Qendra për Menaxhimin e Krizave (QMK) ka informuar për gjendjen pas reshjeve të dendura të shiut deri në orën 12:30, ku janë regjistruar përmbytje dhe rrëshqitje dheu në disa rajone të vendit.
Kërçovë – 180 persona të evakuuar
Në rajonin e Kërçovës, gjatë natës, reshjet intensive shkaktuan dalje nga shtrati të lumit Zajashka në rrugën “Prilepska”, ku janë përmbytur disa shtëpi.
Rreth 180 persona janë evakuuar dhe janë strehuar në sallën sportive “Hristo Uzunov”.
Gjithashtu është regjistruar grumbullim uji në rrugën “29 Nëntori” në lagjen Podvarosh, ku janë përmbytur bodrume të disa objekteve, përfshirë edhe objekte të spitalit të Kërçovës.
Në terren po ndërhyjnë:
OVR Kërçovë
NP “Komunalec”
Drejtoria për Mbrojtje dhe Shpëtim
Në orën 10:00 është mbajtur takim koordinues në Komunën e Kërçovës, pas të cilit është organizuar shpërndarja e ushqimit dhe ujit për të evakuuarit me ndihmën e Kryqit të Kuq. Nga Shkupi janë dërguar ekipe shtesë me batanije, dyshekë, shtretër dhe ndihma të tjera emergjente.
Sipas informacioneve aktuale, nuk ka persona në rrezik për jetën, por evakuimi parandalues vazhdon. Reshjet mbeten intensive dhe situata po monitorohet nga afër.
Rajoni i Shkupit – Oborre të përmbytura
Përmes numrit emergjent 112 janë pranuar raportime për:
Oborre të përmbytura në fshatin Idrizovë (Gazi Babë)
Përmbytje në fshatin Bukoviq (Saraj)
Oborr dhe bodrum të përmbytur në Zelenikovë
Oborr të përmbytur në Radishan (Butel)
Komunat kompetente kanë dalë në terren dhe po ndërmarrin masa për sanimin e dëmeve.
Rajoni i Tetovës
Është raportuar rrëshqitje dheu në rrugën Tetovë–Xhermo, e cila është bllokuar për qarkullim.
Nga ora 07:45 është vendosur ndalim për qarkullimin e automjeteve të rënda dhe autobusëve në drejtimin Tetovë–Kodër e Diellit për shkak të reshjeve të borës.
Aktualisht nuk ka rritje të nivelit të lumenjve dhe nuk pritet dalje nga shtrati. Furnizimi me energji elektrike dhe ujë të pijshëm është i rregullt.
Rajoni i Gostivarit
Janë raportuar përmbytje shtëpish në:
Bellovishtë
Lagjet Ciglana dhe Banjeçnica
Në Bellovishtë, dy fëmijë dhe nëna e tyre kanë mbetur të bllokuar në një shtëpi të përmbytur, ndërsa është njoftuar menjëherë Njësia Territoriale e Zjarrfikësve dhe OVR Gostivar.
Përmbytjet janë pasojë e daljes nga shtrati të lumit Sushica dhe kanaleve të bllokuara. Është planifikuar angazhimi i mekanizimit për pastrim, ndërsa përfaqësues të pushtetit lokal dhe Drejtorisë për Mbrojtje dhe Shpëtim ndodhen në terren.
Autoritetet bëjnë thirrje për kujdes maksimal dhe ndjekje të udhëzimeve zyrtare derisa reshjet vazhdojnë.
