Dy burra kanë pësuar lëndime të rënda nga një mjet i mprehtë teksa, sipas raportimit të policisë, po përpiqeshin të ndanin personat e përfshirë në një përleshje në një kazino në Tetovë. Në Çegran, policia ka ndaluar tre persona: njërin pas gjetjes së një substance të bardhë në formë pluhuri dhe dy të tjerë që, sipas kumtesës, tentuan t’i godisnin policët me veturë dhe i kërcënuan me jetë.
1. TETOVË: DY BURRA LËNDOHEN RËNDË TEKSA PËRPIQEN TË NDAJNË NJË PËRLESHJE NË KAZINO
Më 13 nëntor, në orën 01:45, Spitali Klinik i Tetovës ka njoftuar policinë se J.R. (48) nga Bërvenica dhe S.T. (50) nga Saraqina ishin sjellë me lëndime të rënda trupore nga një mjet i mprehtë.
Sipas kumtesës, të dy ishin lënduar teksa përpiqeshin të ndërhynin në një përleshje mes V.A. (44) nga Xhepçishti dhe A.I. (33) nga Treboshi. Ky i fundit ishte në shoqërinë e S.I. (26) dhe Sh.S. (26), të dy nga Treboshi. Kumtesa nuk përcakton se kush e përdori mjetin e mprehtë.
Për shkak të rëndesës së lëndimeve, 48-vjeçari është transferuar në Kompleksin e Klinikave “Nënë Tereza” në Shkup, ndërsa 50-vjeçari është mbajtur për mjekim në Spitalin Klinik të Tetovës.
Në orën 03:45, policia ka ndaluar F.H. (34) nga Treboshi, punonjës i kazinosë, nën dyshimin se kishte ndihmuar në lidhje me ngjarjen. Edhe V.A. është ndaluar dhe, pas përkeqësimit të gjendjes së tij shëndetësore, është mbajtur në Spitalin Klinik të Tetovës nën mbikëqyrje policore.
Në orën 08:50, A.I., S.I. dhe Sh.S. janë paraqitur vetë në Stacionin Policor të Tetovës dhe janë ndaluar për procedurë të mëtejshme. Pas zbardhjes dhe dokumentimit të rastit do të paraqiten kallëzimet përkatëse.
2. ÇEGRAN: TRE TË NDALUAR, DY DYSHOHEN SE TENTUAN T’I GODISNIN POLICËT ME VETURË
Më 12 nëntor, në orën 20:35, policia ka ndaluar H.S. (26) nga Çegrani pasi, gjatë kontrollit të veturës “Mitsubishi” që ai drejtonte, ka gjetur dhe sekuestruar një substancë të bardhë në formë pluhuri. Më pas, gjatë kontrollit të shtëpisë së tij me urdhër gjykate, policia ka gjetur dhe sekuestruar sërish substancë të bardhë në formë pluhuri. Lloji i saj nuk përcaktohet në kumtesë.
Sipas policisë, gjatë veprimeve zyrtare, V.Ç. (24) dhe A.N. (35), të dy nga Çegrani, janë afruar para shtëpisë me një “BMW”. Ata dyshohen se kanë tentuar t’i godasin policët me veturë dhe i kanë kërcënuar me jetë. Të dy janë larguar, por policia i ka gjetur dhe ndaluar pak më vonë. Pas dokumentimit të rastit do të paraqiten kallëzimet përkatëse.
3. DEBRESH: 52-VJEÇARI LËNDOHET RËNDË PAS RËNIES NGA NJË SHKALLË GJATË PUNËS
Më 12 nëntor, në orën 15:10, Qendra Mjekësore e Gostivarit ka njoftuar policinë se G.R. (52) nga Debreshi ishte sjellë me lëndime të rënda trupore.
Sipas raportimit, ai ishte rrëzuar nga një shkallë teksa punonte në një shtëpi në Debresh. Një ekip i DPB Gostivar ka kryer këqyrjen e vendit të ngjarjes.
4. TETOVË: DY TË NDALUAR GJATË NJË SHITBLERJEJE TË NJË SUBSTANCE TË BARDHË
Më 12 nëntor, në orën 22:10, policia ka ndaluar S.M. (40) dhe A.P. (46), të dy nga Tetova, në rrugën “JNA”. Sipas kumtesës, policët i kanë kapur në flagrancë gjatë shitblerjes së një substance të bardhë në formë pluhuri.
Gjatë kontrollit, policia ka sekuestruar substancë në formë pluhuri dhe para. Kumtesa nuk përcakton llojin e substancës. Të dy janë mbajtur në stacionin policor dhe pas dokumentimit të rastit do të paraqitet parashtresa përkatëse.
5. SËRMNOVË: NDALOHEN DY 23-VJEÇARË PAS GJETJES SË MARIHUANËS
Më 12 nëntor, në orën 15:30, policia ka ndaluar në Sërmnovë B.D. (23) nga Gostivari dhe I.G. (23) nga Sërmnova. Gjatë kontrollit ndaj tyre, policia ka gjetur dhe sekuestruar marihuanë.
Të dy janë mbajtur në stacionin policor. Pas dokumentimit të rastit do të paraqitet parashtresa përkatëse.
6. BËRVENICË: ZJARR NË NJË SHTËPI, PA TË LËNDUAR
Më 12 nëntor, në orën 23:55, në SPB Tetovë është raportuar se kishte shpërthyer zjarr në një shtëpi në Bërvenicë, në pronësi të O.A. (77).
Zjarrfikësit e Tetovës e kanë shuar zjarrin. Nuk pati të lënduar. Një ekip i SPB Tetovë ka kryer këqyrjen e vendit të ngjarjes. (SPB Tetovë)
