Gazetarët e CNN, MS NOW dhe Politico u lejuan të hynin sërish në Shtëpinë e Bardhë për herë të parë që nga e premtja, vetëm disa orë pasi një gjykatës urdhëroi administratën Trump t’ua rikthente menjëherë akreditimet.
Pse ka rëndësi: Rikthimi i akreditimeve pritet t’i japë fund një bojkoti më të gjerë nga mediat, i cili gjatë ditëve të fundit e la publikun amerikan pa mbulim të rëndësishëm vizual të Presidentit Trump.
Gjendja aktuale: Deri në orën 13:00, sipas kohës së Bregut Lindor të SHBA-së, nuk ishte ende e qartë nëse kamerat e grupit të përbashkët televiziv të mediave do të ishin të pranishme për të mbuluar takimin e Presidentit Trump me Presidentin kinez Xi Jinping.
Rrjetet kryesore televizive që marrin pjesë me rotacion në këtë grup ende prisnin konfirmim nga Shtëpia e Bardhë se CNN-it do t’i lejohej të merrte përsipër këto detyra.
Përmbledhje e zhvillimeve: CNN, MS NOW dhe Politico ngritën të hënën një padi kundër Shtëpisë së Bardhë, duke u mbështetur në Amendamentin e Parë të Kushtetutës së SHBA-së. Ato argumentuan se presidenti dhe administrata kishin shkelur të drejtat e tyre duke ua ndaluar hyrjen gjatë fundjavës.
Mediat që nuk ishin përfshirë në ndalim, por që u solidarizuan me kolegët e tyre, u zotuan të pezullonin shpërndarjen e materialeve video dhe fotografike derisa t’u rikthehej qasja mediave të ndaluara.
Gjykatësi Timothy J. Kelly, i emëruar nga Trump dhe që drejtoi seancën, vendosi herët të enjten në mëngjes se administrata kishte shkelur të drejtat e mediave sipas Amendamentit të Pestë. Ai lëshoi një urdhër të përkohshëm kufizues, me të cilin kërkoi që qasja e tyre në Shtëpinë e Bardhë të rikthehej për 14 ditë.
Në vendimin e tij, Kelly tha se paditësit „kanë treguar se ka gjasa të kenë sukses, të paktën sa i përket pretendimit të tyre për shkeljen e së drejtës për një proces të rregullt procedural sipas Amendamentit të Pestë“.
Më në hollësi: Më vonë të enjten, gazetarëve të këtyre mediave iu mohua hyrja, pavarësisht urdhrit të gjykatës.
CNN, MS NOW dhe Politico kërkuan më pas një seancë të menjëhershme, duke theksuar urgjencën për shkak të vizitës së planifikuar të Xi-së në Shtëpinë e Bardhë.
Në një parashtresë të dorëzuar rreth mesditës të së enjtes, drejtori i operacioneve të shtypit në Shtëpinë e Bardhë, Micah Stopperich, shpjegoi se administrata ishte njoftuar në orën 07:10, sipas kohës së Bregut Lindor, për urdhrin për rikthimin e akreditimeve dhe se procesi kishte nisur në orën 07:25.
Ai tha se kartat e akreditimit që ishin konfiskuar ishin vënë në dispozicion të gazetarëve për t’i marrë duke filluar nga ora 09:55.
Çfarë pritet më tej: Kelly nuk pranoi të zhvillonte një seancë të enjten dhe caktoi 28 shtatorin si afat që paditësit të kërkojnë një urdhër paraprak gjyqësor, i cili do t’u garantonte mediave vazhdimin e qasjes ndërsa çështja shqyrtohet në gjykatë.
Në urdhrin e shkurtër thuhej se Kelly „synon të marrë një vendim me shpejtësi për kërkesën për urdhër paraprak“.
Shtëpia e Bardhë kishte bërë të ditur më herët se do ta apelonte vendimin, por ligjërisht nuk mund ta bëjë këtë gjatë dy javëve të ardhshme.
Nëse çështja vazhdon, Shtëpia e Bardhë mund të kërkojë apelimin. Vendimi i Kelly-t nuk trajton pretendimet e paditësve që lidhen me Amendamentin e Parë. Këto pretendime pritet të shqyrtohen më tej në procesin gjyqësor.
Shënim për transparencën: Autorja e këtij artikulli është bashkëpunëtore me pagesë e CNN-it.
Shënim i redaksisë: Artikulli është përditësuar gjatë zhvillimit të ngjarjeve për të pasqyruar faktin se CNN, MS NOW dhe Politico kanë rifituar qasjen në Shtëpinë e Bardhë./Axios
