Tre mërgimtarë nga Komogllava e Ferizajt kanë humbur jetën në një aksident të rëndë trafiku në Gjermani, teksa po ktheheshin nga Kosova drejt vendit ku jetonin.
Viktimat janë Tahir Aliu, 61 vjeç, djali i tij Gentian Aliu, 34 vjeç, dhe Laurent Aliu, 16 vjeç, nipi i Tahirit. Identiteti i tyre është konfirmuar nga familjarët, ndërsa autoritetet gjermane në komunikatat publike nuk i kanë bërë të ditur emrat dhe shtetësinë e viktimave.
Sipas familjes Aliu, tre mërgimtarët ishin nisur nga Kosova të mërkurën, më 5 gusht 2026, rreth orës 11:30, me destinacion Gjermaninë. Në veturë ndodheshin vetëm ata të tre.
Aksidenti fatal ndodhi të enjten, më 6 gusht, rreth orës 07:00, në autostradën A3 pranë Nittendorfit, në rrethin e Regensburgut të landit të Bavarisë.
Sipas të dhënave të Policisë së Oberpfalz-it, vetura po lëvizte në drejtim të Nurembergut kur, pak para një nënkalimi hekurudhor, për shkaqe që ende nuk janë sqaruar, doli nga ana e djathtë e autostradës.
Automjeti zbriti me vrull nëpër argjinaturë, ra në zonën e binarëve të linjës hekurudhore Nuremberg–Regensburg dhe më pas u ndal në brezin e gjelbër përtej tyre. Në aksident nuk u përfshi ndonjë automjet tjetër dhe vetura nuk u përplas me tren.
Të tre burrat pësuan lëndime fatale. Pavarësisht ndërhyrjes së ekipeve të emergjencës, për ta nuk mund të bëhej më asgjë.
Operacioni për nxjerrjen e viktimave dhe largimin e veturës ishte jashtëzakonisht i vështirë. Për shkak të pozitës në të cilën kishte përfunduar automjeti, ekipet e shpëtimit përdorën një vinç, ndërsa në vendngjarje u angazhuan policia, zjarrfikësit, Policia Federale, Deutsche Bahn dhe shërbimet e emergjencës.
Vetura u nxor nga vendi i aksidentit pas disa orësh. Pas përfundimit të operacionit, autostrada A3 në drejtim të Nurembergut u rihap për qarkullim rreth mesditës. Policia njoftoi se hetimet për mënyrën se si ndodhi aksidenti po vazhdojnë dhe se po analizohen gjurmët e mbledhura në vendngjarje dhe raporti i ekspertit të aksidenteve.
Aksidenti shkaktoi pasoja të mëdha edhe në trafikun hekurudhor. Gjatë daljes nga autostrada, vetura dëmtoi linjën elektrike ajrore të hekurudhës, duke bërë që dy trena rajonalë të ndalonin në jug të vendit të aksidentit.
Njëri prej trenave mbeti plotësisht pa energji elektrike. Më shumë se 80 pasagjerë u evakuuan dhe kaluan në një tren tjetër të vendosur në binarin fqinj. Treni i dëmtuar më pas u tërhoq me një lokomotivë me naftë.
Për shkak të aksidentit dhe operacionit të shpëtimit, linja hekurudhore Regensburg–Nuremberg dhe autostrada A3 në drejtim të Nurembergut qëndruan të mbyllura për disa orë. Trafiku rrugor u devijua në daljen Sinzing, ndërsa për udhëtarët e trenave u organizua transport zëvendësues me autobusë.
Me urdhër të Prokurorisë së Regensburgut, në hetim është përfshirë një ekspert për analizimin e aksidenteve. Ai do të shqyrtojë gjurmët në vendngjarje, gjendjen teknike të automjetit dhe të gjitha rrethanat që mund të shpjegojnë se përse vetura doli nga rruga.
Deri në përditësimin e fundit të autoriteteve gjermane, shkaku i tragjedisë mbetej i panjohur. Policia po e trajton ngjarjen si aksident pa përfshirjen e një automjeti tjetër, por ende nuk ka bërë të ditur nëse dalja nga rruga mund të jetë shkaktuar nga shpejtësia, lodhja, një problem shëndetësor, një defekt teknik apo ndonjë faktor tjetër.
Familjarët dhe bashkëvendësit kanë shprehur dhimbjen e tyre për humbjen e trefishtë që ka goditur familjen Aliu dhe fshatin Komogllavë. Njoftimet për ceremoninë mortore dhe varrimin pritet të bëhen të ditura nga familja.
