Në kuadër të operacionit të quajtur “MONİTUM”, të zhvilluar nga Organizata Kombëtare e Inteligjencës (MIT) në bashkëpunim me Policinë, u arrestuan në Stamboll Mehmet Budak Derya dhe Veysel Kerimoğlu, të cilët dyshohet se vepronin në emër të Mossad.U konstatua se të dyshuarit, të cilët për vite me radhë i kanë transmetuar informacione inteligjencës izraelite nën mbulesën e aktivitetit tregtar, kanë zhvilluar takime në vende të treta, kanë përdorur komunikim të koduar dhe kanë planifikuar të depërtojnë në zinxhirin ndërkombëtar të furnizimit përmes krijimit të kompanive fasadë.Me këtë operacion u pengua kalimi në një fazë kritike i strukturimit të Mossad-it me bazë në Turqi.
Lajm i fundit… Organizata Kombëtare e Inteligjencës (MIT), në kuadër të operacionit të quajtur “Veprimtaria MONİTUM”, arrestoi dy persona për të cilët u konstatua se punonin për Shërbimin e Inteligjencës Izraelite (Mossad). Si rezultat i punës së përbashkët të MIT-it, Prokuroria e Përgjithshme e Stambollit dhe Drejtoria e Policisë së Stambollit – Njësia Kundër Terrorizmit (TEM), u ndaluan Mehmet Budak Derya dhe Veysel Kerimoğlu.
Nga tregtia e mermerit te spiunazhi
U konstatua se Mehmet Budak Derya, inxhinier minerar, kishte themeluar në vitin 2005 një kompani dhe kishte hapur një gurore mermeri në Silifke të Mersinit. Me kalimin e kohës ai u orientua drejt tregtisë ndërkombëtare, duke krijuar lidhje biznesi me shumë vende. Këto veprimtari tregtare thuhet se tërhoqën vëmendjen e shërbimit izraelit të inteligjencës.
Sipas gjetjeve, në shtator 2012 një person që vepronte në emër të një kompanie fasadë të krijuar nga Izraeli dhe përdorte emrin e koduar “Ali Ahmed Yassın”, vizitoi Mehmet Budak Derya-n në zyrën e tij dhe i propozoi bashkëpunim. Ndërsa në janar 2013, gjatë një takimi të zhvilluar në Evropë, u realizua kontakt i drejtpërdrejtë ballë për ballë me anëtarë të Mossad-it.
Agjentë me emra të koduar dhe takime në vende të treta
U konstatua se gjatë takimeve, një anëtar i Mossad-it me emrin e koduar “Luis” kërkoi rekrutimin e shtetasit turk me origjinë palestineze, Veysel Kerimoğlu. Gjithashtu, u zbulua se të dy personat morën udhëzime për të raportuar rregullisht informacion mbi të gjitha aktivitetet që zhvillonin së bashku.
Po ashtu, u përcaktua se Mehmet Budak Derya, që nga viti 2013, ka zhvilluar takime në vende të treta në disa shtete evropiane me një numër të madh anëtarësh të Mossad, të njohur me emra të koduar si: Luis, Jesus/Jose, Dr. Roberto/Ricardo, Dan/Dennis, Mark, Elly/Emmy dhe Michael.
Informacion i mbledhur përmes palestinezëve
Sipas dosjes hetimore, u konstatua se Mehmet Budak Derya, përmes Veysel Kerimoğlu-t, kishte zgjeruar marrëdhëniet e tij tregtare me vendet e Lindjes së Mesme dhe kishte krijuar kontakte sociale e tregtare me palestinezë që kundërshtonin politikat rajonale të Izraelit. U përcaktua se informacionet e mbledhura për këta persona i janë transmetuar shërbimit izraelit të inteligjencës, Mossad.
Ndër gjetjet përfshihet edhe fakti se ai ka tentuar të sigurojë leje hyrjeje në Gaza, ka kryer vëzhgime lidhur me depo në rajon dhe fotografitë e siguruara ia ka përcjellë Mossad-it.
Teste me poligraf dhe komunikim i koduar
Në kuadër të rëndësisë që inteligjenca izraelite i kushton fshehtësisë, u konstatua se Mehmet Budak Derya ishte pajisur me sisteme komunikimi të koduar. Po ashtu, u zbulua se ai iu nënshtrua dy testeve të poligrafit (detektorit të gënjeshtrës): njëri në vitin 2016 në një vend të Azisë dhe tjetri në gusht 2024 në një hotel në Evropë.
Pas kalimit me sukses të të dy testeve, Derya u përfshi në një fazë më të avancuar të operacionit. Gjatë këtij procesi, u përcaktua se janë fotografuar dhe i janë transmetuar Mossad-it numrat serialë, adresat MAC dhe të dhënat teknike të kartelave SIM, modemëve dhe pajisjeve router, të siguruara nga Turqia dhe nga vende të ndryshme.
Plani i kompanisë fasadë u prish nga MIT-i
Në takimin e fundit të zhvilluar jashtë vendit në janar 2026, u planifikua krijimi i një kompanie fasadë nën kontrollin e Mehmet Budak Derya-s dhe depërtimi, përmes saj, në zinxhirin ndërkombëtar të furnizimit tregtar. Sipas planit, synohej që përmes tre kompanive ligjore që operojnë në Azi të menaxhohej në emër të Mossadit zinxhiri i furnizimit, paketimit, magazinimit dhe dërgimit të produkteve te përdoruesi final. U mësua se ishin diskutuar edhe hapa si hapja e një llogarie bankare për kompaninë fasadë, krijimi i një faqeje interneti dhe hapja e llogarive në rrjetet sociale.
Nuk i shpëtuan MIT-it
Mehmet Budak Derya dhe Veysel Kerimoğlu, të cilët prej kohësh ishin nën ndjekjen e Organizata Kombëtare e Inteligjencës (MIT), u ndaluan përpara kalimit në fazën operative, si rezultat i bashkëpunimit të MIT-it, Prokuroria e Përgjithshme e Stambollit dhe Drejtoria e Policisë së Stambollit – Njësia Kundër Terrorizmit (TEM).
Me këtë operacion u pengua arritja në një fazë kritike e një strukture të Mossad-it me bazë në Stamboll./Sabah/TetovaNews
