Të dhënat: Shoqata e Shefave të Policisë së Qyteteve të Mëdha (MCCA); Grafiku: Russell Contreras/Axios
Kriminaliteti i dhunshëm vazhdoi të binte deri në fund të qershorit në shumë prej qyteteve më të mëdha të Shteteve të Bashkuara. Numri i vrasjeve u ul me 17,2% krahasuar me gjysmën e parë të vitit 2025, sipas të dhënave paraprake të shqyrtuara nga Axios.
Pse ka rëndësi: Rënia e kriminalitetit tashmë përfshin periudhat e dy presidentëve. Ajo nisi gjatë mandatit të presidentit Joe Biden, pas rritjes së krimeve gjatë pandemisë, dhe ka vazhduar edhe nën presidentin Donald Trump.
Trump erdhi në pushtet duke e paraqitur Amerikën si një vend të pushtuar nga kriminaliteti, në një kohë kur shifrat tashmë po binin ndjeshëm.
Meqë kjo prirje ka vazhduar edhe gjatë mandatit të tij, Trump ka marrë meritat për të, duke e lidhur shpesh uljen e kriminalitetit të dhunshëm me vendimin e tij për të dislokuar Gardën Kombëtare në qytete si Uashingtoni dhe Memfisi në Tenesi.
Shifrat: Një analizë e Axios, bazuar në anketën e Shoqatës së Shefave të Policisë së Qyteteve të Mëdha për 66 komunitete të mëdha amerikane, evidentoi rënie të kriminalitetit të dhunshëm gjatë gjashtë muajve të parë të vitit 2026, krahasuar me të njëjtën periudhë të një viti më parë.
- Vrasjet ranë me 17,2%.
- Grabitjet ranë me 16,6%.
- Përdhunimet u ulën me 6,2%.
- Sulmet e rënda ranë me 5,7%.
- Të marra së bashku, katër kategoritë shënuan një rënie prej rreth 8,3%, që përkthehet në afërsisht 14.200 krime të dhunshme më pak të raportuara.
Vështrim më i afërt: Rënia e numrit të vrasjeve është veçanërisht e theksuar në disa qytete që prej kohësh përballen me nivele të larta dhune.
Uashingtoni raportoi 46 vrasje, ose 43,9% më pak krahasuar me 82 vrasjet e regjistruara gjatë gjysmës së parë të vitit 2025.
Në Memfis, numri i vrasjeve ra me 43,7%, nga 119 në 67. Në Hjuston rënia ishte 38,3%, nga 154 në 95 vrasje.
Filadelfia regjistroi 83 vrasje, ose 27,2% më pak krahasuar me 114 vrasjet e së njëjtës periudhë të vitit të kaluar.
Elementi interesant: Aurora në Kolorado – një qytet që Trump gjatë zgjedhjeve të vitit 2024 e kishte paraqitur në mënyrë të rreme si të pushtuar nga bandat e emigrantëve venezuelianë – shënoi një rënie prej 58,8% të numrit të vrasjeve.
Kufizimi i të dhënave: Disa nga rëniet më të mëdha në përqindje u regjistruan në vende që edhe më parë kishin një numër relativisht të vogël vrasjesh, gjë që mund ta bëjë uljen të duket veçanërisht e madhe.
Për shembull, në Newark numri i vrasjeve ra me 64,7%, nga 17 në gjashtë, ndërsa në Raleigh u ul me 63,6%, nga 11 në katër.
Po, por: Disa qytete, ndonëse kishin një numër relativisht të vogël vrasjesh, regjistruan rritje të ndjeshme krahasuar me gjashtë muajt e parë të vitit 2025.
Në Honolulu numri i vrasjeve u rrit me 85,7%, nga shtatë në 13.
Në San Diego rritja arriti në 81,3%, nga 16 në 29 vrasje, duke vazhduar prirjen rritëse që Axios e kishte evidentuar që në tremujorin e parë.
Pamja më e gjerë: Edhe një tjetër mekanizëm i rëndësishëm për monitorimin e kriminalitetit ka evidentuar prirje të ngjashme të rënies së krimeve të dhunshme.
Një analizë e Këshillit për Drejtësinë Penale (CCJ) konstatoi se numri i vrasjeve ra me 18% në 30 qytetet që raportuan të dhëna për gjysmën e parë të vitit 2026. Sipas organizatës, kjo rënie nisi gjatë gjysmës së dytë të vitit 2022.
Ky konstatim është domethënës, sepse kriminaliteti ka rënë në qytete me udhëheqje të ndryshme politike, strategji të ndryshme policore, kushte të ndryshme ekonomike dhe shkallë të ndryshme të përfshirjes së qeverisë federale, theksoi CCJ-ja.
Çfarë thonë autoritetet: “Presidenti Trump premtoi se do ta bënte Amerikën përsëri të sigurt dhe të dhënat dëshmojnë se ai po e përmbush këtë premtim më shpejt dhe më vendosmërisht se çdo administratë tjetër në histori”, deklaroi Shtëpia e Bardhë./Axios
