Mohammed bin Salman i kërkon Trumpit të tërhiqet nga plani
Princi saudit i kurorës, Mohammed bin Salman, zhvilloi të shtunën një bisedë telefonike me presidentin Donald Trump dhe shprehu shqetësim për planet e tij për goditje të reja masive kundër Iranit, sipas dy zyrtarëve amerikanë dhe një burimi të tretë që ka dijeni për bisedën.
PSE KA RËNDËSI
Trump po shqyrton seriozisht mundësinë e sulmimit të objektivave energjetike iraniane gjatë ditëve të ardhshme, si përgjigje ndaj sulmit me raketa të Iranit kundër një baze amerikane në Jordani dhe pengimit të vazhdueshëm të lundrimit detar përmes Ngushticës së Hormuzit.
Megjithatë, ai ende nuk ka dhënë urdhrat përfundimtarë për fillimin e sulmeve.
TABLOJA E PËRGJITHSHME
Një sulm i tillë mund të çojë në një përshkallëzim të paprecedentë të luftës pesëmujore, e cila është ndërprerë disa herë përkohësisht, pasi Trump ka hapur mundësinë për negociata.
Megjithatë, luftimet janë rifilluar sa herë që këto përpjekje diplomatike kanë dështuar.
NË HOLLËSI
Irani ka kërcënuar se do të hakmerret duke kryer sulme kundër objekteve energjetike dhe infrastrukturës në Izrael dhe në vendet e Gjirit Persik.
“Sauditët shprehën shqetësim dhe kërkuan sqarime për planin e veprimit”, tha për Axios një zyrtar amerikan.
Një burim i dytë, i cili ka dijeni për bisedën telefonike, tha se Mohammed bin Salman i kërkoi Trumpit të ulte tensionet dhe të mos i fillonte sulmet.
Shtëpia e Bardhë dhe Ambasada e Arabisë Saudite në Uashington refuzuan të komentojnë.
ZHVILLIMET E FUNDIT
Trump u takua të mërkurën me ministrin saudit të Mbrojtjes, princin Khalid bin Salman, i njohur edhe si KBS.
Takimi iu shtua agjendës së ministrit saudit pasi ai ishte takuar me nënpresidentin JD Vance dhe i kishte thënë se Arabia Saudite ishte në favor të uljes së tensioneve me Iranin, sipas një burimi të njohur me çështjen.
Ky mesazh u përcoll pavarësisht sulmit të përbashkët amerikano-saudit të kësaj jave kundër milicive proiraniane në Irak.
Burimi tha se takimet kishin për qëllim t’i përcillnin administratës amerikane qëndrimet e Mohammed bin Salmanit për luftën me Iranin dhe për situatën më të gjerë rajonale.
ÇFARË FSHIHET PAS ZHVILLIMEVE
Arabia Saudite është një nga aleatet më të rëndësishme të Uashingtonit në rajon.
Pavarësisht periudhave të tensionit gjatë pesë muajve të fundit, Riadi ka ndikuar në politikën e Trumpit ndaj Iranit në disa momente vendimtare që nga fillimi i luftës.
FUQITË E TJERA RAJONALE KËRKOJNË ULJEN E TENSIONEVE
Edhe fuqi të tjera rajonale, përfshirë Katarin, Emiratet e Bashkuara Arabe, Turqinë dhe Pakistanin, po u bëjnë presion Shteteve të Bashkuara dhe Iranit që të ulin tensionet.
Ministri i Jashtëm iranian, Abbas Araghchi, bisedoi të shtunën me shefin e ushtrisë pakistaneze, marshallin Asim Munir, i cili ka shërbyer si një ndërmjetësues i rëndësishëm ndërmjet Uashingtonit dhe Teheranit.
Araghchi zhvilloi gjithashtu biseda me ministrat e Jashtëm të Turqisë dhe Arabisë Saudite lidhur me mundësinë e sulmeve amerikane.
“Çdo veprim armiqësor nga Shtetet e Bashkuara ose Izraeli, si dhe çdo pjesëmarrje apo bashkëpunim i vendeve të rajonit në veprime të tilla, do të përballet me një përgjigje vendimtare dhe proporcionale nga forcat e fuqishme të armatosura të Iranit”, i tha Araghchi homologut të tij saudit, sipas një deklarate të publikuar në kanalin e tij në Telegram.
ÇFARË PRITET MË TEJ
Ndërmjetësuesit e Katarit zhvilluan të shtunën bisedime të ndara me Abbas Araghchin, të dërguarin e Shtëpisë së Bardhë Steve Witkoff dhe zyrtarë të Omanit, në përpjekje për të arritur një marrëveshje për rihapjen e Ngushticës së Hormuzit.
Bisedimet shënuan përparim, sipas një burimi që ka dijeni për diskutimet.
Megjithatë, mbetet e paqartë nëse ky përparim do të jetë i mjaftueshëm për ta parandaluar përshkallëzimin e mëtejshëm të krizës./Axios
