Autoritetet turke kanë zhvilluar operacione kundër katër organizatave kriminale të ashtuquajtura të “gjeneratës së re” në Antalya dhe Kayseri, duke ndaluar gjithsej 42 të dyshuar.
Ministri turk i Drejtësisë, Akın Gürlek, bëri të ditura detajet e operacioneve të fundit kundër këtyre strukturave kriminale.
Sipas Gürlek, operacionet u zhvilluan në kuadër të hetimeve të koordinuara nga Prokuroritë e Përgjithshme të Antalya-s dhe Kayseri-t, në bashkëpunim me drejtoritë policore të të dy provincave.
Në total u vunë në shënjestër katër organizata kriminale dhe 46 persona të dyshuar.
Në Antalya, autoritetet zhvilluan operacione kundër tri organizatave të veçanta kriminale. Hetimet kishin konstatuar se disa prej të dyshuarve lavdëronin në rrjetet sociale metodat e dhunshme dhe kërcënuese të këtyre grupeve ose publikonin materiale që nxisnin pjesëmarrjen në veprimtarinë e tyre.
Nga 14 të dyshuarit e kërkuar në Antalya, 10 u kapën dhe u morën në ndalim policor.
Gjatë kontrolleve, autoritetet sekuestruan edhe lëndë narkotike.
Në Kayseri, operacioni kishte në shënjestër një tjetër organizatë kriminale të “gjeneratës së re”, e cila, sipas hetimeve, dyshohet se kishte kryer 89 akte të veçanta kriminale ndaj 68 viktimave.
Në kuadër të këtij hetimi u zhvilluan njëkohësisht operacione në pesë provinca.
Të 32 të dyshuarit e kërkuar në këtë operacion u kapën dhe u morën në ndalim.
Gjatë bastisjeve u sekuestruan armë, municion, çeqe, kambiale, materiale dixhitale dhe lëndë narkotike.
Në total, në operacionet në Antalya dhe Kayseri u ndaluan 42 nga 46 personat e kërkuar.
Ministri Gürlek deklaroi se autoritetet nuk do të tolerojnë struktura që përpiqen të tërheqin të rinjtë në rrjetet e organizatave kriminale, të normalizojnë dhunën apo ta paraqesin krimin si simbol pushteti dhe prestigji.
“Nuk do të lejojmë asnjë strukturë që përpiqet t’i tërheqë të rinjtë tanë në rrjetet e organizatave kriminale, të normalizojë dhunën dhe ta paraqesë krimin si një element fuqie dhe prestigji. Do ta vazhdojmë me vendosmëri luftën kundër organizatave kriminale të gjeneratës së re dhe të gjitha strukturave të tyre”, deklaroi Gürlek.NTV
