Ai ishte vetëm njëmbëdhjetë ditë drejtor i komunikimit në Shtëpinë e Bardhë. Sot, Anthony Scaramucci është ndër kritikët më të zëshëm të Trumpit. Në një intervistë për podcast, ai tregon se cilat i konsideron rreziqet më të mëdha për ekonominë.
Njëmbëdhjetë ditë – kaq zgjati periudha e Anthony Scaramuccit si drejtor i komunikimit i Donald Trumpit. Menaxheri njujorkez i fondit mbrojtës tashmë e ka marrë veten mirë nga largimi i tij i shpejtë dhe dramatik në verën e vitit 2017 dhe shfaqet luftarak. “Duhet ta heqim qafe Trumpin”, thotë ai në podcastin “Handelsblatt Invest”.
62-vjeçari drejton fondin mbrojtës SkyBridge Capital, të themeluar prej tij, i cili ndër të tjera ka investuar në Anthropic dhe SpaceX. Shtylla e tij e dytë është podcasti “The Rest is Politics US”, ku ai shfaqet si kritik i presidentit. Scaramucci shqetësohet mbi të gjitha se Trump mund ta çojë vendin drejt një “diktature të butë” dhe ta zhysë ekonominë në krizë.
Gjashtë javë para zgjedhjeve për Kongresin në SHBA, Scaramucci po nis ofensivën e madhe kundër ish-shefit të tij. Niveli i miratimit për presidentin amerikan ka rënë në një minimum rekord, tregoi të hënën një sondazh i fundit i Reuters dhe Ipsos. Scaramucci mendon se demokratët mund të marrin kontrollin e Dhomës së Përfaqësuesve dhe ndoshta edhe të Senatit. Madje edhe disa republikanë tashmë po distancohen nga presidenti amerikan, siç raportoi media e specializuar Politico.
Megjithatë, Trump “nuk është aspak një president laissez-faire”, si paraardhësit e tij Joe Biden dhe Barack Obama, thekson menaxheri i fondit mbrojtës. Trump përpiqet “të ushtrojë presion dhe t’i frikësojë njerëzit”. Pavarësisht kësaj sjelljeje, ai vazhdon të gëzojë mbështetje të madhe në Wall Street dhe në Silicon Valley. Shumë investitorë të Wall Street-it “e duan”, pranon Scaramucci, sepse ai është i mirë për portofolet e tyre dhe ka ulur taksat.
Por menaxheri i fondit mbrojtës dëshiron të distancohet me vetëdije nga kolegët e tij në Wall Street dhe thekson: “Kjo indiferencë e pashpirt e disa super të pasurve është problem.” Një pjesë e vogël e shoqërisë amerikane, thotë ai, po ia kalon jashtëzakonisht mirë, por një pjesë e madhe vuan nga “pasiguri e rëndë ushqimore”.
Prandaj, eksperti financiar arrin në përfundimin: “Trump nuk është i mirë për shoqërinë.” Ai vetë, të paktën, nuk dëshiron të jetojë në një pronë të siguruar me tela me gjemba, “ndërsa fqinjët e mi vuajnë”.
Nëntë vjet pas ndërprerjes së tij të shkurtër, por me pasoja të mëdha, në karrierë në Shtëpinë e Bardhë, menaxheri i fondit mbrojtës është një nga shpjeguesit më të dëgjuar të politikës amerikane jashtë SHBA-së: podcasti i tij, të cilin e drejton së bashku me gazetaren me përvojë të BBC-së Katty Kay, arrin deri në një milion dëgjues për episod; më shumë se dy të tretat e dëgjojnë nga jashtë vendit.
Këtë vit, në korrik, Scaramucci madje u ul në “Royal Box” gjatë turneut të tenisit në Wimbledon. Tribuna e nderit është e rezervuar për anëtarët e familjes mbretërore britanike; aty mund të ulen gjithashtu politikanë dhe diplomatë të njohur, si dhe disa të ftuar të përzgjedhur e të famshëm.
Mbështetja nga kompanitë teknologjike
Scaramucci e shfrytëzon famën e tij për të trajtuar çështje që e habisin ose e shqetësojnë në SHBA. Ajo që në fillim e kishte befasuar shumë, thotë ai, ishte mbështetja e fortë e sipërmarrësve të teknologjisë nga Silicon Valley për presidentin amerikan. Por kjo strategji po rezulton jashtëzakonisht e suksesshme, gjë që shihet në zgjerimin e inteligjencës artificiale (IA).
Si te demokratët, ashtu edhe te republikanët ka kundërshtime ndaj qendrave të reja të të dhënave që nevojiten për IA-në, sepse ato ushtrojnë ngarkesë të madhe mbi furnizimin me energji elektrike dhe ujë. Këtë e shohin në mënyrë kritike madje edhe banorët e Teksasit, të orientuar në favor të biznesit dhe që votojnë kryesisht për republikanët. Megjithatë, Trump nuk vihet në krye të kësaj lëvizjeje populiste. “Nëse jemi të sinqertë”, thotë menaxheri i fondit mbrojtës, Trump është një “aparatçik i paguar”.
Në librin e tij të sapobotuar “All the Wrong Moves”, Scaramucci bën hesapet me vendimet dhe vendimmarrësit që mundësuan ngritjen e Trumpit. Ai i pranon hapur edhe gabimet e veta. Para së gjithash, mendjemadhësinë e tij.
“Nuk isha i përshtatshëm për postin në Shtëpinë e Bardhë dhe nuk duhej ta kisha pranuar kurrë”, pranon ai. E kishin shtyrë egoja dhe krenaria. “Dhe sa herë në jetën time kam marrë një vendim të nisur nga krenaria apo egoja, ka përfunduar keq.”
Në librin e tij, menaxheri i fondit mbrojtës shkruan se SHBA-ja ndodhet aktualisht në një krizë të rëndë. Trump, sipas tij, është duke e zëvendësuar shtetin e së drejtës me një lloj “diktature të butë”. “Presidenti nuk është mik i demokracive, këtë e ka bërë shumë të qartë”, paralajmëron Scaramucci në “Handelsblatt Invest”.
“Gjëja më e mirë që mund të them për Amerikën është ajo që po bëjnë gjykatat”, vlerëson Scaramucci. Kjo i jep shpresë, edhe pse gjyqtarët nuk arrijnë gjithmonë t’i imponojnë vendimet e tyre. Por në shkurt ata shpallën të paligjshme një pjesë të madhe të tarifave doganore. Edhe votimi me postë, pas një vendimi të Gjykatës së Lartë, tani duhet të lejohet.
Ajo që e shqetëson gjithashtu Scaramuccin është lufta me Iranin, së cilës nuk i duket fundi. Do të duhej të hyhej në vend me “500.000 deri në një milion ushtarë”, thotë ai dhe shton: “Një makth logjistik; as nuk do ta dija se ku t’i stacionoja gjithë këta njerëz.”
Menaxheri i fondit mbrojtës pret që lufta të ketë pasoja të rënda për ekonominë amerikane. Që tani, familjet amerikane po paguajnë mesatarisht rreth 2.400 dollarë më shumë në vit për energjinë.
Eksperti financiar mendon gjithashtu se Rezerva Federale e SHBA-së mund t’i rrisë normat e interesit edhe dy herë të tjera gjatë këtij viti – pas rritjes së normave javën e kaluar. Kjo, megjithatë, do t’i rriste ndjeshëm kostot e huamarrjes si për qeverinë amerikane, ashtu edhe për ekonominë.
Në përgjithësi, lufta me Iranin mund të kushtojë gjysmë trilioni dollarë, vlerëson Scaramucci, i cili njihet për deklaratat e tij të bujshme dhe provokuese. “Në këtë mënyrë rritet, praktikisht, kostoja e gjithçkaje.” Si pasojë, ekonomia amerikane mund të rrëshqasë në recesion.
Ndikimi në tregjet financiare
Deklaratat e Scaramuccit mbështesin përshtypjen se tashmë një numër i tërë vëzhguesish të tregjeve janë bërë më të kujdesshëm. Mes tyre është edhe eksperti i tregjeve të kapitalit Ed Yardeni, i cili tani i vlerëson rreziqet nga lufta me Iranin më lart se vetëm disa javë më parë. Yardeni konsiderohet një nga “bull”-ët më të mëdhenj të Wall Street-it, që do të thotë se zakonisht e sheh me optimizëm të ardhmen e tregjeve të aksioneve dhe pret rritje të forta të çmimeve.
Yardeni e uli parashikimin e tij për S&P 500. Tani ai pret që indeksi i gjerë i aksioneve ta përfundojë vitin në 7.900 pikë, në vend të 8.400 pikëve që kishte parashikuar deri tani. Kjo do të nënkuptonte vetëm një rritje minimale krahasuar me nivelin e mbylljes të së hënës.
Scaramucci shqetësohet për zhvillimin e mëtejshëm të ekonomisë amerikane edhe për shkak të përqendrimit të madh të pushtetit te kompanitë e mëdha teknologjike, të cilat dominojnë ekonominë. Për këtë arsye, Scaramucci kërkon që të nxiten më shumë konkurrenca dhe inovacioni.
Aktualisht, të ashtuquajturat “Magnificent Seven” – Alphabet, Apple, Amazon, Microsoft, Meta, Nvidia dhe Tesla – “po i nxjerrin kompanitë e tjera nga tregu ose po i blejnë ato. Në këtë mënyrë, këto shtatë kompani kanë ndikim të madh dhe madje mbajnë sektorë të tërë në një darë të hekurt.”
Megjithatë, Scaramucci vazhdon të besojë në potencialin e Bitcoin-it. Në vitin 2020, menaxheri i fondit mbrojtës investoi në monedhën digjitale më të madhe dhe më të vjetër dhe, për një periudhë, pati një bashkëpunim të ngushtë me FTX. Bursa e kriptomonedhave, tashmë e falimentuar, në kohët e saj të mira zotëronte 30 për qind të aksioneve të kompanisë së tij të investimeve. Por industria u rimëkëmb relativisht shpejt nga skandali.
Të hënën, Bitcoin nisi një valë të re rritjeje dhe e kaloi për herë të parë që nga janari nivelin prej 86.000 dollarësh. Ky ishte niveli më i lartë që nga janari. “Unë besoj në potencialin afatgjatë të Bitcoin-it”, thekson Scaramucci. “Dhe për këtë duhet të jesh i gatshëm t’i përballosh edhe periudhat e këqija.”
