Në një operacion kundër shitësve të lëndëve narkotike të zhvilluar në 14 provinca me qendër në Stamboll, 324 të dyshuar të ndaluar janë arrestuar.
Nën koordinimin e Prokurorisë së Përgjithshme të Stambollit dhe nga Drejtoria e Policisë së Stambollit – Sektori për Luftën Kundër Krimeve Narkotike, më 10 shkurt u kryen hetime në platforma të ndryshme të mediave sociale dhe aplikacione të mesazheve të çastit. Gjatë hetimeve u identifikuan 69 grupe, përfshirë grupe të mbyllura dhe të hapura, ku kryhej tregti me lëndë narkotike ose substanca stimuluese.
Prokuroria njoftoi se janë kapur 324 të dyshuar, 21 prej të cilëve rezultojnë administratorë grupesh, dhe se të gjithë janë arrestuar nga gjykatat kompetente të procedurës penale pas paraqitjes së tyre.
Mbi 18 mijë të dyshuar të kapur në një vit
Në deklaratën e Prokurorisë thuhet:
“Përveç këtij operacioni, nga 1 janari 2025 e deri më sot, në kuadër të hetimeve të zhvilluara në mbarë qytetin nën koordinimin e Prokurorisë sonë dhe nga Drejtoria e Policisë së Stambollit, janë kapur 18.136 persona nën akuzën për tregti të lëndëve narkotike. Nga këta, 8.992 janë arrestuar.
Gjithashtu, nga 456 të dyshuar të identifikuar si drejtues dhe anëtarë të organizatave kriminale që kryenin trafik ndërkombëtar të drogës, 329 janë arrestuar dhe është sekuestruar pasuri me vlerë 29,5 miliardë lira, e përdorur në aktivitetet kriminale.”
Në deklaratë theksohet gjithashtu se në operacionet ndërkombëtare kundër 12 organizatave kriminale – ORKİNOS-BULUT, ORKİNOS-BULUT 2 dhe ABDO-KASAP (organizata kriminale nga Suedia/Norvegjia) – është arritur ndërprerja e plotë e veprimtarisë së tyre.
Sipas autoriteteve, këto organizata janë identifikuar si përgjegjëse për 40 tonë e 860 kilogramë lëndë narkotike dhe substanca stimuluese, si dhe për 4 milionë e 610 mijë e 350 tableta narkotike.
