Gjykata e Asizës në Novara ka dënuar me 11 vite burg Edoardo Borghini për vrasjen e djalit të tij, Nicolò Borghini, i cili u vra më 19 janar 2025 me dy të shtëna arme gjahu në kulmin e një sherri familjar në shtëpinë e tyre në Ornavasso.
64-vjeçari kishte deklaruar se kishte vepruar për të mbrojtur bashkëshorten, ndërsa prokuroria e Verbania kërkoi 22 vite burg. Gjykatësit njohën rrethana lehtësuese të përgjithshme dhe provokimin, të cilat u konsideruan mbizotëruese. Arsyetimi i plotë i vendimit do të depozitohet brenda 15 ditësh.
Apelimi i vendimit
Avokati mbrojtës Gabriele Pipicelli deklaroi se vendimi do të ankimohet në apel: “Jam i bindur se ka hapësirë që ky vendim të rishikohet për mirë. Presim motivacionet, por marrim parasysh që gjykata ka marrë në konsideratë argumentet e mbrojtjes dhe provokimin. Klienti im është pranuar edhe në programin e drejtësisë restauruese, i cili mund të vlerësohet në Gjykatën e Apelit.” Ai shtoi se procesi ishte shumë delikat dhe se kërkesa e prokurorit për 22 vite burg ishte “qartësisht e tepruar”. Avokati theksoi gjithashtu se për Borghinin dënimi më i rëndë është moral: fakti që ka vrarë djalin e tij.
Gjendja aktuale e Borghinit
Borghini do të mbetet në arrest shtëpiak. Aktualisht ai po qëndron tek një i afërm, pasi ka kaluar katër ditë në burg në Verbania menjëherë pas vrasjes. Gjykata e Asizës, e kryesuar nga gjyqtari Gianfranco Pezone, urdhëroi gjithashtu: konfiskimin e armës së gjahut dhe fishekëve, shkatërrimin e rrobave të viktimës, dhe pagesën e shpenzimeve gjyqësore nga ana e Borghinit, shkruan TgCom.
Në sallë ishte fillimisht edhe bashkëshortja e tij, por ajo u largua para leximit të vendimit. Gruaja kishte zgjedhur të mos paraqitej si palë civile në proces. Para fillimit të gjyqit, Borghini e kishte dëmshpërblyer duke i kaluar asaj pronësinë e plotë të shtëpisë ku jetonin. Në javët e ardhshme do të nisë edhe programi i drejtësisë restauruese, në të cilin i dënuari është pranuar të marrë pjesë. /PiranjatNews/
