48-vjeçari nga Shkupi, Aziz Murati, dyshohet se është plagosur me armë zjarri pas mesnatës në hyrje të fshatit Haraçinë.
Sipas të dhënave të policisë, incidenti ka ndodhur rreth orës 01:50, kur nga një automjet është qëlluar në drejtim të 48-vjeçarit.
Pas të shtënave, autorët janë larguar nga vendi i ngjarjes.
Sipas informacioneve të para që citon artikulli, në automjet ndodheshin dy persona dhe dyshohet se njëri prej tyre e njihte të plagosurin.
Policia ka nisur hetimet për zbardhjen e plotë të rastit dhe po punon për identifikimin dhe gjetjen e personave të përfshirë.
Sipas burimeve të televizionit Alsat, dyshohet se i plagosuri është këngëtari i njohur Aziz Murati.
Gjendja e tij shëndetësore raportohet të jetë stabile.
Ministria e Punëve të Brendshme njoftoi se më 8 shtator, rreth orës 01:50, SPB Shkup ishte njoftuar nga Institucioni Shëndetësor “Shën Naumi i Ohrit” se aty ishte sjellë A.M. (48) nga Shkupi me plagë nga armë zjarri.
Sipas denoncimit, ai i kishte marrë plagët në hyrje të Haraçinës, pasi një person që e njihte, i cili ndodhej në një automjet me një person tjetër, kishte qëlluar me armë në drejtim të tij.
MPB-ja po ndërmerr masa për zbardhjen e plotë të rastit.
