembull, shërben gjithashtu si këshilltar për sigurinë kombëtare.
Trump nuk ka thënë se çfarë kërkon nga një koordinator për IA-në, megjithëse ka deklaruar se “Vetëm individët me koeficient të lartë inteligjence duhet të aplikojnë!”
“IA-ja është Revolucioni i ardhshëm Industrial, ose Interneti, por do të jetë edhe më e madhe dhe me ndikim më të fuqishëm, ndoshta deri në 25% të PBB-së së vendit tonë”, shkroi Trump në postim. “Ne jemi përpara Kinës dhe pjesës tjetër të botës dhe unë synoj ta ruaj këtë epërsi!”
Në të njëjtin postim, Trump shkroi se synonte të krijonte një Forcë të IA-së (“A.I. Force”), të cilën e krahasoi me Space Force, degën e forcave të armatosura të krijuar gjatë administratës së parë Trump.
As Trump dhe as zyrtarët e administratës nuk kanë sqaruar se çfarë nënkuptonte ai me Forcën e IA-së, ndaj gjithashtu nuk është e qartë nëse Clayton do të ndihmojë në zhvillimin e një organizate të tillë.
Kongresi pritet të shqyrtojë një formë legjislacioni për vendosjen e rregullave të sigurisë për kompanitë e inteligjencës artificiale gjatë sesionit paszgjedhor. Por nuk është e qartë nëse do të arrihet marrëveshje për përmbajtjen e këtyre rregullave apo nëse ekziston vullneti politik për miratimin e ndonjë mase.
Julian E. Barnes mbulon agjencitë amerikane të inteligjencës dhe çështjet e sigurisë ndërkombëtare për The Times. Ai shkruan për çështjet e sigurisë prej më shumë se dy dekadash.
Tyler Pager është korrespondent i Shtëpisë së Bardhë për The Times dhe mbulon Presidentin Trump dhe administratën e tij./The New York Times
