Ballina Kronika Shkatërrohet grupi kriminal i trafikut të drogës Shqipëri-Greqi, kapobanda një 34-vjeçar shqiptar

Shkatërrohet grupi kriminal i trafikut të drogës Shqipëri-Greqi, kapobanda një 34-vjeçar shqiptar

Policia e Korfuzit ka goditur një grup kriminal që trafikonte drogë nga Shqipëria drejt ishullit grek dhe më pas e shpërndante atë, duke arrestuar 8 persona mes të cilëve dy prej drejtuesve të grupit. Është identifikuar dhe shpallur në kërkim drejtuesi kryesor i grupit, i cili ndodhet jashtë Greqisë si dhe një bashkëpunëtor i tij, që vuan dënimin në një burg në Greqi.

Janë identifikuar dhe proceduar 20 persona, të cilët kanë blerë lëndë narkotike nga ky grup kriminal. Ndërkohë, ky grup kriminal ka filluar të funksionojë prej muajit korrik 2021.
Sekuestrimet që janë bërë ndaj këtij grupi kriminal;

Që prej 2 korrik 2021 i janë sekuestruar 3.6 kg marijuanë, në 1 qershor 2022 i janë sekuestruar 2.8 kg marijuanë, në 29 qershor 2022 i janë sekuestruar 4.7 kg marijuanë, në 1 shtator 2022 i janë sekuestruar 4.4 kg marijuanë dhe në 27 tetor i janë sekuestruar 3.4 kg marijuanë.

Kreu i grupit është një 34-vjeçar shqiptar me banim të përhershëm jashtë Greqisë, i cili furnizonte grupin me drogë. Nëndrejtuesit e grupit janë një grek 54 vjeç dhe një grek 77 vjeç, të cilët u arrestuan dje. Drejtuesi i grupit ishtë përgjegjës për trafikun e drogës nga Shqipëria në Korfuz si dhe udhëzonte dy grekët për shpërndarjen e drogës.

Në nivelin e dytë të grupit janë 7 persona, 3 grekë, dy meshkuj 50 dhe 63 vjeç dhe një femër 30 vjeç si dhe 4 shqiptarë 34, 47, 68 dhe 35 vjeç. Ky i fundit ndodhet në burg në Greqi i arrestuar më 31 gusht 2022.
Niveli i tretë përfshin njerëz të varur nga substanca në ishullin e Korfuzit. Gjatë kontrolleve ditën e djeshme janë gjetur dhe sekuestruar 567 gram marijuanë, 2 peshore elektronike, 3970 euro, 1 motor, 1 makinë, 6 celularë.

Sasia totale e marijuanës së trafikuar, nga aktiviteti kriminal i grupit në periudhën në shqyrtim, nga korriku 2021 deri në asgjësimin e tij, arrin në të paktën -30- kilogramë, nga të cilat -19- kilogramë janë konfiskuar ndërsa përfitimi financiar total llogaritet të kalojë -180.000- euro.

Artikulli paraprakBitcoin i rikthehet rritjes pas disa muajve negativë, pranë 22 mijë dollarëve
Artikulli tjetërKina raporton pothuajse 60,000 vdekje nga Covid-19 në një muaj