Autoritetet spanjolle shkatërruan një bandë kriminale shqiptare që kontrabandonte 5 tonë kokainë të fshehur brenda një ngarkese banane, ku për pasojë u arrestuan 5 persona.
Droga u kontrabandua në portin e Malaga-s dhe më pas u kap pasi u transportua në një magazinë në një pronë industriale në Alicante. Sipas mediave spanjolle, kjo ishte kapja më e madhe e lëndëve narkotike.
Kokaina, e cila vinte nga Ekuadori, kishte një pastërti prej 87% dhe do të kishte vlerën e më shumë se 265 milionë eurove në treg.
Nga operacioni u arrestuan katër shtetas me origjinë shqiptare, ndërkohë u arrestua një person i pestë, spanjoll 68 vjeç, që gjithashtu ishte pjesë e organizatës.
Sipas policisë, trafikantët e dyshuar të drogës ndërronin vazhdimisht vendbanimin e tyre, udhëtonin shpesh jashtë vendit dhe kishin kompani të ndryshme për të pastruar paratë e trafikut të drogës.
