Ballina Teknologji Facebook shpall rregulla të reja për reklama

Facebook shpall rregulla të reja për reklama

Facebook tha se do t’i forcojë rregullat dhe masat mbrojtëse në lidhje me reklamat politike, “për të parandaluar ndërhyrjen e huaj” në zgjedhjet në Europë dhe gjetkë.

Mjetet shtesë do të lançohen në Bashkimin Evropian në fund të marsit, për të ndihmuar në transparencë më të madhe të reklamave politike në Facebook, tha udhëheqësi i komunikimeve në gjigantin e teknologjisë, Nick Clegg.

Rregullat e reja do të kërkojnë që reklamat politike, të lidhura me zgjedhjet e BE-së në maj, “të autorizohen”.

Clegg, ish-zëvendëskryeministër i Britanisë, i cili është punësuar në Facebook në tetor, tha të hënën në Bruksel se këto rregulla do të mbulojnë reklamat që “nuk mbështesin në mënyrë të qartë një kandidat apo parti politike, por që fokusohen në tema shumë të politizuara, si migracioni”.

Në një blog të vetin, rrjeti më i madh social në botë tha se “mjetet e transparencës për reklamat zgjedhore do të lançohen në Indi në shkurt dhe në Ukrainë dhe Izrael përpara zgjedhjeve të tyre, ndërsa do të zgjerohen globalisht para fundit të qershorit”.

Masat janë të ngjashme me ato të miratuara për zgjedhjet për Kongresin e SHBA-së në nëntor të vitit 2018, tha Clegg.

Facebook-u është kritikuar gjatë dy vjetëve të fundit për veprim të pamjaftueshëm për të luftuar lajmet e rreme, operacionet propagandistike dhe përhapjen e përmbajtjeve ekstremiste në platformat e tij./REL

Artikulli paraprakKosovari kërkohej nga Interpol, shkon si ‘cjapi tek kasapi’ në polici
Artikulli tjetërStudenti humbi jetën pasi konsumoi makarona