Një ngjarje e rëndë ka tronditur lagjen Pietralata në Romë, ku tre anëtarë të një familjeje u gjetën të pajetë në dhomën e gjumit të banesës së tyre. Viktimat janë Luca Abbasciano, 42 vjeç, bashkëshortja e tij Valentina Pambianco, 41 vjeçe, dhe vajza e tyre 5-vjeçare, Bianca, e cila kishte një aftësi të kufizuar të rëndë. Edhe qeni i familjes u gjet i pajetë, me plagë të shkaktuara nga arma e zjarrit.
Alarmi u dha rreth orës 13:00 të së hënës, më 31 gusht, pasi një familjar nuk po arrinte të kontaktonte me ta. Shërbimet e emergjencës mbërritën në banesën në Via dell’Antracite dhe, pasi hapën me forcë derën, u përballën me skenën tragjike. Në vendngjarje u gjet edhe një pistoletë, e cila rezulton të ishte e regjistruar dhe në posedim të 42-vjeçarit.
Hetuesit po ndjekin kryesisht pistën e një vrasjeje-vetëvrasjeje, por dinamika e saktë ende nuk është përcaktuar. Testi kriminalistik i njohur si “Stub” pritet të ndihmojë në përcaktimin se kush e ka përdorur armën. Në banesë u gjetën edhe rreth një duzinë letrash, të nënshkruara nga të dy bashkëshortët dhe të drejtuara familjarëve, ku shprehej mesazhi se “vetëm nuk ia dalim dot”.
Sipas rindërtimit paraprak, çifti kishte përballuar prej vitesh vështirësi të mëdha në kujdesin ndaj vajzës së tyre, e cila kishte lindur para kohe dhe me probleme të rënda shëndetësore. Familja ishte e njohur dhe ndiqej nga shërbimet sociale të bashkisë, përfshirë edhe mbështetje ekonomike. Megjithatë, autoritetet theksojnë se bëhej fjalë për një familje të integruar dhe jo për një situatë marginalizimi.
Kryetari i Bashkisë IV të Romës, Massimiliano Umberti, shprehu dhimbje të thellë për tragjedinë, duke thënë se familja kishte luftuar prej vitesh për të përballuar situatën dhe se ndihma e ofruar nga institucionet, pavarësisht përpjekjeve, nuk kishte rezultuar e mjaftueshme. Hetimet vijojnë për të zbardhur plotësisht rrethanat dhe orët e fundit të familjes.
/vizionplus.tv
