Inteligjenca koreanojugore beson se një samit mes Donald Trumpit dhe Kim Jong-unit mund të zhvillohet “në çdo moment”, megjithëse pranon se nuk ka konfirmuar kontakte konkrete
Nga Inma Bonet
Shërbimi Kombëtar i Inteligjencës i Koresë së Jugut (SNI) u ka komunikuar këtë të martë një grupi ligjvënësish se ekzistojnë “shenja dialogu” mes Shteteve të Bashkuara dhe Koresë së Veriut dhe se një samit i ri mes udhëheqësve të tyre, Donald Trump dhe Kim Jong-un, mund të zhvillohet “në çdo moment”. Megjithatë, agjencia pranoi se nuk ka mundur të konfirmojë kontakte konkrete mes Uashingtonit dhe Phenianit. Ajo nuk sqaroi as mbi çfarë të dhënash e mbështet këtë analizë, sipas agjencisë koreanojugore të lajmeve Yonhap.
Shkrirja e mundshme e akullit diplomatik përkon me përpjekjet, deri tani të pasuksesshme, të presidentit të Koresë së Jugut, Lee Jae-myung, për të rihapur dialogun ndërkorean dhe për ta zëvendësuar armëpushimin e vitit 1953 me një regjim paqeje. Megjithatë, SNI ka pranuar se as këto nisma nuk kanë mundësuar vendosjen e kontakteve me vendin fqinj. Koreja e Veriut tashmë e njeh kushtetutshmërisht Korenë e Jugut si një shtet të veçantë dhe ka hequr dorë nga objektivi i ribashkimit.
“Sa i përket një samiti mes Shteteve të Bashkuara dhe Koresë së Veriut, duhet të kemi parasysh se ai mund të zhvillohet në çdo moment”, u tha gazetarëve Youn Kun-young, deputet i Partisë Demokratike në pushtet. Së bashku me Yoo Yeong-ha, nga Partia konservatore e Fuqisë Popullore, ai përmblodhi përfundimet e seancës me dyer të mbyllura që Komisioni i Inteligjencës i Asamblesë Kombëtare zhvilloi me SNI-në.
Vlerësimi i SNI-së për afrimin e supozuar mes Uashingtonit dhe Phenianit vjen pasi Trump ka këmbëngulur në dëshirën e tij për t’u takuar me Kim këtë vit. Në mesin e gushtit, republikani iu referua “marrëdhënies së tij shumë të mirë” me udhëheqësin koreano-verior për të urdhëruar — vetëm pak orë para fillimit të tyre — një reduktim “të konsiderueshëm” të manovrave ushtarake që Shtetet e Bashkuara dhe Koreja e Jugut zhvillojnë çdo verë.
Stërvitjet përfunduan gjashtë ditë më herët nga sa ishte parashikuar dhe kjo detyroi shkurtimin e operacioneve në terren. Trump argumentoi se ato kushtonin tepër shumë dhe dërgonin një sinjal “të papërshtatshëm dhe armiqësor” ndaj Phenianit, i cili, sipas presidentit amerikan, ishte sjellë “me respekt dhe pa synime kërcënuese” që prej rikthimit të tij në Shtëpinë e Bardhë.
Përgjigjja publike e Phenianit ka qenë e përllogaritur dhe e paqartë. Kim Yo-jong, motra e udhëheqësit dhe një nga figurat më me ndikim në rrethin e tij, e cilësoi si “të shkëlqyer” marrëdhënien personale mes Kim dhe Trump, por mohoi se kishte ndonjë afrim diplomatik dhe paralajmëroi se reduktimi i manovrave nuk duhej paraqitur si një gjest vullneti të mirë.
Këtë të hënë, një ditë para raportit të SNI-së, një zëdhënës i Ministrisë së Jashtme të Koresë së Veriut deklaroi se politika “armiqësore” amerikane mbetet e pandryshuar, premtoi se Pheniani do të vazhdojë ta fuqizojë arsenalin e tij bërthamor dhe tha se është “e kotë” të pritet zbutje e tensioneve për sa kohë Uashingtoni e mban denuklearizimin si objektiv, sipas agjencisë shtetërore KCNA.
Pengesë kryesore mbetet, pra, e njëjta që çoi në dështimin e samitit të Hanoit në vitin 2019. Uashingtoni vazhdon të mbështesë zyrtarisht denuklearizimin e plotë të gadishullit Korean, ndërsa Pheniani refuzon të negociojë për arsenalin e tij atomik.
Instituti Ndërkombëtar i Stokholmit për Studime të Paqes llogarit se Koreja e Veriut mund të ketë montuar rreth 60 koka bërthamore dhe se disponon material të zbërthyeshëm të mjaftueshëm për të prodhuar të paktën edhe 30 të tjera.
Disa ekspertë të konsultuar nga kjo gazetë vlerësojnë se Kim do të shkonte në një takim të mundshëm me Trump me më shumë hapësirë negociuese sesa në tri takimet e zhvilluara mes viteve 2018 dhe 2019, falë aleancës së re ushtarake me Rusinë dhe faktit që marrëdhëniet e tij me Kinën janë rivendosur në një trajektore më të favorshme.
Në mesin e këtyre përpjekjeve të supozuara për afrim, SNI e konsideron “dukshëm të ulët” mundësinë që Pheniani të dërgojë së shpejti trupa të tjera për të luftuar në frontin rus të luftës në Ukrainë, megjithëse paralajmëron se situata mund të ndryshojë.
Ky vlerësim e nuancon analizën e bërë pak më shumë se një javë më parë nga inteligjenca ushtarake koreanojugore, e cila kishte zbuluar përgatitje për përforcime të mundshme, por asnjë lëvizje që të tregonte një dislokim të afërt.
Presidenti ukrainas Volodymyr Zelensky deklaroi në gusht se Pheniani kishte vendosur të mobilizonte edhe 30.000 deri në 50.000 ushtarë të tjerë, një vlerësim që Kim Yo-jong e cilësoi “të pabazë”. Që nga viti 2024, rreth 15.000 ushtarë koreano-veriorë kanë luftuar në rajonin rus të Kurskut.
Një pasardhëse e mundshme
Nga ana tjetër, gjatë paraqitjes së kësaj të marte, SNI përsëriti vlerësimin e tij për Ju-ae, vajzën “më të dashur” të udhëheqësit të Koresë së Veriut. Agjencia beson se adoleshentja ndodhet “në fazën e përcaktimit si pasardhëse” dhe se prania e saj gjithnjë e më e shpeshtë në mediat shtetërore synon ta paraqesë para koreano-veriorëve si udhëheqësen e ardhshme.
SNI kishte arritur në këtë përfundim që në shkurt dhe drejtori i tij, Lee Jong-seok, deklaroi në prill se vlerësimi mbështetej në informacione inteligjence “të besueshme”.
Që kur adoleshentja u pa për herë të parë në publik, në nëntor 2022, gjatë lëshimit të një rakete balistike ndërkontinentale, imazhi i saj është shfaqur gradualisht dhe në mënyrë të kontrolluar, derisa këtë vit ajo është bërë pjesë e zakonshme e skenografisë së koreografuar të pushtetit.
Pheniani nuk e ka konfirmuar kurrë emrin apo moshën e saj — të gjitha janë hamendësime — dhe as nuk ka shpallur zyrtarisht ndonjë plan pasardhjeje. Nuk dihet me siguri as sa fëmijë ka Kim Jong-un, megjithëse besohet se janë tre dhe se Ju-ae është fëmija i mesëm, rreth 13 vjeçe. Ajo është e vetmja për të cilën janë publikuar fotografi.
Gjatë këtij viti, ajo është parë duke nderuar publikisht gjyshin dhe stërgjyshin e saj, duke marrë pjesë në aktivitete politike dhe ushtarake, duke qëlluar me armë dhe duke drejtuar një tank.
Që nga viti 2023, shtypi zyrtar i referohet asaj me termin hyangdo, që mund të përkthehet si “udhërrëfyese” ose “udhëheqëse që orienton”, një përcaktim që historikisht ka qenë i rezervuar për figura me autoritet ideologjik ose politik brenda sistemit.
Burimi: EL PAÍS
