Mustafa Bilici, Mehmet Mustafa Gürban dhe Ömer Karakaş iu bashkuan AK Partisë. Shpërndarja e mandateve në Parlamentin turk ndryshoi edhe një herë.
Me kalimin e tre deputetëve në AK Parti, numri i mandateve në Asamblenë e Madhe Kombëtare të Turqisë (TBMM) pësoi sërish ndryshime.
Deputeti i Izmirit Mustafa Bilici kishte dhënë dorëheqje nga Partia Yeni Yol, ndërsa deputeti i Gaziantepit Mehmet Mustafa Gürban dhe deputeti i Aydınit Ömer Karakaş kishin dhënë dorëheqje nga İYİ Parti.
Deputetët iu bashkuan AK Partisë gjatë tubimit të organizuar me rastin e 25-vjetorit të partisë, ndërsa distinktivët e anëtarësimit ua vendosi Presidenti Recep Tayyip Erdoğan.
Me këtë zhvillim, numri i mandateve të AK Partisë në Parlament arriti në 280.
Pas dorëheqjes së Mustafa Bilicit, Partia Yeni Yol kishte humbur numrin minimal prej 20 deputetësh që nevojitet për të formuar grup parlamentar në TBMM.
Megjithatë, pasi deputeti i Kütahyas, Ali Fazıl Kasap, dha dorëheqje nga CHP-ja dhe iu bashkua Yeni Yol Partisë, kjo parti e rifitoi numrin e nevojshëm për të formuar grup parlamentar.
NDRYSHIME EDHE NË OPOZITËN KRYESORE
Në CHP, ku pas vendimit të gjykatës së apelit për “pavlefshmëri absolute” kishin shpërthyer debate të ashpra lidhur me drejtimin e partisë, në korrikun e kaluar kishte përfunduar një periudhë e rëndësishme.
Pas këtij vendimi, Özgür Özel u shkarkua nga posti i kryetarit të përgjithshëm të partisë dhe më pas u zgjodh nga deputetët si kryetar i grupit parlamentar.
Pasi kërkesat për mbajtjen e një kongresi të jashtëzakonshëm nuk u plotësuan, Özel dha dorëheqje nga CHP-ja dhe, së bashku me 90 deputetë, themeloi Partinë e Re – Yeni Parti.
Kjo situatë ndryshoi edhe ekuilibrat në Asamblenë e Madhe Kombëtare të Turqisë.
Numri i deputetëve të CHP-së ra në 44 dhe ata humbën vendin e tyre në ulëset e “opozitës kryesore”, duke u zhvendosur në pjesën e Parlamentit ndërmjet MHP-së dhe DEM Partisë.
Shpërndarja e re e mandateve sipas partive në Parlament është si më poshtë:
- AK Parti: 280
- Yeni Parti: 91
- DEM Parti: 56
- MHP: 46
- CHP: 44
- İYİ Parti: 27
- Yeni Yol Partisi: 20
- Të pavarur: 10
- Yeniden Refah Partisi: 4
- Hür Dava Partisi: 4
- Türkiye İşçi Partisi (TİP): 3
- Demokratik Bölgeler Partisi: 2
- Emek Partisi (EMEP): 2
- Saadet Partisi: 1
- Demokratik Sol Parti (DSP): 1
- Demokrat Parti: 1
SI ISHTE TABLOJA PAS ZGJEDHJEVE TË 14 MAJIT 2023?
AK Parti dhe MHP fituan gjithsej 318 deputetë në zgjedhjet parlamentare të 14 majit 2023, duke siguruar edhe një herë shumicën.
Aleanca e Kombit, ku bënin pjesë CHP-ja dhe İYİ Parti, fitoi 212 mandate, ndërsa Aleanca e Punës dhe Lirisë, ku bënin pjesë Yeşil Sol Parti dhe Partia e Punëtorëve të Turqisë (TİP), fitoi të drejtën e përfaqësimit me 65 deputetë.
Yeniden Refah hyri në Parlament me pesë deputetë.
Megjithatë, kjo tablo nuk mbeti e tillë për shumë kohë.
Veçanërisht partia kryesore opozitare, e cila kishte përfshirë në listat e veta zgjedhore kandidatët e partive me të cilat kishte krijuar aleancë, u zvogëlua ndjeshëm menjëherë pas zgjedhjeve.
Gjithsej 39 deputetë dhanë dorëheqje para se të bënin betimin në Parlament dhe u kthyen në partitë e tyre.
Shpërndarja e tyre sipas partive ishte kjo:
- DEVA Partisi: 15
- Gelecek Partisi: 10
- Saadet Partisi: 10
- Demokrat Parti: 3
- İYİ Parti: 1 – Ahmet Ersagun Yücel, i cili ishte zgjedhur në Ankara nga listat e CHP-së dhe më pas u largua për t’u kthyer në partinë e tij.
Katër deputetë që kishin hyrë në Parlament nga listat e AK Partisë kaluan në HÜDA-PAR, ndërsa kryetari i DSP-së, Önder Aksakal, gjithashtu u largua dhe filloi ta përfaqësonte partinë e tij.
Dy deputetë që ishin zgjedhur nga listat e Yeşil Sol Parti u larguan dhe kaluan në radhët e EMEP-it. Dy deputetë të tjerë iu bashkuan Partisë Demokratike të Rajoneve, Demokratik Bölgeler Partisi.
Për shkak të vdekjes së deputetit të Kocaelit nga Saadet Partisi, Hasan Bitmez, dhe deputetit të Stambollit nga DEM Parti, Sırrı Süreyya Önder; heqjes së mandatit të deputetit të Hatayt nga Türkiye İşçi Partisi, Şerafettin Can Atalay; si dhe dorëheqjeve të Murat Kurum, i cili u emërua ministër i Mjedisit, Urbanizimit dhe Ndryshimeve Klimatike, dhe të Burcu Köksal, Abdurrahman Tutdere, Hasan Baltacı dhe Ahmet Önal, të cilët u zgjodhën kryetarë komunash në zonat e tyre zgjedhore, numri i përgjithshëm i deputetëve në TBMM ra nga 600 në 592./NTV
