Ndihma në programim është sot tregu kryesor ku inteligjenca artificiale po gjeneron të ardhura konkrete, përtej chatbotëve të përdorimit të gjerë si ChatGPT ose Gemini.
Meta, kompania që zotëron Facebook-un, Instagram-in dhe WhatsApp-in, prezantoi të mërkurën Muse Code, një mjet të inteligjencës artificiale të aftë të shkruajë programe kompjuterike në mënyrë autonome. Me këtë hap, kompania hyn në segmentin më fitimprurës të inteligjencës artificiale gjeneruese, i cili aktualisht dominohet nga Anthropic dhe OpenAI.
Ndihma në programim është sot tregu kryesor ku inteligjenca artificiale po gjeneron të ardhura konkrete, përtej chatbotëve të njohur për publikun e gjerë, si ChatGPT ose Gemini.
Microsoft ishte pionier në këtë fushë me GitHub Copilot, përpara shfaqjes së një brezi të ri mjetesh të ashtuquajtura „agjentike“, të afta të kryejnë në mënyrë të pavarur një varg detyrash komplekse.
Ndër këto mjete janë Claude Code i Anthropic, Codex i OpenAI-t dhe Cursor, blerja e të cilit nga SpaceX, grupi i Elon Musk-ut, është drejt përfundimit.
Muse Code nuk është thjesht një gjenerues dhe korrigjues i kodit kompjuterik. Programi planifikon realizimin e një projekti, e ndan atë në detyra, e shkruan programin dhe verifikon rezultatin.
Ai gjithashtu mund t’ua delegojë detyrat disa „nënagjentëve“ që punojnë paralelisht, shpjegoi drejtori i Meta-s, Mark Zuckerberg, në rrjetin e tij social Threads.
Riorganizimi i inteligjencës artificiale në Meta
Mjeti, i cili aktualisht është në versionin beta, faturohet sipas përdorimit dhe jo përmes abonimit. Tarifat janë më të ulëta se ato të konkurrentëve, në kuadër të një strategjie të qartë për të fituar pjesë të tregut.
Meta u ofron madje, si zgjedhje standarde, një tarifë rreth dhjetë herë më të ulët përdoruesve që pranojnë t’i ndajnë të dhënat e përdorimit të tyre, në mënyrë që kompania t’i përmirësojë produktet e veta.
Gjiganti i rrjeteve sociale, të ardhurat e të cilit mbështeten pothuajse tërësisht në reklama, po përpiqet kështu t’i monetizojë drejtpërdrejt modelet e veta të inteligjencës artificiale, nën presionin e investitorëve të shqetësuar për përmasat e shpenzimeve të kompanisë.
Muse Code mbështetet në versionin më të fundit të Muse Spark, modelit të prezantuar në prill dhe produktit të parë të riorganizimit të plotë të sektorit të inteligjencës artificiale në Meta. Modelet e mëparshme të kompanisë konsideroheshin më të dobëta krahasuar me konkurrentët.
Në mesin e vitit 2025, Mark Zuckerberg shpenzoi më shumë se 14 miliardë dollarë për të blerë 49 për qind të Scale AI dhe për ta vendosur drejtuesin e saj, Alexandr Wang, në krye të një njësie të re të quajtur Meta Superintelligence Labs.
Në të njëjtën kohë, ai rekrutoi me paga shumë të larta drejtues nga OpenAI, Anthropic dhe Google.
Miliarderi u shkëput gjithashtu nga tradita e kompanisë për ofrimin e modeleve me qasje të hapur dhe falas, të njohura si „open weight“. Kjo qasje mbështetej nga studiuesi francez Yann LeCun, i cili u largua nga grupi në fund të vitit 2025 për të themeluar kompaninë e tij të re.
Një incident sigurie, në të cilin ishte përfshirë një version i mëparshëm i modelit të Meta-s, Muse Spark 1.1, u bë publik të mërkurën nga media „The Information“.
Gjatë një testi të sigurisë kibernetike, të kryer së bashku me kompaninë e specializuar Irregular, Muse Spark depërtoi në sistemet e një kompanie, identiteti i së cilës deri tani nuk është bërë i ditur.
Incidenti, i cili ndodhi në një datë të paspecifikuar, u shkaktua nga një „gabim konfigurimi“ nga ana e kompanisë që po kryente testin, deklaroi për AFP-në një zëdhënës i Meta-s.
Ai premtoi se në të ardhmen do të publikohet një raport i hollësishëm hetimor.
Ngjarje të ngjashme kanë ndodhur gjatë javëve të fundit edhe në teste të krahasueshme të kryera nga OpenAI dhe Anthropic. Modelet e këtyre kompanive përfituan nga mjedise testimi të izoluara në mënyrë të pamjaftueshme, për të hyrë pa autorizim në sisteme të vërteta kompjuterike.
