Një ngjarje tragjike ka ndodhur në Padova të Italisë, ku 51-vjeçari me origjinë shqiptare, Altin Kokici, është gjetur i pajetë në një kantier ndërtimi.
Sipas gazetës italiane Corriere del Veneto, trupi i 51-vjeçarit u gjet gjatë natës mes së mërkurës dhe së enjtes në një ndërtesë ku po kryhen punime rikonstruksioni.
Kokici, banues në provincën e Vicenzës, ishte pronar i një firme në Sossano, të specializuar në punime murature.
Sipas të dhënave paraprake, dyshohet se shqiptari ka rënë në boshtin e ashensorit dhe ka humbur jetën si pasojë e rënies.
Alarmin e dhanë familjarët, pasi 51-vjeçari nuk ishte kthyer në shtëpi dhe nuk kishte dhënë më asnjë lajm që nga orët e para të pasdites.
Familjarët, përmes funksionit të gjeolokalizimit të celularit, konstatuan se telefoni i tij vazhdonte të ndodhej në zonën e kantierit. Edhe furgoni i Kokicit kishte mbetur i parkuar pranë ndërtesës, me pjesën e ngarkesës ende të hapur.
Pas alarmit, në kantier mbërritën efektivët e Policisë së Padovës. Pasi hynë në ndërtesë, policët telefonuan numrin e celularit të 51-vjeçarit dhe, duke ndjekur zilen e telefonit, arritën deri te boshti i ashensorit.
Aty gjetën trupin e pajetë të Altin Kokicit.
Në vendngjarje ndërhynë gjithashtu ekipet e urgjencës mjekësore dhe zjarrfikësit.
Autoritetet italiane po vazhdojnë hetimet për të përcaktuar shkaqet dhe dinamikën e saktë të aksidentit.
Burimi: Corriere del Veneto
